Tali tonuhia ki he tanaki $62,650 ke ‘ota me'alele kae 'ikai ma'u mai ^Featured

Ko e tikite ‘uluaki ko e ma’u ha pa’anga ‘i he fakamatala loi, ko’ene talaange kia Lisiate Lonitenisi ‘i ‘Aokosi 2019 ke ‘oange ‘a e $23000 ke ‘omai ‘aki ‘ene me’alele mei Siapani.

‘I he tikite hono ua ko e ma’u ha pa’anga ‘i he fakamatala loi, ko’ene ma’u ha pa’anga ‘e $16850 meia Loleini Tu’ineau ‘i Ma’asi 2017 ke ‘omai ‘aki ‘ene me’alele mei Siapani.

Ko e tikite hono tolu ko e ma’u ai pe ha pa’anga he fakamatala loi, mei he tokotaha ko Tiane Fatai ‘i he 2017 ke totongi ‘aki ‘a e tute ‘o e me’alele pea pehee ki he tikite hono faa ko e ma’u ha pa’anga he fakamatala loi mei he tokotaha tatau ko e $12,000 ke ‘omai ‘aki ‘ene me’alele mei Siapani.

Ko e tikite hono nima ko e tukuaki’i tatau pe ki hono ma’u ha pa’anga ‘e $9800 me ia Vaipule fehoko ‘i ‘Epeleli 2017 ke ‘omai ‘aki ‘ene me’alele mei Siapani.

Na’e fili ‘a e Faka’iloa mo’ene Fakafofonga lao Sifa Tu’utafaiva ke fakahoko ‘ena hopo ‘i he Fakamaau’anga Lahi ‘ata’ataa. Pea ko hopo’i fakataha pe ‘a e ngaahi tikite ‘e 5 neongo ko e kau Talatalaaki kehekehe.

Pea ‘oku faka’aho ki he ‘aho 27 Siulai 2020 ke haa ai ‘a e Faka’iloa ‘i he Fakamaau’anga ke fakahoko hono Fakamaau’i.

Fakatatau mo e fakamatala ‘oku ma’u ‘e he ongongo ni, ko e Faka’iloa na’e ‘osi tautea ngaue popula ia ‘e he Fakamaau’anga Polisi ki he tukuaki’i tatau, he na’ane ngaue ‘i he kautaha ‘ota me’alele. Ko e ‘aho na’e tu’utu’uni ai ke ne ngaue popula, na’e toe ui ai mo’ene ngaahi tikite kehe ki he ngaahi tukuaki’i tatau pea toki taki ngaue popula.

Ka ko’eni ‘oku kaka hake ‘ene ngaahi hopo ki he Fakamaau’anga Lahi koe’uhi ko e lahi ‘o e pa’anga ‘oku tukuaki’i ki ai. Pea ‘oku mahu’inga ki he ni’ihi ‘o e kakai ‘o e fonua kenau fakapapau’i ‘a e ngaahi pisinisi ‘ota me’alele pea toki ‘ave ‘enau pa’anga.