Tangi Lord Tu’ivakano ki he Fakamaau’anga Tangi Featured
10 Ma'asi, 2020. Kuo fakamahino mei he Fakafofonga Lao ‘a Lord Tu’ivakano William Clive Edwards Sr. ‘e fakahu atu ki he Fakamaau’anga Tangi ‘a e tangi ‘a Lord Tu’ivakano 'i he faingamalie vave taha fekau’aki mo’ene ta’efiemalie ki he tu’utu’uni ‘a e Kau Sula 'i he faka'osinga 'o e Hopo 'i he Vaha'a 'o Lord Tu'ivakano mo e Kalauni.
Ko e ngaahi tikite ko’eni na'e tu'utu'uni aofangatuku kiai 'a e Kau Sula koe Fakamatala Loi ke ma’u ai ha tohi ngofua folau (Making False Statement), Fuakava Loi (Perjury) mo e ma’u mo tauhi ‘o e mahafu ‘ikai ha laiseni kiai 'a ia na'a nau fakahalaia'i 'a e Faka'iloa kiai.
‘I he fakamatala ‘a Edwards kuo mahino ‘a e loto ‘a Tu’ivakano ke fai ha tangi ki he Fakamaau’anga Tangi pea kuo maau pe mo e ngaahi makatu’unga tangi ia pea 'oku lolotonga fakahoko kiai 'a e ngaue.
Na’e fokotu’u foki ‘e he Talekita Va’a Talatalaaki (Director of Public Prosecution) ‘a e Pule’anga Semisi Lutui lolotonga 'a e Hopo ni ki he Fakamaau’anga ‘i he ‘aho Falaite 6 Ma’asi kuo ‘osi ‘a e loto ‘a e ‘Ateni Seniale fakatatau kihe mafai kuo foaki kiate ia 'e he Konisitutone ke fakapekia ‘a e tikite faka’ilo ‘e 6 mei he 10 na’e faka’ilo kiai ‘a Lord Tu’ivakano.
Na’e makatu’unga foki ‘a e fokotu’u ko’eni mei he fokotu’u mei he Tu’i Fakamaau Lahi na’a ne tataki ‘a e hopo sula ko’eni ‘i he efiafi Tu'apulelulu 5 'o Ma'asi ‘oku ‘ikai ha fakamo’oni fe’unga ke fakahoko ‘aki hono tukuaki’i ‘o Lord Tu’ivakano pea koe faka’ilo ‘e 6 ko’eni ‘oku ‘ikai ke fakapotopoto pea ‘oku totonu ke tamate’i.
Na’e toe fakamahino ‘e he Tu’i Fakamaau Lahi ‘e ‘ikai fakapotopoto ke tukuange ki he Kau Sula kenau fakahoko ha’anau tu’utu’uni makatu’unga ‘i he ‘ikai ha fakamo’oni fe’unga pea 'oku fakatu'utamaki leva 'eni telia na'a iku ke nau fai tu'utu'uni 'o makatu'unga 'i he'enau fehi'a pe sai'ia.
Na’e tukuange ‘e he Fakamaau’anga ‘a e houa meimei houa ‘e 2 ki he Kau Sula ke fakahoko ai ‘enau tu’utu’uni ‘i he efiafi ‘aneafi Monite 9 ‘o Ma’asi ka na’a nau foki mai pe ‘i loto he miniti nai ‘e 20 ‘o fakahalaia’i katoa ‘a Lord Tu’ivakano ki he tikite ‘e 3 na’e toe.
Na’e ‘osi tali halaia foki ‘a Lord Tu’ivakano ki hono ma’u ‘a e me’atau te’eki ke laiseni ‘i hono ‘api nofo’anga.
Na’e tu’utu’uni foki ‘e he Tu’i Fakamaau Lahi hili hono fakahalaia’i ko’eni ‘e he Kau Sula ‘a Lord Tu’ivakano ‘e toki hilifaki hono tautea ‘i he ‘aho 24 ‘o ‘Epeleli.
Kaikehe ko e mahino ko’eni ‘e tangi ‘a Lord Tu’ivakano fekau’aki mo e tu’utu’uni ‘a e Kau Sula ‘oku mahino mai hange koe anga maheni ‘e toki aofangatuku mei he Fakamaau’anga Tangi.
