Tevita 'Unga Featured
![Pilinisi Tevita 'Unga](/~nepituno/media/k2/items/cache/ee760d1c1474fde7f8f71a96b2452e29_L.jpg)
Na’e ‘alo’i ‘a Tevita ‘Unga ‘i he ta’u 1824 pea ko ‘ene ‘Eiki ko Taufa’ahau ‘a ia na’e Tu’i Haapai pea toki hoko kimui hili hono papitaiso ki he Huafa ko e Siaosi Tupou I hili hono fakatahataha’i ‘o Tonga. Ko e fa’e ‘a Tevita ‘Unga ko Kalolaine Fusimatalili ‘a ia koe uaifi ia hono ua ‘o Taufa’ahau pea mei he tukufalaholo ‘oku ‘i ai ‘a e laine Fusitu’a.
Na’e hoko foki ‘a Tevita ‘Unga ko e Kōvana ‘o Vava’u ‘i he kongaloto ‘o e sentuli 19 pea na’e fakamatala’i ‘a Tevita ‘Unga ‘e he tangata Pilitānia na’e folau kumi fonua mai ‘o afe ‘i Vava’u ‘i he 1865 ko Julius Brenchley. Na’e fakamatala ‘a Brenchley ‘o pehē koe tangata loloa mo kaukaua ‘a ‘Unga pea na’e po’uli hono fofonga ‘e taha ‘o mahalo pe koha fakatu’utamaki. Na’e toe fakahā foki ‘e Brenchley na’e motu mo hono ‘ulu’ulutuhu ‘e ua pea na’e ‘uhinga ia ko hano feilaulau ‘aki ki he ngaahi ‘Otua mu’a ‘o hange koe tukufalaholo faka Tonga ‘o e ‘aho koia.
Hili ‘a e pekia ‘a Pilinisi Vuna Takitakimalohi ‘a ia koe ‘Ea ia ki he Taloni ‘i he ta’u 1862 pea koe ‘alo foki ia ‘o Siaosi Tupou I mo Kuini Sālote Lupepau’u, na’e ‘ikai ha ‘Ea ki he Taloni ‘o Tonga. Na’e makatu’unga mei ai hono fakalao’i ‘o Tevita ‘Unga pea fakanofo ia kene hoko koe Pilinisi Kalauni ‘i he Konisitūtone ‘o e ta’u 1875. Na’e fakanofo ai pe ia kene hoko koe fuofua Palemia ‘o Tonga ‘i he ‘aho 1 ‘o Sanuali ta’u 1876.
Na’e tengetange lahi ‘a Pilinisi Tevita ’Unga pea na’e pau ai ke fakafolau faka faito’o ki Nu’usila ‘i he ta’u 1879. Na’e ‘ikai ke ola lelei ‘a e feinga ko’eni ‘o pekia ai pe ‘a Tevita ‘Unga ‘i he ‘aho 18 ‘o Tīsema ta’u 1879 ‘i ‘Aokalani Nu’usila. Na’e fakafolau faka pule’anga mai ai pē ‘a e sino ‘o Tevita’Unga ‘e he Manuao Siamane mei Nu’usila ko e Nautilus pea na’e telio pe ‘i ‘Uiha.
Ko e taha ‘o e ngaahi ngāue ma’ong’onga ‘a Pilinisi Tevita ‘Unga ko ‘ene fatu ‘a e lea ‘o e fasi fakafonua ‘o Tonga “Ko e fasi ‘o e tu’i ‘o e ‘Otu Tonga” ‘a ia na’a ne fatu ‘i he ta’u 1874 pea hoko koe fasi fakafonua ‘i he ta’u 1875. Na’e pekia ‘a Pilinisi Tevita ‘Unga lolotonga ia ‘oku ‘i ai hono fanga ‘alo ‘a ia ko Pilinisi ‘Uiliamu ‘Uelingatoni Ngū Tupoumālohi, Pilinisi Nalesoni Laifone mo Pilinisesi ‘Elisiva Fusipala Tauki’onetuku.
Ko e ‘alo foki ‘o Pilinisesi ‘Elisiva Fusipala Tauki’onetuku na’e hoko koe Tu’i II (Siaosi Tupou II) 'a ia koe mokopuna pe 'o Tevita 'Unga pea koe Mokopuna Ua 'o Sioasi Tupou I.