Tali 'a e 'Eiki Palemia ki he tohi fehu'i 'a 'Eliesa Fifita
Na'e ha 'i he ongoongo 'a e 89. 5 'o e pongipongi 'o e 'aho ni 'a hono faka'eke'eke 'e he Letio 89.5 'a e 'Eiki Palemia fekau'aki moe tohi fehu'i 'a 'Eliesa Fifita 'o e 'aho 14 'o Sanuali 2015. Na'e me'a foki 'a e 'Eiki Palemia 'o pehe ko hono fakangaue'i 'a hono foha Po'oi Pohiva 'oku makatu'unga pe ia 'i he falala kakato 'iate ia ki he tokotaha ni neongo ko hono foha pea 'e faingofua ange pe ia kiate ia 'i ha toe taha kehe.
Na'e toe me'a foki 'a e 'Eiki Palemia 'o pehe 'oku 'ikai ha vahenga makehe heni 'oku 'oange ma'a Po'oi Pohiva he 'e vahe pe ia mei he vahenga 'o e 'Eiki Palemia 'a ia 'oku 'uhinga 'e toki 'oange pe ' ehe 'Eiki Palemia 'a e vahenga 'o Po'oi mei hono vahenga.
Na'e toe fehu'i foki 'i hono faka'eke'eke 'o e Palemia 'a e hoha'a 'a e ne ha he tohi fehu'i ne fakahoko meia 'Eliesa Fifita fekau'aki mo e kau Minisita 'oku 'i ai 'a e ngaahi kaveinga mo e tukuaki'i mamafa 'oku fekau'aki mo kinautolu pea 'oku fiema'u ha'a ne tali kiai ka na'a ne me'a 'o pehe koe fili kinautolu 'e he kakai pea ko e ngaahi me'a koia 'oku hoha'a mai ki ai 'a 'Eliesa na'e hoko ia kimu'a.
'Oku muimui'i ofi foki 'e he Nepituno 'a e tohi fehu'i ko'eni pea 'i ai 'a e tui ta'e toe veiveiua koe kaveinga 'eni 'oku mahu'inga ki he kakai 'o e fonua pea 'oku 'i ai mo 'enau totonu ke nau 'ilo kiai. 'Oku 'i ai foki moe hounga'ia 'i he malava ke fakahoko mai 'a e tali ko'eni mei he 'Eiki Palemia.
'Oku ma'u foki 'e he ongoongo ni ha fakaha meia 'Eliesa Fifita 'oku ne faka'amu ke ma'u mai ha tali tohi mei he 'Eiki Palemia pea 'oku 'ikai ke fiemalie ki he tali kuo ne fanongo ai he ongoongo 'a e 89.5. Na'a ne toe pehe foki 'oku 'i ai mo 'ene tali ki heni pea 'oku loto ke 'oatu ke 'ilo kiai e kakai 'o e fonua.
