Huufi ‘e he ‘Ene ‘Afio Tupou VI ‘a e Fale Alea ‘o Tonga ^Featured

Ko e ouau anga maheni pe ‘eni pea na’e me’a ai ‘a e ‘Eiki Sea ‘o e Fale Alea pehe ki he Hou’eiki mēmipa pehe ki he kau fakaafe akalani;angi mei he lēvolo kehekehe ‘o e fonua ke faka’ilonga’i ‘a e ouau ni.

‘Oku ‘ota foki ‘i lalo heni ‘a To Folofola kakato 'a e Tama Tu’i Tupou VI ‘i hono faka’ilonga’i ‘a e oua ni.

Kou tuku ‘a e fakafeta’i ki he ‘Otua Mafimafi ‘i he’ene tauhi mo e tataki pea tau a’usia lelei ‘a e ‘ahó ni ki he huufi e Fale Alea ‘o e ta’u 2019. ‘Oku laumālie lelei pē ‘a e Seá, Palēmiá mo e Kapinetí, kau Fakafofonga ‘o e Hou’eiki Nōpelé pea pehē ki he kau Fakafofonga ‘o e Kakaí.
Māhino mai kuo kamata lelei e fakataha mo e kakaí ki he alea’i e ngaahi Lao Fakaangaanga ‘i he founga ko hono tālanga’i.

Ko e temokālatí ko e founga ia ‘o e alea’i ‘e he ngaahi kupu kotoa ‘o e sōsaietí pea ‘oku totonu foki ke mahu’inga ai mo e fili ‘a e kakaí. Ko e konga mahu’inga eni ‘o ha temokālati he ka ‘ikai ko e hoko atu pē ‘a e faitu’utu’uni fakataautaha ‘a ia ‘e lelei pē ki ha ni’ihi tokosi’i.

Ko e me’a ‘oku ‘ikai ke hā mai ‘i he ‘ahó ní ko ha vīsone ke to e langa’i hake ‘a e tu’unga faka’ekonōmika ‘o e fonuá. Ka neongo ia ‘oku totonu foki ke makatu’unga eni ‘i ha tu’unga fakaako ‘oku fakatokanga’i fakatu’apule’anga pea ‘oku fe’unga ki he ngaahi fiema’u ‘a e kau pule ‘i he ngaahi ngaue’angá ‘o tatau pē ‘i Tonga ni pea mo e ngaahi fonua mulí.

Ko ia ko e fiema’u mahu’inga taha ke tokoni ke langa hake ‘a e tu’unga faka’ekonōmiká mo e ngaahi ngaue’angá, ko ha ‘apiako fakatekinikale ‘a ia ‘e lava’i ai ha ngaahi tohi fakamo’oni ako ngāue ma’á e to’utupu ‘oku nau nofo mei he akó.

‘Oku ou fiefia ‘oku hā mai kuo ‘osi kamata ke ngaue’aki ‘a e founga ako ko ‘ení ‘e he kautaha vaka ko e FISA pea ‘ofa pē ke lava ke ngaue’aki he ngaahi kautaha ‘oku nau fengaue’aki ‘i mulí koe’uhí ke lava ke fakamo’oni’i ha tu’unga fakaako ‘oku fakatokanga’i ‘i tu’apule’angá.

‘Oku ‘ikai ke totonu ke tau kei hokohoko atu pē ‘a e founga lolotongá hono ako’i ‘o e to’utupu ‘o e ‘ahó ní ka ke feinga’i ha ngaahi pōto’i ngāue ‘e lava ke tokoni ki he hoko atu ‘o e mo’uí.

‘E tokoni eni ke to e lahi ange ‘o e ngaahi faingamālie ngāue kae ‘ikai ke fakangatangata pē ki he ngāue ‘e lava ke kau atu ki aí.

Ko e konga ‘e taha ‘o e ako ko iá ko e fakamahino’i ‘o e mahu’inga ‘o e fakafuofua ‘o e ma’u me’atokoní pea mo e fakamālohisinó. Ko e konga mahu’inga ia ‘o e tupu fakaesino mo e faka’atamai ‘a e fānaú. ‘E tokoni lahi hono ako’i kei taimi ‘a e ngaahi ‘ulungaanga lelei ko ení ki hono fakapapau’i ‘e mo’ui ‘aonga ‘a e to’utupú ‘i he kaha’ú ‘o ‘ikai ke ngata pē ‘i he’ene lelei kia kinautolú ka ki he sōsaietí fakalukufua.

Kuo taimi ke fakatahataha’i ‘a e koloa ‘a e fonuá ki he lelei fakalukufua ‘a e fonuá. Kapau ‘oku tau ma’u ha koloa fakafonua pea ‘oku totonu ke tau ngaue’aki ‘a e koloa ko iá ki he lelei ‘a e fonuá.

‘Oku ou talamonū atu ki he fakataha alea ‘o e ta’u ní pea ‘ofa ke tapuaki’i ai pē he ‘Otuá ‘a Tonga mo hono kakaí.

‘Ofa atu.

'Oku 'amanaki foki ke fakahoko pe 'a e founga anga maheni 'a ia ko hono tali 'a e folofola 'a 'Ene 'Afio 'e he Sea 'o e Fale Alea pea 'e toki mahino 'eva mei ai 'a e hoko atu 'a e 'asenita ngāue 'a e Fale Alea 'o Tonga.