Tali ki he lotomamahi Veivosa Taka ki he Kovana Ha'apai na'e ha 'i he Talaki Sanuali 20, 2014
Kātaki ka ke pulusi atu ‘eku ki’i tohi ni koe fie tokoni pe ki he founga ‘o e faka’uhingame’a he ‘oku malava ke ne faka’asili e tafenga lelei mo e monū mo’oe fonua ‘o kapau ‘oku tonu hono ngāue’aki pea ‘oku toe malava foki ke ne kumoa mo fakakā ‘a e tupulekina ‘o e fonua ‘o kapau ‘e fehalaaki hono ngāue’aki. Ko e faka’uhingame’a ‘oku ne tataki e konga lahi ‘o ‘etau mo’ui mo ‘e tau fai fatongia ‘i he taimi kotoa ‘o ‘e tau ‘ā (conscious mind) pea mo ‘e tau mohe (unconscious mind). Ko ia ‘oka tonu koe ‘aonga lahi ka ‘oka hala ko e maumau lahi:
Neu lau e tohi ‘a Vosa ‘i he Talaki ‘o ne pehē na’e ‘ikai me’a ange Kovana Ha’apai ki he ‘enau feinga ki he Fosoa ‘o Ha’apai. ‘A ia ko e ‘uhinga leva ‘o ‘ene mamahi he na’a ne tukuaki’i na’e ‘ikai poupou e Kovana ke langa ha Fosoa. ‘I he faka’eke’eke pea mo e ‘Eiki Kovana na’e mahino mei ai na’e te’eki ke faiange ha fetu’utaki meia Vosa ‘i he me’a ko eni fekau’aki mo ‘ene mamahi. Ko e fakahinohino ‘o e faka’uhingame’a ‘oku ne tala mai ko e fa’ahinga faka’uhinga eni ‘oku hala mata’ā’ā he ‘oku ‘ikai taha mātē pe ‘uhinga ‘o e ‘ikai ke te lava ki ha ngāue ‘oku fai ko e ‘ikai ke te poupou ki he ngāue koia. ‘Oku fele ngāhi ‘uhinga lelei pea ‘oku ‘ikai mahino pe koe ha e founga na’e ngāue’aki ‘e Vosa ke ne tukuaki’i ai e ‘Eiki Kovana na’e ‘ikai fie poupou ki he Fosoa.
Ko e ‘ulu’i tohi na’e tonu ke fakalea ‘o pehē ko e hoko atu ‘e Vosa hono fakafepaki’i ‘o e Hou’eiki ‘i Ha’apai me ia Mo’ale he ko e kakano ia ‘o e tohi ko e hoko atu ‘o e feinga ke ‘oua na’a toe ‘iai ha kau fakafofonga mavahe ‘o e Hou’eiki Nopele ‘i Falealea hangē ko ia na’e taukave’i ‘e Mo’ale Finau na’e fakafofonga ma’a Ha’apai 12.
Ko e mamahi ‘a Vosa ‘i he Tu’i Ha’ateiho na’e ‘ikai ha ‘uhinga pea ko ia ‘oku ‘ai ki ai ‘e tau paloveape ko e “Mamahi noa ‘a Ngutu ‘o Fuiva”. ‘Oku fiema’u ke tuku mai e ‘uhinga, ko e ha e fehalaaki ‘i he fakahoko fatongia ‘a e Tu’i Ha’ateiho pea moe founga na’e fakahoko’aki ‘o hono fakama’opo’opo.
Ko e founga totonu na’e tonu ke talanoa a Vosa ki he Kovana pea talanoa ki he Tu’i Ha’ateiho ki he tukuaki’i ‘oku ne fai pea toki ‘omi ki he pepa. Ko e fa’ahinga founga ngāue ko e ni koe tukuaki’i noa’ia pe kakai ‘oku fakapapeliane pea holoki fonua pea ‘oku totonu ke tau ako ke tau ngāue’aki e founga totonu ‘a ia koe tomu’a fai e faka’eke’eke, Tu’u-Sio-Fanongo, ke tau ‘ilo e mo’oni pea toki muimui mai ai ‘e tau fakama’opo’opo pe ko ha ngāue fehalaaki pe na’e tonu pe hono fai.
Faka’apa’apa atu
‘Uteifuiono
