Ta'efiemalie ki he tali 'a e palemia

‘Oku ou tokanga lahi ki he tali ‘a ‘Akilisi Pohiva ke ‘oua ‘e ma’u hala e kakai kae lava kenau fakamaau’i lelei ‘a e ngaahi me’a ko ‘eni he ‘oku ou tui ‘oku lohiaki’i lahi kinautolu ‘e ‘Akilisi Pohiva. Teu ‘oatu e fakatataa ko ‘eni. Ko e tali ‘a ‘Akilisi Pohiva na’a ne tukuaki’i ‘e ia ‘a e fili ‘a e kakai ‘o pehe ko ‘enau fili ‘eni ‘o Minisitaa ‘a e tokotaha ko ‘eni. Ko ‘eku tali ki he me’a ko ‘eni ‘oku hala e ma’u ‘a ‘Akilisi Pohiva pea ‘oku ne feinga ke kalofi e fehu’i mahu’inga ko ‘eni ke kei pukepuke e falala ‘a e kakai ki hono pule’anga. Na’e ‘ikai ke fili ‘e he kakai ia e Minisitaa ko ‘eni neongo ‘oku malava kenau fili mai ha taha pea ‘e hoko ko e Minisitaa.

Ko hono fili ‘o e kau Minisitaa ko e fatongia pe ia ‘o e Palemia pea ‘oku ne fa’iteliha pe ia kene fili ha taha kene hoko ko ha Minisitaa pea ko e tu’u ia ‘a e lao. Ko e mo’oni ia ‘o e me’a ko ‘eni ko ia na’a ne fili e Minisitaa ke hoko ki he fatongia. Ko e fakamo’oni pau ki he me’a ko ‘eni he ‘oku kei to e ‘a e toko taha 13 ke fili mei ai ha Minisitaa. Pea ko e fakamo’oni pau ‘e taha ki heni ‘oku kei toe ‘a e toko 3 mei he PTOA ke foaki ha lakanga Minisitaa kiate kinautolu.

Ko e fehu’i leva pe ko e ha ne foaki ange ai pe Minisitaa ia ki he fa’ahinga ko ‘eni kae tuku e kau tama ia ko ee? ‘oku mahino leva mei he fakamatala ‘oku ou faii ‘oku lohiaki’i lahi ‘e ‘Akilisi e kakai ‘i he’ene tali ko ‘eni. ‘Oku ou tokanga lahi ki he fo’i me’a ko ‘eni he ‘oku kamata hala ‘aupito ‘aupito hono pule’anga pea ‘oku ou ‘ilo mo fakapapau’i atu he’ikai ke tolonga ‘a hono pule’anga.

Ko e konga hono ua ‘o e me’a ‘oku ou tokanga atu ki ai ko e fili pe ‘e ‘Akilisi Pohiva hono foha ‘a Po’oi Pohiva ke hoko ko ‘ene Sekelitali (PA-Personal Assistant) ‘ona ngaue fakataha pe ‘i he ‘ofisi ‘o e Palemia. Ko e taha ‘eni ha toki me’a fakalilifu ‘aupito kuo hoko ki hotau pule’anga pea ‘e lava pe ia keu pehe ko ‘ene sauni ‘eni ‘a e ngaahi me’a ne fai ‘e he Tu’i mo e hou’eiki ki he kakai ‘o e fonua. ‘Oku ou pehe ‘oku fakavalevale ‘aupito ketau lotu mo ako ‘o maama pea tau fai ha ngaue pango pehe ni koe’uhi ‘e ‘ikai ke lava ia ke fakatatau kitautolu ki he Tu’i mo e Hou’eiki pea ‘e hala pe ia ke fetongi ‘aki ha me’a ‘oku kovi ha kovi ka ‘oku fetongi ‘aki ‘a e kovi ‘a e lelei kae lava ke ngaue ha me’a ki mu’a.

Kaikehe kae hoko atu mu’a ‘a ‘eku lave ki he kaveinga ‘oku ou taukave’i. ‘Oku ou tui ta’etoeveiveiua ‘e hoko e fo’i me’a ko ‘eni ko e palopalema ki he fonua fakalukufua. Teu ‘oatu e fakatataa ko ‘eni. Kapau ‘e iku e ngaue ‘a Po’oi ‘i he ‘ofisi e Palemia ‘one hanga ‘e ia ‘o fetuku e ngaahi me’a fakapulipuli ‘a e pule’anga ki he ‘enau Nusipepa fakafamili ko ia ko e Kele’a pea ko hai tene toe ta’ofi ‘a Po’oi Pohiva he ko ‘ene Dad pe ko ‘ene ‘eiki ‘oku lolotonga Palemia pea ‘e hoko leva e fu’u palopalema ko ia ‘oku ou lave ki ai he ‘e tu’u lavea leva e fonua ‘i he kaha’u. Ko e pehe ko ia ‘e ‘Akilisi Pohiva ‘oku faingofua ange kiate ia ‘ene ngaue mo hono foha ‘i ha toe taha ko e me’a ia ‘oku ui ko ‘ete pusiaki’i e tevolo ‘i hoto loto fale.

Ko e ngaahi tefito’i tui ko ia na’a ne fa’a taukave’i mo kalanga’aki ‘i he kuohili ‘a e ‘oua ‘e ‘ai fakafamilii’i ha me’a tautautefito ki he ngaue kuo ‘ikai ke hoko ia pea ‘oku ne lolotonga hokohoko atu pe ‘a ‘ene lohiaki’i e kakai e fonua kenau tui ange ki he me’a ‘oku ne fai.

Toki me’a faka’ulia mo’oni eee.


Faka’apa’apa atu
Eliesa Fifita
Tufuenga
Kolomotu’a.