Tau tali mu’a ‘a e fale’i ‘a e kau mataotao 'i he lao ^Featured

 30 'Aokosi, 2017

Tangata’eiki,

Kataki kae tu’u atu mu’a ‘eku kole ki he kakai ‘o e fonua tautautefito kiate kinautolu ‘oku nau kei tala'a mo toe faka'uhinga ‘i he tu’utu’uni ‘a ‘Ene ‘Afio ‘i hono mafai faka-Konisitutone ke tau tali mu’a ‘a e fale’i ‘a e kau mataotao ‘i he lao hange koia kuo tuku mai 'e he 'Ateni Seniale Le'ole'o.

‘Oku ‘ikai ngata ‘i he’enau ‘ilo ki he lao ka ‘oku ‘i ai mo ’enau taukei pea na'a nau ako mo 'ilo ki he lao pea ‘oku ‘ikai puli ia.

‘Oku malie ‘a e hopo mai ‘a e kau toutou hopo ‘i Fale Hopo ke toe faka’uhinga 'a e lao mo e Konisitutone pea ‘e anga fakafefe ha’atau tui kiai kapau ‘oku nau mo’ua hokohoko pe ‘o hange ha seini taula 'o e vaka.

‘Oku fu’u fiema’u ke lau ‘e he kakai ‘a e kupu 38 mo e 77(2) ‘o e Konisitutone ke mahino pea toutou lau he ‘oku tohi lanu ‘uli’uli ‘i he pepa hinehina pea ‘oku tohi pe ‘i he lea faka-Tonga.

‘Oku ‘i ai mo e ngaahi faka’uhinga kehe ia ‘a e ni’ihi ‘oku ‘asi mai ki mu’a ka ‘oku ‘ikai mama’o ia mei he kemipeini Fili Fale Alea ‘a ia ‘oku mahino ngofua pe ia pea 'oku toe 'alu'alu kehe atu pe ia.

Ko e fonua ‘eni na’e tuku ki ‘olunga ki Langi pea ‘oku fou atu pe ‘a e tu’utu’uni ‘a e Tu’i 'i he laini koia.

‘Oku ou faka’amu ange ke tau manatu’i pe ‘oku ‘i ai ‘a e me’a ‘i he’etau Konisitutone ‘oku ui koe “Talisone” pea ke tau faka’ehi’ehi pe mei ai.

Faka’apa’apa Atu,

‘Eliesa Fififta

Tufuenga-Kolomotu’a