“Ui ki ha fakatotolo’i ‘o e Tonga Forest Products Limited” Featured
Nuku'alofa, 22 Sune 2015. Kuo ‘oatu ‘e he ‘Eiki Palemia, Hon. Samuela ‘Akilisi Pohiva ha’ane fokotu’u ki he Kapinetí ke fai leva ha ngāue fekau’aki mo e ngaahi tukuaki’i ko e kautaha Poate ‘a e Pule’angá, Tonga Forest Products Limited (TFPL), ‘oku ‘i ai ‘a e pa’anga kuo mole koe’uhí ko e ngāue ‘a e ongo ‘ofisa kimu’a ‘o e kautaha ni.
‘Oku pehē ‘e he tukuaki’í ko e TFPL ‘oku mole mei ai ‘a e ngaahi lekooti mo e ‘akauni fekau’aki mo e $4.9 miliona na’e nō mei he Pangiké Fakalakalaká mei he 2011 ki Me 2015.
‘Oku ‘i ai ‘a e tukuaki’i ko e ‘akauniteni kimu’a mo e pule ki he pa’anga ‘i he TFPL, Ms. Glenda Hiyao, pehē ki he CEO pe Talekita Pule, Mr. David Edwards, ko kinaua na’a na fai e ngāue ki hono toho mo e tufa ‘o e pa’anga mei he nō, pea ko ia ai tena ‘ilo ‘a e feitu’u ‘oku tuku ai ‘a e ‘ū lekooti.
‘I ha tohi ‘a e Sea ‘o e Poate TFPL, ‘Uhila Liava’a ki he kau Talekita, na’a ne tukuatu ai ‘ene hoha’a fekau’aki mo e ngaahi ‘isiu ‘o e nō mei he TDB, pea na’a ne fiema’u mei he TDB ke fakapapau’i ange ‘a e totongi tupu $279,851.00 mei he nō $4.9 miliona ‘oku te’eki ai ke totongi talu mei he 2013.
‘I ha tali ki he tohi ‘a ‘Uhila mei he CEO ‘o e TDB, Mrs. Leta Kami, na’a ne fakahā ai ko e totongi tupu fakata’u fakakatoa ko e $400,000, pea ‘oku toe ‘i ai pe foki mo e nō makehe ‘a e TFPL, ‘a ia ko e $400,000.
Na’e pehē ‘e he CEO ‘o e TDB “ne mau ‘osi a’u kimautoluia ki he tu’unga ne mau fiema’u fakavave leva ke totongi fakafoki kotoa mai e nó.”
Na’e fai foki ha fakataha ‘a e kau ‘ofisa mei he Ngaahi Pisinisi ‘a e Pule’anga, TFPL mo e Pangiké Langa Fakalakalaka ‘i he ‘aho 4 Sune ke feinga ke solova ‘a e palopalema ko ‘eni.
NGATA’ANGA
Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; Ngaahi Faka’eke’eke- Email: This email address is being protected from spambots. You need JavaScript enabled to view it.
