Fakafiefia ngāue ‘a e kau Polisi ki he Faito’o Konatapu Featured
Komisiona Polisi Stepen Caldwell
Lau 'a e 'Etita
Fakafiefia ngāue ‘a e kau Polisi ki he Faito’o Konatapu
25 ‘Epeleli, 2019. Ko e ongoongo fakafiefia ia ki he fonua ‘a e lahi hono puke ‘e he kau Polisi ‘a kinautolu oku nau fakahoko ‘a e ngāue pango mo siokita ko hono fakatau atu, fetuku holo, mo hono faka’aonga’i ‘a e faito’o konatapu.
‘Oku mahino pe foki koe ngāue faingata’a ‘eni ‘o makatu’unga ‘i he lahi mo e mafola ‘a e faito’o konatapu kae tautautefito ki he ‘aisi ‘i he fonua ka ‘oku hoko ‘a e ngaahi ongoongo ki hono puke ta’emalōlō ‘e he kau Polisi ‘a e matakali ni koe faka’amanaki lelei ki he fonua.
‘Oku ma’u foki mo e fakamatala mei he Potungāue Polisi koe konga ‘o e ola lelei ‘a e ngāue ‘a e kulupu makehe (Taskforce) ko’eni ‘oku ngāue ki he faito’o konatapu koe tokoni mai ‘a e kakai ‘i he komiuniti o ‘omai ‘a e ngaahi fakamatala fekau’aki mo e kakai ‘oku nau fakahoko ‘a e ngaahi ngāue pango ko’eni.
‘Oku mahu’inga leva ‘i he’ene tu’u koia ke tau tu’u fakataha ‘a e kakai ‘o e fonua ‘o ngāue fakataha mo fepoupouaki ke fakafepaki’i ‘a e fu’u peau kula kafakafa ko’eni ‘oku ne ‘ohofia ‘a e fonua pea tetau ‘amanaki leva ki ha ola ‘oku lelei.
‘Oku mahino ‘ikai toe veiveiua koe palopalema vivili taha ‘eni ‘i he fonua pea ‘oku totonu mo tatau ke fakamu’omu’o ia ‘i he asenita ngāue ‘a e Pule’anga pea ‘oange ha tokanga mavahe kiai.
Na’e hanga ‘e he Pulle’anga ‘i he ta’u 2016 ‘o foaki ‘a e pa’anga ‘oku laka hake 'i he $300,000-00 ke fakahoko ‘aki ‘a e fakatotolo 'a e kulupu makehe (taskforce) 'i he Potungaue Polisi ki he paasipooti.
Kuo lava ‘a e fakatotolo ko’eni pea ko hono ola ‘oku ‘ikai mahino pe ‘e mo’ua nai ai ha kakai kuo tukuaki’i kiai pe ‘ikai he ‘oku lolotonga ‘i he malumalu ‘o e Fakamaau’anga ‘a e ngaahi hopo koia.
‘I he taimi tatau ‘oku holoitounga ki Tolitoli ‘a kinautolu ‘oku ma’u ‘oku nau tufaki mo fetuku holo ‘a e faito’o konatapu pea ‘oku mahino mai mei ai ‘e toe tokolahi ange kapau ‘e fakapa’anga ‘e he Pule’anga ‘a e ngāue ko’eni pea ‘oange mo hano patiseti makehe.
‘Oku toe mahu’inga foki ‘i he’etau lave ki he kaveinga ko’eni ke tau’atāina ‘a e Komisiona Polisi pea ke fili 'eha sino tau'atāina he ‘oku ho’ata mai hono ola ‘i he ngaahi ngāue lelei ko’eni ‘oku fakahoko 'e Potungāue Polisi.
‘I he taimi tatau ‘oku mahu’inga ke fakapapau’i ‘oku fakama’a ‘a kinautolu ‘i he Potungāue Polisi ‘a ia ‘oku matamata ‘oku nau kaunga ki he ngāue pango ko’eni ‘o hange ko ia na’e tuku mai ki mu’a mei he Potungāue Polisi.
Kaikehe ‘oku fe’ao ma’u pe ‘a e uite mo e tea ‘i he taimi kotoa ka ‘oku mahu’inga ke tukuange ‘a e fatongia faka-Polisi ke tau’atāina ‘o mama’o mei hano fakapolitikale’i kae malava ke fakahoko lelei mo ma’a honau fatongia.
‘Oku ‘i ai a e faka’amu ketau lipooti ‘a e ngaahi ngāue pango ko’eni ki he ma’u mafai he ko hotau fatongia faka-sivile ia pea kapau na’e ‘i ai ha ni’ihi na’e ma’uhala ‘i he fakamatala ‘a e Tangata'eiki Palēmia kimu’a ‘oku nau ‘ilo ‘a e kakai ‘oku nau fai 'a e ngāue pango ko’eni ka ‘oku ‘ikai hanau mafai kiai pea koe ki’i hamipato’a pe ia ka koe poini heni ‘oku mahu’inga fau ‘a e kaveinga ni ki he fonua mo hono hakotupu pea 'oku fu'u fiema'u 'a e tokanga makehe kiai.
Tau lotua mu’a ‘a e kaveinga mafatukituki ko'eni pea tau poupou ki he ngāue lelei ‘oku fakahoko ‘e he’etau Potungāue Polisi mo e faka’amu ‘e fakaivia fakapa’anga ‘e he Pule’anga ‘a e ngāue mahu’inga ni ke toe malavalava ange.
