Ko e “Foaki” mo e “Takitaki” ‘i Tonga & “Totongi” mo e “Politiki” he Uēsite ^Featured

Ko e “Foaki” mo e “Takitaki” ‘i Tonga & “Totongi” mo e “Politiki” he Uēsite

 Tavakefai‘ana, Sēmisi Fetokai Kulīha‘apai Moahehengi‘ovava‘ulahi Potauaine, Unitec Institute of Technology & Vava‘u Academy for Critical Inquiry and Applied Research.

Palōfesa Maui-TāVā-He-Ako Dr Tēvita O. Ka‘ili, BYU Hawai‘i & Vava‘u Academy for Critical Inquiry and Applied Research.

Palōfesa Hūfanga-He-Ako-Moe-Lotu Dr ‘Ōkusitino Māhina, Vava‘u Academy for Critical Inquiry and Applied Research.

‘Oku vahe tolu lalahi ‘ae mafai koe ngaahi kupu tefito he fonua koe [1] Fa‘ulao moe Falealea; [2] Fakamo‘onilao moe Fakatahatokoni; moe [3] Fakahokolao moe Fakamaau‘anga. ‘Oku ‘uhinga lahi ‘enau mavahevahe ke takitaha faitau‘atāina mo faitotonu ‘enau fengāue‘aki fakakātoa ma‘ae lelei lahi moe ‘aonga mo‘oni ‘ae fonua ‘ae ‘ātakai moe kakai. ‘Oku “fakafelavai” pē “fakahoko” mo “fakamāvae” tu‘uma‘u ‘ae ngaahi kupu “fakafonua” he‘enau fengāue ‘aki “fakataha” he‘enau “kehekehe” ma‘ae lelei fakalukufua ‘ae fonua ‘ae ‘ātakai moe kakai ‘o Tonga.

Na‘e talu ‘ae fetu‘utaki ‘a Tonga mo ‘Iulope (moe Uēsite) mei he senituli 17 ‘ae hū mai ‘ae politiki moe ‘ikonōmiki, ako moe tekinolosī, lotu moe pule‘anga fo‘ou (moe hā fua) fakaUēsite ‘o tuifio – moe motu‘a politiki moe ‘ikonōmiki, ako moe tekinolosī, lotu moe pule‘anga tu‘ufonua / tupu‘a (moe hā fua) fakaTonga. ‘Oku lahilahi hanga ‘ehe ‘anga fakaUēsite tokua ‘oku fo‘ou mo fakatauele ‘o “fakaehaua” mo “fakapōpula” ‘ae to‘onga fakaTonga tokua ‘oku motu‘a mo fakavale ‘o tupu ai ‘ae matu‘aki mā‘uhinga mo ‘aonga lahi ke “fakatataua” mo “fakatau‘atāina” kinaua.

Kuo hū mai foki ‘ae ongo kupu lalahi fakaUēsite koe “Konisitūtone koe ‘atafālahi ‘oe Lao moe Lao koe ‘atafāsi‘i ‘oe Konisitūtone” koe ongo me‘angāue fakafonua fo‘ou mo makehe ‘oku vaka mai ai hono fokotu‘utu‘u ‘ae fonua ‘ae ‘ātakai mo hono kakai. ‘Oku matu‘aki mā‘uhinga fau mo ‘aonga atu leva hono “fakatatau” ‘ae fepaki / fehangahangai moe fenāpasi / fekāingaaki he vā / vaha‘a ‘ae ongo fuo moe uho ‘oe ‘ilo moe poto motu‘a / tupu‘a ‘oe foungafai fakaTonga moe ‘ilo moe poto fakaUēsite fo‘ou he Konisitūtone moe Lao.

‘Oku kau heni hono “fakatatau” he Konisitūtone moe Lao ‘ae “foaki” moe “takitaki” fakaTonga ‘oku “fakatokolahi” / “fakakulupu” ‘ene angafai moe “totongi” moe “politiki” fakaUēsite ‘oku “fakatokotaha” / “fakatautaha” ‘ene to‘ongafai. ‘Oku ‘uhinga lahi ‘ae “foaki” koe “siofe‘ofaaki” moe “takitaki” he fakaTonga koe “siofetokoniaki” fakatokolahi / fakakulupu – kae ‘uhinga mo‘oni ‘ae “totongi” koe “siotupu” moe “politiki” fakaUēsite koe “siome‘a” ‘oku fakatokotaha / fakatautaha. ‘Oku ma‘u heni ‘ae “maau moe fenāpasi” he “potupotutatau moe faka‘ofo‘ofa” – kae ‘ikai koe “felekeu moe fepaki” he “potupotukehekehe moe palakū” he funga ‘oe “vākovi, vātau / vālau, mamahi, tuūtāmaki, moe pōpula / hopoate.”

‘Oku hūmaki ‘ae “foaki” moe “takitaki” he politiki ‘oe “tauhivā” moe ‘ikonōmiki ‘oe “faifatongia” fakaTonga[i] ‘oku “fakatatau” he funga ‘oe “fetauhiaki,” “fevahevaheaki,” moe “fetau‘atāinaaki” ke ma‘u ‘ae vālelei / vāmelino, vāfiefia, moe vātau‘atāina ‘oku fakatokolahi / fakakulupu (‘o faitatau mo faikehekehe moe politiki moe ‘ikonōmiki fakaHa‘amoa ‘ae “teulevā” moe “tautua”). ‘Oku hanga ‘ehe “tauhivā” (moe “teulevā”) ‘o “fakafuo” ‘ae “faifatongia” (moe “tautua) ‘oku ne toe hanga ‘o “fakauho” ‘ae “tauhivā” (moe “teulevā) ‘oku “fakasiokitu‘a” koe ‘ofa Ka ‘oku hunuki ‘ae “totongi” moe “politiki” he politiki “temokalati” moe ‘ikonōmiki “kepitalisi” fakaUēsite[ii] he funga ‘oe “fakafe‘au‘auhi,” “fakaehaua,” moe “fakapōpula” / “fakahopoate” ke ma‘u ‘ae koloa moe tupu lahi ‘oku fakatokotaha / fakatautaha ‘oku “fakasiokita” koe ta‘e‘ofa.

‘Oku ho‘ata mai ‘ae “foaki” moe “takitaki” ‘ae politiki moe ‘ikonōmiki fakaTonga he lea heliaki palōveape / poloveape fakapolitiki mo faka‘ikonōmiki fakaTonga mālie mo loloto koe, “Si‘i femolimoli‘i, lahi takitaha kai.” ‘Oku mate fakatoulōua ‘ae “foaki” moe “takitaki” he angafai fakaTonga kihe “fetauhiaki,” “fevahevaheaki,” moe “fetau‘atāinaaki” ‘o ma‘u ‘ae vālelei, melino, fiefia, tu‘umālie, moe tau‘atāina ‘oku fakatokolahi / fakakulupu. ‘Oku fepakitu‘u mo fihitu‘u ‘ae sīpingafai fakaTonga moe “totongi” moe “politiki” he foungafai fakaUēsite ‘o mate fakatoulōua kihe “fe‘au‘auhi,” “fakaehaua, moe “fakapōpula” / “fakahopoate” ke ma‘u ‘ae koloa moe tupu fakatokotaha / fakatautaha koe hala kihe vākovi, vātau / vālau, mamahi, tu‘utāmaki, moe pōpula / hopoate.

‘Oku mahino lelei mai ‘ae “fepaki” / “fehangahangai” ko ‘eni he vā / vaha‘a ‘oe “foaki” moe “takitaki” fakaTonga moe “totongi” moe “politiki” fakaUēsite he ngaahi hopo fakatonutonu fakalao lotolotonga ‘i Tonga he vā / vaha‘a ‘oe kau Fakafofonga Falealea – ‘o hangē koe “fepaki” / “fehangahangai” ‘ae “totongi” moe “politiki” fakaUēsite koe “fe‘au‘auhi,” “fakaehaua,” moe “fakapōpula” he kumi koloa moe tupu lahi fakatokotaha / fakataautaha – moe “foaki” moe “takitaki” fakaTonga koe “fetauhiaki,” “fevahevaheaki,” moe “fetau‘atāinaaki ‘o fakaola he vālelei / vāmelino, vāfiefia, moe vātau‘atāina fakatokolahi / fakakulupu.

‘Oku mā‘uhinga mo‘oni ke “fakatatau” ‘ae “fepaki” / “fehangahangai” ko ‘eni he funga ʻoe tatau moe potupotutatau ke ma‘u ‘ae faka‘ofo‘ofa moe ‘aonga lahi ma‘ae lelei fakalukufua ‘ae fonua ‘ae ‘ātakai moe kakai kota ‘o Tonga. ‘Oku kau kotoa heni ‘ae ngaahi tolu‘i mafai lalahi – ‘o kamata meihe [1] Fa‘ulao moe Falealea kihe [2] Fakamo‘onilao moe Fakatahatokoni kihe [3] Fakahokolao moe Fakamaau‘anga (kae tautautefito kihe Fa‘ulao moe Falealea hono fili ha kakai ‘oku taau mo fe‘uga he koe fatongia mamafa mo faingata‘a, fihitu‘u mo fepakitu‘u). ‘Oku ho‘ata mai meihe [1], [2], [3] koe “faka‘apa‘apa,” “lototō,” “mamahi‘ime‘a,” moe “tauhivā” (vakai kihe Fakava‘e / Fakafutinouti fika [i] ‘ae navei 4 ‘a Kuini Sālote Mafile ‘o Pilolevu Tupou III) moe “‘atakitu‘a,” “fakamaautotonu,” “taliui,” moe “fakamaautotonu” ‘o ‘uhinga kotoa koe “fakalao” kae ‘ikai koe “fakatekinikale” (vakai kihe fika [ii] ‘ae navei 4 ‘oe Pule Lelei / Taki Lelei).

‘Oku toe unga mai ‘ae fakatamaki (crisis) lahi fakaMamanilahi koe liliu matangi / feliuliuaki momoko-māfana, vaivai-mālohi ‘ae matangi (climate change) he ‘atafālahi (fakataha moe mahaki faka‘auha fakaMamanilahi koe Kōviti-19 ‘oku lotolotonga hoko he ‘atafāsi‘i) ‘oku ne ‘akilotoa, kūmoa, mo vaetu‘ua ‘a Mamani fua pē. ‘Oku mā‘uhinga fau ke “fakatatau” / “fakafenāpasi” ‘ae “fakafelavai” pē “fakahoko” moe “fakamāvae” ‘ae fuo moe uho ‘oe ongo ‘ilo (moe poto) tefito fakaTonga tu‘ufonua moe FakaSaienisi fo‘ou he Konisitūtone moe Lao he fakatamaki lotolotonga he vā ‘ae fonua ‘ae ‘ātakai moe kakai.

‘Oku toe kau lahi heni moe ui tokoni SOS meihe ‘oku fai meihe ate hono kumi ha Nōmolo Fo‘ou / Niu Nōmolo (New Normal) he kaha‘u meihe Nōmolo Motu‘a / ‘Olo Mōtolo he kuohili he uhouhonga ‘ae ‘Epinōmolo he lotolotonga hono fakatupu ‘ehe mahaki moe liliu / feliliuaki matangi. ‘Oku mate mai ‘ae ui mo‘ui SOS hono kumi ha Nōmolo Fo‘ou / Niu Nōmolo kihe fakatamaki lotolotonga he vā / vaha‘a he fonua he ‘atakai moe kakai. Neongo ‘oku matapapa / matalahi ‘ae ngaahi founga ka ‘oku mate kotoa mai pē ‘ae faka‘amu moe fiema‘u ke fai ha liliu lahi mo vave meihe politiki teomokalati moe ‘ikonōmiki kepitalisi fakaUēsite ‘oku tefito he “fe‘au‘auhi,” “fakaehaua,” moe “fakapōpula” – kihe politiki “tauhivā” (pē “teulevā) moe ‘ikonōmiki “faifatongia” (pē “tautua”) fakaTonga (pē fakaHa‘amoa) ‘oku tu‘unga he “foaki” moe “takitaki” fakaTonga (pē fakaHa‘amoa) koe “fetauhiaki,” “fevahevaheaki,” moe “fetau‘atāinaaki ‘o fakaola he vālelei / vāmelino, vāfiefia, moe vātau‘atāina fakatokolahi / fakakulupu.

‘Oku makatu‘unga ‘ae mā‘uhinga tefito ‘ae “fakatatau” / “fakafenāpasi” he mo‘oni ta‘ema‘uea ‘oe “tatau” moe “kehekehe” hono fokotu‘utu‘u ‘ae ‘ilo moe poto ‘oe tā-vā pē ‘e taha ‘oe ‘iai ‘oe Māmani pē ‘e taha ‘oku tau nofo kotoa ai. ‘Oku fai ia he funga ‘oe tatau moe potupotutatau kae ma‘u ‘ae mo‘ui moe lelei lahi, fiefia moe melino mo‘oni, ‘ae fonua he vā ‘oe ‘ātakai mo hono kakai. Koe tauhivā moe faifatongia ʻihe funga ʻoe tatau moe potupotutatau ʻoku maʻu ai ʻae vālelei, fiefia, moe tauʻatāina ʻihe vā ʻoe kakai, kāinga, mo e haʻa. Ka, koe tauhifonua moe faifatongia kihe fonua ʻihe funga ʻoe tatau moe potupotutatau ʻoku fisi-ki-tuʻa ai ʻae vālelei, fenāpasi, moe tauʻatāina ʻihe vā ʻoe fonua ‘oe kakai moe ʻātakai ‘i Tonga.  

Fakava‘e / Fakafutinouti

[i] ‘Oku kavei 2 ‘ae angafai tupu‘a / tu‘ufonua fakaTonga koe [1] “tauhivā” moe [II] “faifatongia” kuo tānaki fo ‘ou kiai ‘ae navei 4 ‘e Kunini Sālote Mafile ‘o Pilolevu Tupou III koe [1] faka‘apa‘apa; [II] lototō; [III] mamahi‘ime‘a; moe [IV] tauhivā. ‘Oku ‘alu kotoa ‘ae [I], [II], [III], moe [IV] mei loto-ki-tu‘a.

[ii] ‘Oku kavei / navei 4 ‘ae pule lelei / taki lelei koe [1] ‘atakitu‘a (transparency); [II] fakamaautotonu (justice); [III] taliui (accountability); moe [IV] vahevahetatau / vahevahetaau (equality / equity). ‘Oku polopalema “fakatekinikale” kotoa ‘ae ngaahi liliu ni, [I], [II], [III], moe [IV], neongo ‘oku nau ‘uhinga totonu kotoa koe “fakaKonisitūtone” moe “fakaLao,” pea ‘oku nau ‘alu kotoa mei tu‘a-ki-loto.

ANFF leva e malanga kae a‘u / tau,

‘Ofa atu fau moe ‘ānau ma‘u

Ka tau toki hoko atu .