Taha teu hiva he kakala Featured
TAHA [1] TE U HIVA HE KAKALA
Fatu ‘e Nau Saimone
Taha [1] te u hiva he kakalá
Ua [2] ki he anga hota huá
Tolu [3] kuo motu loutolú
Fā [4] te u fēfē ‘alā
Nima [5] hoto loto ha‘isiá
Ono [6] kuo u ‘osi tukuloló
Fitu [7] fai ā ha‘o siú
Valu [8] ka u fakakaukaú
Hiva [9] te u mate mala‘iá
Hongofulu [10] kuo ‘osi ‘eku tumú
Tahataha [11] kuo ‘ikai te u lavá
Tahaua [12] he manako maka fai ki Tofuá
KO E KI‘I FAKAMATALA NOUNOU
‘Oku ou fakatulou mo e fofonga‘i ta‘anga mālie ‘a e punake ‘iloa ko Nau Saimone ka u fakalavelave ki ha konga si‘i ’ene ta‘anga hiva kakala, “Taha [1] Te U Hiva He Kakala,” ‘a ia ‘oku ngali ma‘ama‘a mo faingofua hono lea ka e matu‘aki mamafa mo fihi hono ‘uhinga. ‘Oku tupu ‘ene mālie mei he’ene ngāue‘aki lelei fakatoulōua ‘a e ongo heliaki fakafetongiaki mo e heliaki fakafekauaki ‘a e to e mamafa mo e fihi ‘ene ta‘anga hiva.
‘Oku ‘ikai ngata he‘ene mamafa, fihi mo mālie ka ‘oku to e fo’ou mo makehe ‘a e ta‘anga hiva “Taha [1] Te U Hiva He Kakala,” ko hono ngāue‘aki ‘e he punake ‘a e lau mata‘ifika mei he mata‘ifika taha [1] ki he mata‘ifika tahaua [12], ‘o hangē tofu pē ko e to e fo‘ou mo makehe ‘a e ta‘anga hiva, “Finemātu‘a ‘Ena Mei Tahi,” ‘o ngāue‘aki lelei ‘e he punake ‘a e lau mata‘itohi mei he mata’itohi ‘Ei [A] ki he mata‘itohi Seti [Z].
‘Oku kupu/veesi 1, kohi/laini 12 – pē kupu/veesi 12, kohi/laini 1 – kotoa ‘a e ta‘anga hiva, ‘a ia ‘oku ta‘etatau honau faka‘osi [rhyme] ka e toki tatau honau faka‘osi takitaha kotoa mo e mata‘ifika takitaha katoa, ‘o to e mālie fau hono potupotutatau. ‘Oku hanga ‘e he ‘ofa ‘o ‘ākilōtoa ‘a e punake, ‘o nofo hopoate ‘i loto he kuohili, lotolotonga mo e kaha‘u mei he kamata‘anga ki he ngata‘anga, ‘a ia ‘oku tele ‘eni he faiva fakaoli.
Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava‘u Academy for Critical Inquiry and Applied Research [VACIAR] &
Tonga International Academy [TIA]
