La‘ā Hopo 'o e Nima e Kuonga ^Featured

Holo e ‘afio ‘a e Vunivalu

Ha‘a Ma‘afu kei molumalu
Mo e ngaahi ha‘a toputapu
Ka e tuku ke u hao ‘i he talamalu
Ke fakae‘a ‘eku laukau
Ko hoku fatongia fakatalutalu
Tukutala mei a Lo‘au

He kuo ngatū ‘a Vava‘u Lahi

Hono piuaki ‘a e ma‘alali
Faleha‘akili ko e fatongia ke talaki
Seuke ko e ta‘au ‘o e taulua tongiaki
Si‘eku ‘ofavale tuku ke u mate ai
Vaolahi uoi ko e ui ke tali
Uho-‘o-Vava‘u te u kelekele‘aki

Sia-ko-Kafoa mo e ‘Alo-ī-Talau
Tala ki Teisina mo Longolongofolau
Liku-‘o-Mototo mo e HalaKulukulu
Ta u kātoa ki Loto Neiafu
Ke fakame’ite mo fakamanatu
Hilifaki kalauni kuo fakama‘u

Tukufakaholo mei he ‘Uluakifā
Fa‘unga melino hota fonua
Kuo ne kātoi mo lukufua
Faa‘i kavei koula ‘eta koloa
Konisitūtone ‘a e kāpasa fononga
Kakala tauleva ki he kilukilua
Pouono ke i tu‘u ko e fakamā‘unga

Hopo e la ‘ā ua ‘o Felenite
Ke i ‘amelali ‘a Moheofo he fohe
Taumu‘a tonu ‘eta siate
‘O fanāfotu ‘i he kolope
‘Isa ko e ta‘au ‘o e Laione Suave
Taulanga ha‘aha‘a Tahi Saute
Kei tu‘uholoaki moto ‘eta talite

Tolu e kuonga mo hono ola
Tonga ke masiva ka e tu‘uloa
Kalo ki he aka ‘o e taufatunga
Tauhivā tumu‘aki e faka‘apa‘apa
Talafakafonua ke fakamatala
Langafonua ‘a fafine e maa‘imoa
‘Otua mo Tonga moto ‘eta sila

Mafoa e ata fā ‘o e kuonga
Ta‘au ‘o e ‘akatēmika mo e vōkāsia
Fakafehokotaki ki tu‘apule‘anga
Politikale ‘ikonōmika hono fāliunga
Si‘ene siutaka ‘o tāmafua
Ha melenga ki si‘ono pununga
Ko e Tonga fo‘ou kuo a‘usia

Ko e fetu‘u hopo he Piliote
Nima e kuonga ‘o ‘ene pule
Sanihaasi ‘isa kuo malave
Faka‘uto‘uta tonu ‘a e Naite
Ke taau mo e fakakolope
Ka e kalofia ‘a e peau ta‘ane
He ākenga kuo toki angakehe

Fakama‘ufatu ‘i Pouono ‘eta talite
Fakafo‘ou‘anga ‘o e kovinānite
‘Ofa ke tu’uloa hokohoko pē
‘A e tōnunga ‘a ‘ene pule
Ka e malave loto ma‘u pē
Kakala tauleva ‘o Felenite

Ko e ngata e si‘i fakahoha‘a
‘Oku ‘ikai tuka e fiefia
‘Ofa kuo me‘ite e ha‘ofanga
Ka u kalo na‘a kainakehea
‘A Lupepa‘u taulanga he vavā
Ī-‘o-Mata‘aho si‘oku ‘ofa‘anga
‘Oua na‘a ngalo au he tālanga
Te u tali hapo ha folofola

Ko e ki‘i fakamatala nounou

Na‘e fakaafo/ fakafasi mo fakahaka ‘a e ta‘anga ni ‘e he punake ko Lata-‘i-Faletanu Vea ko e mokopuna ‘o e punake kakato ‘iloa ko Fakatava na‘e faiva ‘e he kāinga ‘o Fotu ‘o Leimātu‘a he kātoanga hilifaki kalauni ‘o Kingi Siaosi V ‘i Vava‘u Lahi he 2008 ta‘u.

‘Oku ngāue‘aki lelei fakatoulōua ‘e he punake ‘a e heliaki fakafekau‘aki (epiphoric, qualitative heliaki), ‘o hangē ko e ‘Uluakifā mo e Laione Suave, mo e heliaki fakafetongiaki (metaphoric, associative heliaki), ‘o hangē ko e Pouono mo e ḹ-‘o-Mata‘aho.

‘Oku ‘uhinga ‘a e heliaki ki he lea‘aki ‘a e me‘a ‘e taha ka e ‘uhinga ia ki ha me‘a ‘e taha, ‘o hangē ko e ‘Uluakifā mo e Laione Suave ki a Tupou I ko e heliaki fakafetongiaki mo e Pouono mo e ḹ-‘o-Mata‘aho ki he Tukufonua-ki-Langi mo Leimātu‘a ko e heliaki fakafetongiaki.