Fu’u lahi fau ‘a e ‘uha pea kei uesia si'i kakai tokolahi Featured
Hala Matealona 'i Kolofo'ou
3 'Epeleli, 2018. Kuo a’u ‘a e tu’unga ‘o e ‘uha ‘i he fonua ki he mililita ‘e 154 'i hono lipooti 'e he Senitā Fakamatala 'Ea 'a Tonga talu mei he ‘aho ‘aneafi ‘o a’u mai ki he ‘aho ni.
‘Oku uesia lahi foki heni ‘a e ngaahi feitu’u ‘oku ma’olalo ange pea tafea foki ‘o hangē koe ngaahi ‘elia pau ‘i Kolomotu’a, Popua, Ngele’ia pehe ki he konga lahi ‘o Nuku’alofa.
Kuo tokolahi ‘a e kakai kuo hola ki he ngaahi senitā fakahaofi mo’ui (Evacuation Centers) pea ‘oku ongo foki ‘eni tautautefito ki he kakai na’e uesia honau ngaahi nofo’anga ‘i he Saikaolone ko Gita.
Ko e konga ‘o e ngaahi teniti na’e tufa ‘i he tokoni afaa kuo ‘ikai toe malava ke faka’aonga’i makatu’unga he ngāue ‘a e ano.
Fakatatau ki he fakamatala ‘a e taha ‘o e kau nofo ‘i Halaovave na’a ne fakahā ki he ongoongo ni ‘oku fu’u fiema’u ke fakahoko ha ngāue fakavavevave ‘a e Pule’anga ki he faingata’a ‘oku nau tofanga ai.
‘Oku mo’oni koe faingata’a lahi ‘oku tofanga ai ‘a e kainga ko’eni ‘oku uesia honau ngaahi nofo’anga tautautefito ki he tu’unga ‘o e mo’ui lelei.
'Oku mahino foki mei he ngaahi fakamatala 'ea koe hikuhiku 'eni 'o e Saikoloe Ketakoli 1 na'a ne 'ahia 'a Fisi pea ko hono hikuhiku 'eni 'oku hoko ai 'a e 'alotamaki 'uha ko'eni 'i Tonga ni.
