Vakai mei he Tapa'i Laini ki he Ngaahi Feme’a’aki ‘i Fale Alea - Monite & Tusite 15 – 16 Sune 2015 ^Featured

•    Ko e feme’a’aki – na'e ta’emaau, ta’epoini, felekeu pea hee takai holo ‘a e ngaahi fakamalanga lahi ‘o loloa pea e’a mai ‘a e kei ta’emaheni ‘a e kau Fakafofonga he tipeiti, pea pehe ki he Sea ‘o e Komiti Kakato ‘i hono fakalele ‘a e feme’a’aki ka ‘oku mahino pe ia he ‘oku kei fo’ou.

•    To e mahino ange ‘a e ‘ikai ke anga mo maheni ‘a e kau Minisitā he fakalele ‘o e Pule’anga mo e ‘enau ngaahi potungāue. Toe mole ‘a e taimi lahi he ‘enau toe feinga ‘anautolu ke toe kemipeini mo malanga’i ‘enau me’a ‘oku fai, tautautefito ‘eni ki he Minisitā Takimamata Fo’ou ‘Etuate Lavulavu.

•    Mahino ‘a e ki’i ngali ‘ulungaanga ‘afungi ‘a e Minisitā Tanaki Pa’anga he ne toutou ta’ofi mai ‘e Tu’ivakanō he ngaahi ‘aho kimu’a pea pehe ki he Tu’ilakepa he Mōnite he ‘ene fehu’i ‘ana ki he Minisitā Poasi Tei ka e tali mai ia ‘e Minisitā Lavemaau. ‘Oku tonu ke fakasi’isi’i e ‘oho mu’a ‘a e Minisitā ni tokua ‘oku ne ‘ilo ‘a e me’a kotoa he ngaahi potungāue ka e longo ‘a e kau Minisitā ia ‘anautolu ‘enau ngaahi potungāue he ‘oku ‘ata kaaimu’a mai ia ki he kakai.

•    Fakapolofesinale mo mokomoko ‘aupito ‘a Poasi Tei hono fakamatala’i ‘ene Vouti neongo ‘a e loloa ‘a hono fokifokihi ‘e ne pootifolio.

•    Ko e Tu’iha’ateiho – fu’u mama’o ‘aupito mo ta’epoini ‘e ne fa’a me’a. ‘Oku fa’a lelei ma'u pe kete molumalu tangutu ke malu’i pe kita moe tu’unga.

•    Ko e Palēmia – ko e fo’i mahafu pe ‘e 2 ‘oku ne ma’u – ko e kole fakamolemole, mo e talamai ke tukuange ha nau faingamalie he ‘oku nau kei fo’ou ki he fakalele Pule’anga pea ke toki fehu’i ange ‘a e me’a tatau ha hili ha ta’u ‘e taha mei he ‘aho ni. Kuo tau hoha’a’ia he ‘ene toutou fakamatala mo ‘ene kau kanititeiti PTOA he taimi kemipeini (tautautefito ki he poto ko ‘Anisi) kuo ‘osi maau ‘enau policy he me’a kotoa pea ka nau hū ‘o Pule’anga, ko ‘enau tu’uta pe ‘o fai ‘a e ngaahi liliu.

Ko e ‘osi ‘eni ‘a e mahina ‘e 6 mo e fiu ‘a e kakai ’o e fonua he tali ka e talamai ko ‘enau toki kamata pea ke ‘oange ha nau toe faingamalie. ‘Oku mahino ia oku ‘ikai ke nau ‘ilo ‘enautolu ‘a e me’a ke fai, pea nau kei fakafalala pe ki he kau CEO mo e kau ngāue fakapule’anga ke fa’u mai mo fakahoko ‘a e ngaahi policy ngāue ia ma’ae pule’anga. ‘Oku ‘ikai ko ha’a nau policy ngāue ia ‘anautolu PTOA.

Na’e palōmesi ‘e he Palēmia mo e PTOA ka nau pule’anga ‘e tukuhifo ‘a e tute, ‘uhila & vai ‘aki ha 15%. Ka ko e fo’i loi mata’a’a kotoa ‘eni he ‘oku to e hiki ‘a e tute, laiseni mo e ngaahi totongi kehekehe he ‘uluaki patiseti ‘a e Pule’anga. Ko e hā ku o longo ai ‘a e Palēmia, Minisitā Pa’anga, kau Minisitā PTOA, ‘Anisi mo e kau poto ne nau kemipeini ‘aki ‘a e me’a ko ‘eni?. ‘E lava ke faka’ilo faka-Fale Alea kinautolu ki he palōmesi loi ki he kakai ‘o e fonua – pe ko e tohoaki he fili falealea ne toki ‘osi?. Ko e taha ‘eni ‘o e ngaahi hia faihala (corruption) ‘oku taukave’i ‘e he Palēmia mo ‘ene PTOA ke tuku?.

•    Ne ta’ofi mai ‘ehe Sea ‘o e Komiti Kakato (Semisi Sika) ‘a e taimi malanga ‘a Pohiva Tu’i’onetoa ka e lea fefeka atu ‘a e Palēmia ia ke hoko atu pe ia he ‘oku mahu’inga ke lea. Pea longo ai pe ‘a e Sea ia ‘o ‘ikai ke toe lea atu.  Ko e me’a fakaloloma ‘eni, he ne ‘ikai ‘ilo ‘e he Palēmia hono ngata’anga pea ‘ikai ‘ilo ‘e Semisi Sika hono mafai. Ko e Ongo Sea (Fale Alea & Komiti Kakato) ko e ongo ‘Eiki ia he Fale Alea - ‘o ‘ikai ha mafai ‘e taha ‘o e Palēmia ke ne fai tu’utu’uni ki he Sea. Ko e anga ta’e faka’apa’apa ‘eni ‘a e Palēmia ki he molumalu ‘o e Fale Alea.

•    Fu’u mahino ‘a e feinga ‘a e kau Fakafofonga ke fakapolitikale’i ‘a e pa’anga ‘oku ‘ave ki he Pangikē Fakalakalaka. Ka ‘e mate ‘a e Pangikē ka fakapolitikale’i ‘ene taumu’a mo founga ngāue pea ko e pa’anga ko ‘eni ‘oku ‘oatu ‘e he Pule’anga ki he Pangikē ko e tanaki mo noo mei he kakai ‘o e fonua. Fiema’u ke tuku ‘a e fakapolitikale’i ‘a e pa’anga ‘a e fonua he te tau toe mate ai pe – he ’e feinga ‘a e kau ngoue kotoa ke ‘oua ‘e toe totongi ‘a e pa’anga ko ‘eni he ‘oku ‘ikai ko ho nau kakava. ‘Oku hā mai ia he ngaahi fakamalanga ke fakamolemole’i mo hoko atu ‘a e ‘ave ‘a e pa’anga ki he kau uta hina neongo ‘oku kei to e ‘a e laui kilu ke totongi mei ho nau ngaahi mo’ua mei he ta’u kuo ‘osi.

•    Ko e Minisitā Takimamata (Lavulavu) ‘oku ‘ikai fakangatangata ‘a e misi mo e lea taukakapa. Kole atu kia Lavulavu ke fakafuofua pē ki ho tau ivi he ‘oku ikai ha tau keli’anga koula pe ma’u’anga pa’anga ke fakahoko ‘aki ‘a e ngaahi fu’u misi fakavalevale ko ‘eni, kau ai ‘a e palōmesi ke langa hotele ‘i Ha’apai, ‘Eua & Vava’u, ngaahi hala fakakavakava, mo e hā fua. ‘E lava fēfē ke fakahoko ‘a e ngaahi fu’u misi ko ‘eni lolotonga ko ia ‘oku tau peko ki Siaina mo Siapani ke tokoni mai ki he Sipoti Pasifiki ‘aki ‘a e meimei $140 miliona nai?

•    Ne fakamamafa’i ‘e he kau Fakafofonga ‘e n’ihi ‘a e fiema’u ke tupu ‘a e folau ‘eve’eva – ‘o tupu fefe kapau ‘oku toe tanaki atu ‘a e $100 (‘o $165 fakakatoa) ‘a e ngaahi totongi ki he tikite vakapuna?. ‘E faka’ofa ‘a e Takimamata ia pea ‘e holo, he ‘e ‘alu ‘a e kau folau ‘eve’eva ia ki he ngaahi fonua ‘oku ma’ama’a ange.

•    Ko e kau tipeiti Lelei taha ‘oku kau ki ai ‘a Nuku mo e Tu’ilakepa – mahino mo tauhi ki he poini pea ‘ilonga ‘ena maheni he ngāue faka-Fale Alea. Fiema’u ke fai ha tokoni ki he founga me’a ‘a e Tu’iha’ateiho he ‘oku ta’e ’uhinga he taimi lahi. ‘Oku fiema’u ‘a e tokoni tatau kia Lavulavu.

•    Mahu’inga ‘a e lipooti mai ‘e Mateni ‘a e tila faito’o konatapu ‘a e kau Polisi Ma’olunga. Fu’u fakailifia ‘aupito ko he kakai ‘o e fonua kapau ko e mo’oni ‘eni.  

•    Fu’u lahi a e ngāue’aki a e lea fakapapalangi ‘e he ni’ihi pea oku tapu ‘eni ‘i he Ngaahi Tu’utu’uni ‘a e Fale Alea, ka oku ‘ikai tokanga ‘a e Sea ke ta’ofi – ko kinautolu ‘oku lahi ‘enau ngāue ‘aki ‘a e lea fakapapalangi ko e Tu’iha’ateiho, pea kau atu mo e kau Minisitā ‘e ni’ihi. Kole atu ki he kau Fakafofonga ke mou lea faka-tonga he taimi kotoa ka e tuku e inu tī inu kota.

•    Ne ‘eke ‘e he Tu’iha’ateiho ki he Fakafofonga Ha’apai 12 ‘a e hingoa ‘a e hala ‘i Hawaii. Ko e ma’u ki ai ko e hala ko ‘eni ko e fo’i kapekape mamafa he lea faka-Tonga. Kapau koia, ko e hā ha poa ‘a e Nopele kapau na’e tali mai ‘e he Fakafofonga ‘a e hingoa kapekape kovi lahi ko ‘eni ‘o fanongo ki ai ‘a e kakai ‘o e fonua. Ki he Tu’iha’ateiho – kole fakamolemole pea ‘ai ke ngali ko e Nopele tauhi kakai ko e – ko e me’a matu’aki ma’ulalo ‘aupito ‘eni, pea kuo kamata ke talanga’i ‘i he Facebook he ‘e kakai ‘oku nau nofo Hawaii mo muli ‘oku nau ‘ilo ‘a e hala ne ‘eke ‘e he Tu’iha’ateiho.

•    Ne pehe ‘e he kau Fakafofonga ‘e ni’ihi ne maumau’i ‘e he Palēmia mo e Kapineti ‘a e Lao he ’enau ‘uluaki ‘ave kia Lavulavu ‘a e Potungāue Takimamata ‘oku te’eki ke paasi e lao ke fakamavahe’i ‘a e Potungāue Takimamata mei he Potungāue Fefakatau’aki & Leipa. Ko e fakamole lahi mo’oni ‘eni he ko e Takimamata ne ‘osi hoko ko e Potungāue tu’u taha pe ‘iate ia pe, pea liliu ‘e Tu’ivakanō ‘o fakapipiki ki he Labour & Commerce, pea tamate’i ‘a e tuunga CEO he Potungāue Takimamata ka ko ‘eni ‘oku toe foki ki he founga motu’a.

‘Oku toutou kole ‘a Akilisi ke tukuange ha ta’u ‘e taha ke fai ai ‘enau liliu kehekehe ka ko e ha kuo lava ai pe ke hiki ‘a e Potungāue Takimamata kia Lavulavu he taimi matu’aki nounou mo’oni?. Ko hono mo’oni, ko e me’a pe ‘oku loto ki ai ‘a e Palēmia mo e Kapineti ke fai pea fai leva ia he taimi pe koia – ka e tali mo kole taimi ki he ngaahi liliu kehe ‘oku ‘ikai kenau fu’u mafana ki ai.

•    Ne tala ‘e Lavulavu ‘oku ‘ikai kau ia he ‘Apiako Unuaki ‘o Tonga he ko e me’a ia hono mali – ko e fo’i vaipalo taufua ‘eni ‘e taha – ‘oku pipiki ‘a Lavu mo hono mali he ‘aho mo e pō kotoa ko e sino pe taha he kuo na fuakava ki ai, pea tala ‘e ia ‘oku na kehekehe he a’u ki he ‘apiako. Kole atu kia Lavulavu – ‘oku ‘ikai ke mau vale. ‘Oku ‘osi fakahā fakapule’anga pea ha he ngaahi lipooti ‘a e Falealea ne ‘osi totongi atu ‘e he Pule’anga ‘a e $500,000 tupu ki he Apiako ‘Unuaki ‘o Tonga he kuo hili, pea ‘oku totongi ‘e he Pule’anga ‘a e $1,200 ki he tamasi’i ako tekinikale kotoa pe, pea ka tali ‘a e toko 400 ‘oku pehe ‘oku lesisita he ‘apiako ‘a Lavu & Sita tena ma’u mokomoko ‘a e $480,000 mei he pule’anga.

Ko e hā ‘a e me’a ‘oku fai ‘aki ‘a e ngaahi fu’u pa’anga ko ‘eni? Ko e fehu’i ki he Pule’anga – ‘oku anga feefee ke ma’u ha’a taha private ha pa’anga mokomoko pehe mei he ivi mo e kakava ‘o e kakai ‘o e fonua?  

•    Ne ha he me’a ‘a e Fakafofonga ‘e taha (Nuku?) ‘oku lekooti ‘a e Pule’anga fo’ou ‘o Akilisi he lahi a e Tohi Tangi – mahalo ko e 7 - 9 ‘eni a e tohi tangi ‘o fakamo’oni ki ai ‘a e toko 10,000 tupu (kau ki ai a e Tohi Tangi ki he CEDAW) he mahina pe ‘eni ‘e 5. Malie he ko e Pule’anga ‘eni ne tala ko e “Pule’anga ‘o e Kakai” – ka ku o tohi tangi mo fakahāhāloto ‘a e kakai ia he fa’ahinga taki ‘a e Palēmia mo hono Pule’anga.

•    Fokotu’u ‘e Vuna ke fai ‘aki pe ‘a e fakatapu he kamata’anga ‘o e ‘aho ‘e he Sea pea ‘oua ‘e toe fai ha fakatapu ia he feme’a’aki ‘a e kau Fakafofonga he lolotonga ‘a e ‘aho. Ko e lea mo e fakakaukau ma’ulalo mo’oni ‘eni – ke fale’i mai mei he Minisitā Lao ke fakasi’isi’i’ia ‘a e taha ‘o e poutuliki fefeka taha ‘a ho tau Tukufakaholo - koe Faka’apa’apa.  Ko e Minisitā tatau pe ‘eni na’a ne fokotu’u ke fakatau ‘a e koloa sikaleti ne hū mai ki he fonua ta’e fakalao ke tau’i’aki ‘a e faihala (Talaki – 16/6/15) pea ‘ikai ko ha me’a kovi ke inuinu pe he ‘ofisi mo e kau ngāue (ne ha ‘eni he taha ‘o e ngaahi nusipepa kimu’a).

Ko hono lea ‘oku taha pe….ta’engali pea ‘oku mau kole atu ki he kakai ‘o e Vahenga Tongatapu 7 ke mo u fai he vave taha ha ngāue fakamisinale ki ho’omou Fakafofonga ….he ko moutolu pe foki.

Teu toki hoko atu..