Kau mai 'a Melefifita ‘Alovili 'o Pilisipeini ki he fe‘auhi Miss Heilala 2019 Featured
Melefifita Percilla Jane ‘Alovili
11 Sune, 2019. ‘E kau atu ‘a e finemui Tonga nofo Pilisipeini ko Melefifita Percilla Jane ‘Alovili, ‘a ia na‘a ne fokotu‘utu‘u ‘a e ‘api kole hūfanga koia ko e ‘Alovili Home, ‘i he fe‘auhi fili hoihoifua koia ‘a Tonga´ “Miss Heilala” ki he ta‘u´ ni 2019.
Na‘e fuofua fokotu‘utu‘u ‘a e ‘Alovili Home ‘e Melefifita ‘i he ‘aho 15 Mē 2018 ‘aki ‘a e taumu‘a´ ke hakeaki‘i ‘a e tokanga koia ‘a e kakai mei he ngaahi matakali ‘o e Pasifiki´ ‘oku nau nofo ‘aunofo mai ki ‘Aositelēlia´ ni ki he mahu‘inga ‘o e mo‘ui lelei faka‘atamai´ pea
pehē ki hono ta‘ofi ‘o e taonakita ‘i he sōsaieti ‘o ‘Aositelēlia.
Na‘e kau foki ‘a e fononga ‘a Melefifita ‘i he mamahi mo e faingata‘a lahi, ka kuo hoko ‘ene talaloto´ ko ha fakalotolahi pea mo e tokoni lahi ma‘ae kakai tokolahi ‘aupito, kae tautautefito kiate kinautolu koia kuo nau fou atu ‘i he faingata‘a ko‘eni´.
Ko e moto ‘o e ‘Alovili Home “ko e ‘ofa´ ‘oku hala ha fakangatangata, pea ko‘etau taufatungamotu‘a koia ‘a Tonga´ ‘oku ne hukitonu ‘a e fakalakalaka´”.
‘Oku fa‘a ma‘u mai ‘e he ‘Alovili Home ‘a e faka‘eke‘eke nai ‘e 5 he ‘aho kotoa pē. ‘Oku fai fatongia foki ‘a e ‘Alovili Home ‘o houa ‘e 24 pea ‘oku nau fakahoko ‘a e ngaahi fetu‘utaki kotoa pē ki he ngaahi kautaha ngāue‘ofa ‘i Aositelēlia.
Kuo‘osi kau atu mo Melefifita ki he fe‘auhi talavou koia ko e Miss Tonga Australia ‘i he ta‘u´ni pea ko hono faka‘amu´ ke ne fakafofonga‘i ‘a Pilisipeini ‘i he Fe‘auhi Hoihoifua koia ko e Miss Heilala ‘i Nuku‘alofa ‘i Siulai´.
Na‘e pehē ‘e Melefifita “ ‘Oku hounga‘ia mo‘oni ‘a e finemotu‘a´ ni ke ma‘u ‘a e faingamālie ko‘eni´ ke fakamafola ‘eku fekau ‘o e ‘amanaki lelei´ mo ha le‘o ma‘anautolu koia ‘oku hala ha le‘o´ pea pehē ki hono ako‘i hotau kakai´ felāve‘i mo e ngaahi kaveinga pelepelengesi
ko‘eni´.”
“Ko‘emau vīsone´ pea mo‘emau taumu‘a ki he ka ha‘u koia ‘o e ‘Alovili Home, ke ako‘i hotau kāinga ‘i heni mo muli foki, ke kamata‘aki ‘a e ngaahi timi´ ke ‘ave ‘emau fekau ki he ngaahi ‘apinofo‘anga hotau kakai Pasifiki´, ‘a ia ko e ‘uluaki konga´ ia ‘oku mau tokanga ki ai´ ki
mu‘a pea mau hoko atu ki he ngaahi taumu‘a kehe´,” ko e lau ia ‘a Melefifita.
Ko e fe‘auhi fili hoihoifua koia ‘a e Miss Heilala ko e konga´ ia ‘o e ngaahi polokalama ‘a e Uike Heilala ‘i Tonga´, ‘a ia ‘oku lele faka‘angataha mo hono kātoanga‘i ‘o e 60 ta‘u koia ‘o e Hau ‘o e ‘Otu Tonga´ ko ‘Ene ‘Āfio Tupou VI.
- Brisbane Tongan Community
