Makamaile Ma'a Tonga: Tali 'e he Pule'anga ke Fakamo'oni Aofangatuku 'a Tonga ki he Konivesio CEDAW ^Featured

Na’e ‘oatu foki kimu’a ‘i he kolomu Lau ‘a e ‘Etita ‘i he paenga ni ‘a e puipuitu’a ‘o e konivesio ko’eni (CEDAW) ‘a ia kuo tali lelei ‘e he Kapineti ke fakamo’oni tuku kiai ‘a Tonga.

Ko e ongoongo fakafiefia lahi ‘eni ki he kakai fefine ‘o e fonua pea koe maka maile foki ki Tonga he kuo fuoloa ta’u hono toutou ‘ohake ‘o e kaveinga ni pea ko hono toki fakapapau’i mo’oni ‘eni kuo papau e taimi ke kaunga kau atu ai ‘a e fonua mo e toenga ‘o e ngaahi fonua lahi ‘o mamani ‘i hono poupou’i faka’ofisiale ‘a e kaveinga ni.

Fakatatau ki ha me’a ‘a e ‘Eiki Palemia ‘i hano tuku mai ‘e he ongoongo ‘a e ‘Ofisi ‘o e Palemia, na’a ne me’a ‘o pehe koe ‘aho fakahisitolia ‘eni ki Tonga pea ‘oku totonu ke laukau ai ‘a e Tonga kotoa he kuo tau kau fakataha atu mo e ngaahi fonua ‘o mamani ki hono fakangata ‘a e ngaahi fakaehaua ki he kakai fefine.

Na’e hoko foki hono tali ‘e he Kapineti ke fakamo’oni ‘a Tonga ki he Konivesio ko’eni ‘i he efiafi tatau ‘a ia na’e fakamanatu ai ‘a e ta’u ‘e 20 hono “Talaki Fakamamani lahi ‘i Peisingi, Siaina ‘a e Makatu’unga Fakangaue” (“Beijing Declaration and Platform for Action”) ‘i he Konifelenisi hono 4 ‘a e kakai fefine ‘a mamani ‘a ia na’e fakafofonga’i atu ai ‘a Tonga ni ki ai ‘e he Ta’ahine Kuini Fehuhu Kuini Halaevalu Mata’aho ‘i ta’u 1995.

Na’e me’a ‘a e ‘Eiki Palemia ‘o pehe koe fakamo’oni ko’eni ‘a Tonga ki he Konivesio  CEDAW ko’eni ‘oku ne tui koe taha’i me’a’ofa fungani ia ki he Ta’ahine Kuini Fehuhu ‘i he’ene maa’imoa mateaki ki hono taukave’i ‘a e malu mo e lelei ‘a e kakai fefine ‘o e fonua he ta’u lahi.

‘Oku ‘i ai foki ‘a e ngaahi kaveinga mahu’inga ‘oku tu’u ngali fehangahangai ai ‘a e Konivesio ko ‘eni mo ‘etau Konisitutone pe he ki he ngaahi totonu faka tukufakaholo ka ‘oku fakahoko pe ‘a e ngaue ki ai ‘o fakatatau ki he ngaahi fakamatala kuo tuku mai mei he Pule’anga.