'Oku fiema'u ke fakamatapule pe 'a e feme'a'aki 'i he Fale Alea

Tangata'eiki,

'Oku ou faka'apa'apa ka e fakahoko atu 'a e 'eku tohi mo e tomu'a fakatapu atu pe kia Hou'eiki pehe ki he kakai 'o e fonua.

'Oku 'ou manako ke fanongo ki he ngaahi feme'a'aki 'i he Fale Alea 'o Tonga pea 'oku 'i ai 'a e me'a 'oku ou fakatokanga'i 'i he kamata mai pe 'a e Fale Alea 'i he ta'u ni.

'Oku kehe 'eni ia mei he ta'u 2022 pea 'oku mahino mai kiate au koe hu ha me'a fo'ou 'e 'uhinga pe ia kapau 'oku toe tanaki atu ha kau memipa fo'ou ki he Fale Alea.

'Oku 'ikai ke puli ia 'i he motu'a ni 'oku kehekehe pe 'a e anga 'etau sio mo faka'uhinga'i 'a e ngaahi me'a ka kiate au mo 'eku fakakaukau tau'ataina 'oku 'asi 'a e natu'a ta'e faka'apa'apa lahi 'i he founga 'o e tipeiti 'i he Fale.

'Oku 'ikai ke ngata 'i he ngaahi lea ta'efe'unga 'oku fakahoko ka 'oku kau ai mo e ngaahi lea tukuhifo, tukuaki'i 'ikai ha fakamo'oni, kaikaila mo e fakafekiki 'ikai ha makatu'unga.

'Oku fanongo pe 'a e kakai 'o e fonua pea 'oku 'ikai 'uhinga ia teke toki ako 'univesiti pea teke toki mahino'i ka 'oku mahino lelei pe ki he taha kotoa 'a e longoa'a noa'ia 'ikai ha poini pea mo e kaikaila tokua 'oku 'ikai ke ufi pe ilifia pea 'oku mahino ngofua.

Na'a tau 'amanaki pe kuo tau mavahe atu mei he kuonga koia 'o e moli Tonga ka ko'eni kuo 'i ai 'a e kau 'eti faiva fo'ou kuo hopo hake ki he siteisi.

'Oku lava lelei pe 'a e fakaanga 'i he founga fakamatapule pea 'uhinga lelei pea ifo mo vovo ki he faonongo he 'oku kei Tonga pe 'a Tonga.

Faka'apa'apa Atu,

Pangoi'a

Nuku'alofa