Maumau 'a e faka'ofo'ofa Hala Vuna ngaue 'a e kau fakamaketi Featured
‘Oku ou faka’amu ke pulusi mai mu’a ‘a e fakakaukau ko’eni fekau’aki mo e tu’unga ‘oku ‘i ai ‘a e matamata lelei ‘a e Hala Vuna mo hono uesia ‘e he kau fakamaketi ‘oku nau fakapalakuu’i (hufanga he fakatapu) ‘a e faka’ofo’ofa ‘o e feitu’u ni mo hono manakoa ‘e he kau folau’eve’eva. ‘Oku ou faka’apa’apa lahi ki he kakai ko’eni pehe ki he kau ngoue ‘o e fonua ka ‘oku ‘osi teu ‘e he Pule’anga ‘a e maketi hange koe Maketi Talamahu ke ‘ave kiai ‘a e fua ‘o e fonua. ‘Ikai ngata ai ka na’e toe tanu ‘e he Potungaue Ngoue mo e Potungaue Takimamata mo e Leipa ‘i he konga ki mui ‘o e ta’u kuo’osi 2014 ‘a e konga ‘i he tofi’a ‘o Fakafanua hanga hake pe ki he Hala Vuna kenau hiki kiai mo e ‘ikai pe.
‘Oku ou fakame’apango’ia he kakai ko’eni ‘i he‘enau vilitaki ke tu’u honau loto kae ‘ikai kenau sio loloa ki he ngaahi lelei ma’ae fonua fakalukufua. ‘Oku mahino mai pe foki koe konga lahi ‘o e pa’anga ‘oku ma’u ‘e he fonua ni ‘oku ha’u mei he Takimamata mo e Folau’eve’eva pea ‘oku fehu’ia lahi ‘a hono maumau’i ‘a e konga faka’ofo’ofa taha ‘o e fonua ‘e he tokosi’i kae maumau ai ‘a e tafa’aki ’oku ne ‘omai ‘a e laui miliona ma’ae fonua. ‘Oku ou lau ‘eau ‘eni koe siokita pea ‘oku nau tangi mo feinga ke faka’ofa’ia ‘a e Pule’anga ‘iate kinautolu kae maumau ai ‘a e me’a lahi. ‘I he tafa’aki ‘e taha, ‘oku ‘ikai ke fea (fair), totonu mo taau ‘eni 'oku faka'ofa mo hela'ia si'i kau ngoue mo e kau ngaue fakamea’a tokolahi he totongi fute he Maketi Talamahu mo tauhi e Lao 'o e fonua kae omai e ni'ihi ko'eni ‘o maumau lao mo fa’iteliha he mata ‘o e fonua.
‘Oku faka’ofo’ofa pe ‘a e faka maketi ia he ngaahi ‘elia kehe hange ko Fanga pehe ki he ve’ehala hange koia ‘oku tau anga maheni kiai ka ‘oku fai e hoha’a lahi ki he ‘elia ‘oku mata’aki ‘e he fonua he kuo kamata ke palaku mo vevea ‘o ‘ikai hoa mo e faka’amu faka Takimamata ‘a e fonua. ‘Ikai ngata ai ka ‘oku ‘ikai ha falemalolo ke ngaue’aki pea ‘oku fepaki ‘eni moe tu’unga mo’ui lelei ‘a e fonua. ‘Oku toe fihitu’u foki moe fefononga’aki he taimi lahi he ‘oku kau foki ‘a e Hala Vuna he hala mahu’inga ki he fefonoa’aki pea toe mo’umo’ua foki.
‘Oku cu fakatokanga’i ‘oku ‘i ai ‘a e Uooti he taha ‘o e ngaahi Uooti ‘a e Siasi ‘O Sisu Kalaisi & Kau Ma’oni’oni He Ngaahi ‘Ako Kimui ni ‘i Nuku’alofa ‘oku nau fakama’a ma’u pe ‘a e konga ‘o e Hala Vuna ‘a ia koe ‘elia ‘eni ‘oku hanga hifo ki he ‘Ofisi ‘Amipasitoa Siaina ‘o a’u ki he ‘elia hanga hifo ki he Kalapu ‘Iote motu’a. ‘Oku fakamalo’ia ‘a e ngaue mateaki mo ‘ofa fonua ‘a e si’i kainga lotu ko’eni ka ‘oku hange ha laku maka fai ki moana he koe hili pe ‘enau fakama’a kuo halakaka mai ‘a e ngaahi loli moe me’a lele ‘a e kau fakamaketi ‘o ‘ikai ngata ‘i hono maumau’i ‘a e musie mo ‘ene toka lelei ka koe toe faka veve foki. ‘Oku ‘i ai moe hoha’a he ‘e a’u mai ki loto Nuku’alofa mo Palasi ‘a e fakamaketi.
‘Oku ou fakamolemole heni ki he kau faka maketi pea ‘oku ou ongo’i ‘a e feinga koe ‘uhinga koe famili mo e ngaahi kavenga ‘a e lotu moe fonua ka ‘oku ou loto pe ‘oatu ma’a pe ‘a e fakakaukau ni telia ‘a e lelei hotau ki’i fonua ni. ‘Oku ‘i ai ‘a e faka’amu ‘e ngaue leva ‘a e Pule’anga pehe ki he ngaahi Potungaue fekau’aki ki heni ‘oku lolotonga monuka e lao e fonua he me’a ni. ‘Oku mahulu atu ‘a e faka’amu ke kei manakoa hotau ki’i fonua ni ‘e he Folau’eve’eva.
Faka’apa’apa Atu,
Tonga Ko e Siueli ‘o e Pasifiki
