Fokotu'u 'a Dr. Saia Piukala ki he lakanga Talekita Fakavahenga WHO
Hon. Dr. Saia Ma'u Piukala mo e 'EIki Palemia 'o Tonga Hon. Hu'akavameiliku
18 'Okatopa, 2023. Ko e makamaile ia ma'a Tonga pea fakahisitolia 'a hono fokotu'u 'o Dr. Saia Ma'u Piukala ki he lakanga koe Talekita Fakavehenga ki he Uesite 'o e Pasifiki 'i he Kautaha Mo'ui 'a Mamani (World Health Organization Western Pacific Region).
Ko hono fokotu'u 'eni 'o Dr. Piukala lolotonga 'a e Sesoni hono 74 'a e World Health Organization Western Pacific Region 'a ia na'e fakahoko ki Manila 'i Filipaini 'i he mahina ni.
Ko e tu'unga ma'olunga foki 'eni pea na'e tokolahi 'a e kau Kanititeiti na'a nau veipa ki he lakanga ni ka koe fakakoloa ia ki Tonga 'a e a'usia 'e ha taha 'o e Hou'eiki Memipa 'o e Kapineti 'a 'Ene 'Afio 'a e fakatongia mafatukituki ko'eni pea ko e fakakoloa ia ki Tonga kotoa.
'Oku mahino mai foki mei he ongoongo kuo tuku mai mei he 'ulu'i 'Ofisi fakavahenga 'o e WHO 'i Manila 'e fakahoko atu hono fokotu'u 'o Dr. Piukala ki he Poate Fakahoko Ngaue 'a e WHO ke fakahoko leva hono fakanofo pea 'oku 'amanaki ke kamata ngaue 'i he fatongia fo'ou ko'eni 'a Dr. Piukala 'i he 'aho 24 'o Fepueli 2024.
Ko e mole 'eni ki he Pule'anga ka koe tapuaki ia ki Tonga kotoa he 'oku mahino 'e ava mai ai 'a e matapa ia ki he fonua 'i he fakalakalaka ki he mo'ui.
'I ha fakamatala kuo tuku mai 'e Dr. Piukala ki he ongoongo ni ko e fatongia ni ko e tali lotu ia 'a e 'Eiki ma'a Tonga pea 'oku ne laukau 'aki hono Tonga kene fakafofonga 'a Tupou mo e fonua 'i he fatongia ni.
