Fakataha ‘a e Komiti Fakafonua ki he Pule’i ‘o e Me’a Fakafokifa ^Featured

Na’e fakaha ‘e he Pule Ngaue ‘a e Potungaue Mo’ui Toketa Siale ‘Akau’ola ko e fakamatala fakamuimui taha ki he tu’unga ‘oku ‘i ai ‘a e ni’ihi na’e kolonitini, ko e toko 89 ‘oku kei fai hono tokangaekina.

Ko e toko ua ai ‘oku na ‘i he Kemi Taliai, pea ko e toenga ‘oku nau kolonitini pe ‘i honau takitaha ‘api.

“‘Oku nau ‘i he tu’unga fakafiemalie pe, ‘o ‘ikai ke ‘i ai ha taha ‘e puke, pea ‘oku vakai’i faka’aho pe kinautolu ‘e he kau ngaue ‘a e Potungaue Mo’ui.”

Na’a ne pehe ko e tokolahi taha ‘o e kinautolu ‘oku kei kolonitini ‘e kakato ‘a e ‘aho 14 ‘enau kolonitini ‘i he uike ni.

‘I he fakamatala ‘a e Komisiona Polisi Stephen Caldwell na’e ‘osi puke ‘a e ni’ihi ‘i Tongatapu ni, Vava’u pea mo ‘Eua ko e talangata’a ki he tu’utu’uni ‘o e fakataputapui.

Na’a ne fakaha foki kuo ‘osi ‘i ai mo e peesi facebook ‘a e Potungaue Polisi ke fakamanatu ki he kakai ‘o e fonua ‘a e ngaahi tu’utu’uni ‘o e fakataputapui pea mo fakafaingamalie’i ‘a e fetu’utaki mo tali foki mo e ngaahi fehu’i mei he kakai ‘o e fonua.

Na’e ‘ohake foki ‘i he fakataha ‘e he Sea Hon. Tei ‘a e finangalo ‘a ‘Ene ‘Afio Tama Tu’i Tupou VI ke fakalahi ‘a e kautaha ngaahi ’anga koa mo e me’a malu’i (mask).

Na’e pehe ‘e he Minisita Mo’ui na’e ‘osi fakahu ange ‘a e palani ngaue ‘a e kulupu kakai fefine ki hono ngaohi ‘o e mask fakataha mo e sample, ka ‘oku fai pe ‘a e sio ke a’usia ‘a e tu’utu’uni ngaue ‘a e Kautaha Mo’ui ‘a Mamani fekau’aki mo e mask.

Na’e fakamalo’ia foki ‘e Hon. Tei ‘a e ngaue mo e poupou kuo fakahoko mai mei he ‘Ene ‘Afio mo hono fale pea na’a ne fakamalo’ia ai pe mo e ngaue lahi kuo fakahoko ‘e he Potungaue Polisi mo e Kau Tau ‘A ‘Ene ‘Afio ka e pehe ki he ngaahi kupu fekau’aki ‘i he ngaue lahi kuo fakahoko lolotonga ‘a e fakataputapui fakafonua.

- MEIDECC