Tali ‘e he Fakataha Tokoni ke toe fakalōlōa Konituleki ‘a e Komisiona Polisi Featured
Komisiona Polisi 'a Tonga Stephen Caldwell
16 'Epeleli, 2018. Kuo tali ‘e he Fakataha Tokoni 'a 'Ene 'Afio Tupou VI ‘i he uike kuo tau situ'a kiai ke toe fakalōlōa ‘a e Konituleki ‘a e Komisiona Polisi Stephen Caldwell ‘i ha toe ta’u ‘e 2 makehe.
Ko Stephen Caldwell na’e ui ia ki he lakanga ni ‘i ‘Epeleli 2015 pea ‘oku ‘amanaki ke kakato ‘a e ta’u ‘e 3 ‘ene fakahoko fatongia ‘i he mahina ni.
'Oku hā mahino pe 'i he Konituleki 'a Caldwell 'a e totonu ke toe fakaloloa pe fakangata 'a 'ene Konituleki 'a ia 'oku nofo 'a e mafai koia 'i he Penolo ki he Fili mo Fakamalolo'i (Judicial Appointments and Discipline Panel) 'a ia 'oku malumalu 'i he Fakataha Tokoni
Ko hono toe fakalōlōa ko’eni ‘a e Konituleki ‘a Caldwell ‘e toki ‘osi ‘ene fakahoko fatongia ki he mahina ko ‘Epeleli ‘o e ta’u 2020.
Na’e ‘ohake foki ‘e he Minisitā Polisi Mateni Tapueluelu ‘ene ta’efiemalie fekau’aki mo e kaveinga ni ka ko’eni kuo mahino mai ‘'eni 'e toe hoko atu pe ‘a Caldwell hono tataki ‘a e Potungāue Polisi ‘a Tonga.
Na'e tuku mai foki 'i he mitia faka-sosiale 'a e tohi tangi na'e fakahoko 'e he PTOA 'i he 'aho 3 'o 'Epeleli ki he Tu'i ke 'oua 'e toe fakalōlōa 'a e Konituleki 'a e Komisiona.
Ko e kaveinga ‘eni ‘oku lahi hono talanga’i ‘i he fonua ni pea ‘oku kau ‘eni ‘i he tu’ukimu’a ‘i he ‘asenita ngāue ‘a e Palēmia pea ‘oku ‘i ai ‘a e tui ko hono solova pe ‘eni ‘o e kaveinga ni ‘o fakatatau ki he mafai kuo tuku mai ‘e he Konisitūtone ki he Fakataha Tokoni.
Ko Caldwell na’e fe’unga mo e ta’u ‘e 37 ‘ene fakahoko fatongia ma’a e Potungāue Polisi ‘a Nu’usila pea ‘oku ‘i ai ‘ene taukei lahi ‘i he ngaue faka polisi.
2 comments
-
MAHINO 'A E LELEI ANGE 'A E TALIUI 'O E ALEAPAU MO E KOMISONA POLISI KI HE 'ENE 'AFIO & FAKATAHA TOKONI. 'Ikai totonu ke taliui ki he PM mo e Kapineti he ko e founga faka-politikale 'e tu'utu'uni faka-tikitato 'a e PM ke "tuku 'a e lao ki he tafa'aki kae fai 'a 'ene tu'utu'uni."
'Oku kole atu ke faka-lakalaka 'a e ngaue 'a e kau Polisi ke fe'unga mo e Senituli 21.
1- Kuo hulu hono faka-mamahi'i e fanau ako mo e kau talavou kuo 'ave ki pilisone...kuo ta kinautolu, pea kai 'enau me'akai 'e he kau Polisi, 'a ia kuo 'oate 'e honau ngaahi famili, kae si'i fiekaia 'a e fanau.
2- Kuo hulu e faihala 'a e kau Polisi 'i he ta-tikite 'o e ngaahi hia ko e lahi 'o 'enau faka-pone mo e lau-famili (nepotism).
3- Kuo hulu 'a e kaakaa 'a e kau Polisi 'i he ngaahi moveuveu fakaako: tokolahi 'o e kau Polisi ko e kau Kolisi Tutuku Toloa mo 'Atele, pea kuo nau tukuaki'i aipe 'a e tamaiki Liahona mo 'Apifo'ou ka e tukuange 'a e kau Toloa mo Atele.
4-Ko e ngaahi faka-moveuveu fakaako ko e fatongia 'o e kau Polisi. Kuo 'osi tuku 'a e ngaahi 'ako pea 'oku totonu ke 'osi 'ilo'i 'e he kau Polisi 'a e tupu'anga 'o e ngaahi faka-moveuveu.
5-'Oku nau tatali pe kinautolu ke toki talamai kuo fai ha fuhu pea nau toki lele atu kuo 'osi movete 'a e tamaiki ia.
6- 'Oku 'ife 'a e kau Polisi fakatotolo? Ko e ha 'enau me'a 'oku fai ka e 'ikai kenau fekumi ki he ngaahi founga ke ta'ofi ai 'a e fakamoveuveu? -
Malo Tupou VI.
Kataki omai e tohitangi ia a e PTOA kiheni ketau fakapunalofa ‘aki pea mou ofa aa o poto he mea koe ngaue, teeki ke initiate ha launga’i oe Komisiona ki ha mafai pule ke mahino oku faihia kuo mou tuu hake o tanaki veve o fai aki hoo mou tukuakii. Mahino leva ki homou uto oku iai e founga ngaue kihe mea kotoa pe. Oku ikai koe laui pe ha taha he facebook pea mahino leva ku faihia e taha ia ku lau’i.