Fakanofo ‘a ‘Elisapeti Makoni Lavakei’aho Langi ki he lakanga koe Fakamaau Polisi Featured
Ko ‘Elisapeti Makoni Lavakei’aho Langi hili ;a e oua fakanofo. 'Oku ha he taa ni 'a e Tu'i Fakamaau Lahi Owen Paulsen, Lord Dalgety mei he Penolo, 'Ateni Seniale 'Aminiasi Kefu, Fakahinohino Lao 'a e Pule'anga Sione Sisifa, Lord Privu Seal Viliami Malolo, Fakamaau Polisi Salesi Mafi mo Mana Kaufusi
30 Ma'asi, 2018. Kuo fakanofo ‘a ‘Elisapeti Makoni Lavakei’aho Langi ki he lakanga koe Fakamaau Polisi Ma’olunga ‘I he ‘aho 29 ‘o Ma’asi ni ‘a ia koe fefine ‘aki pe ‘eni hono ua ke a’u ki he lakanga ko’eni.
Ko e 'uluaki Fakamaau Polisi fefine foki ko Vusenga Helu.
Na’e fakanofo foki ‘a Langi hili ia hano fokotu’u atu ki he Penolo ki hono fili ‘o e lakanga ni (Judicial Appointment and Discipline Panel) pea na’e fakanofo ia ‘o fakatatau ki he founga anga maheni kuo tu'utu'uni 'e he lao..
Ko e hono fakanofo ko'eni 'a Langi pea ‘e hiki hake ai ‘a e kau Fakamaau Polisi ‘i he Fakaamau Polisi ki he toko 8.
Na’e fakahā foki ‘e Langi ‘ene fiefia ‘i he’ene hoko atu ki he lakanga fo'ou ko’eni pea ‘oku ne tukupā ke pātoloaki ‘a e fakamaau totonu mo e ngaahi fatongia ‘o e Fakamaau’anga Polisi ki he fonua.
Na’e ngāue foki ‘a Langi koe Fakahinohino Lao Ma’olunga ‘i he ‘Ofisi ‘o e ‘Ateni Seniale.
1 comment
-
Tau fakfeta'i pea tau fiefia he ngaahi lavame'a moe ngaue ma'ongo'onga hotau kakai ke langa hake hotau ki'i fonua. Fakamalo moe talamonu atu kia Peti he'ene lotolahi 'o to'o e pole faingata'a ko eni pea 'oku 'iai 'ae tui lahi 'e lava ke toe lelei ange mo maau ange heni e ngaue 'ae fakamaau'anga.
Fakamalo atu foki Nepituno 'I ho'o acknowledge mo fak'apa'apa'i si'i 'uluaki Fakamaau Polisi fefine, 'a Vusenga Helu kuo ne mama'o atu. Tonu ke ako mei heni e Letio Tonga A3Z ke nau 'uluaki fai ha fekumi ke ma'u e mo'oni pea nau toki tukumai he'enau ngaahi ongoongo. Koe tu'o fiha hake pe eni 'enau 'omai e ngaahi ongoonogo 'oku ta'emo'oni mo te'akakato. Ka koe 'atunga foki ia hono 'ave ngaue kihe kau leka 'oku te'eki ai ke mahino kia kinautolu e ngaahi me'a lahi fekau'aki moe me'a koe ongoongo (news), pea 'alu fakataha moe inexperience, ta'emaa'usia moe matu'aki ta'e'ilo e me'a ke fai. Kole atu ki he pule TBC mo 'enau poate ke mou tokanga ange ki hono ako'i ho'omou kau faiongoongo moe kau lea letio ke toe fakapalofesinale ange 'enau fakahoko fatongia he 'oku fanongo atu a mamani moe kakai 'oku nau 'ilo lahi ange ki he ngaahi me'a 'oku hoko pea na'e hoko he fonua. Koe letio fakafonua, national radio, 'oku 'ikai koha me'a ia ke fai ai ha akoako lea, akoako laukonga pe fakakata mo 'ai'ai noa'ia. Tau manatu ai kihe kau paionia 'oe ZCO/A3Z he tonu moe fakapalofesinale 'ae fai fatongia. Ka koe fa'ahinga foki ia ne ako'i lelei he fakamafola lea, he na'e 'asinga ai 'enau le'o lelei 'o ifo e fanongo pea toe tonu mo fakamatapule e lea moe laukonga 'o tatau he lea faka-Tonga moe faka-Pilitania.