Tali Kautau 'Ene 'Afio ki he tukuaki'i loi 'a e Minisita Polisi ^Featured

1. ‘Oku faka’ikai’i mamafa ‘e he Kau Tau ‘a ‘Ene ‘Afio ‘a e ngaahi tukuaki’i ta’efalala’anga kuo tuku mai he ngalu’ea ‘o pehe, ‘oku maumau lao hono fakatau mai ‘e he Kau Tau, ‘a e mahafu (ammunition) na’e tu’uta mai he vaha’a taimi ‘i ‘Aokosi ki Tisema 2017. Ko e tukuaki’i eni ‘oku ‘ikai ke fakapotopoto pea ‘ikai ke ‘i ai ha makatu’unga fakalao pe ko ha mo’oni.

2. Ko e tukuaki’i ‘eni na’e ‘omai mei he ‘Eiki Minisita Polisi ‘i Novema 2017. Na’e fai leva ‘a e fakataha mo e ‘Eiki Minisita, ke fakama’ala’ala ‘a e founga ngaue ki he hu mahafu ni. ‘I he mahu’inga ke ‘i ai ‘a e falala mo e toka’i, na’e tu’utu’uni ‘a e Kau Tau ke fakafoki ‘a e uta mahafu, na’e ‘osi ‘i he Kemi Taliai, ke tauhi fakalao ‘e he Potungaue Polisi, ‘i ‘Api Polisi.

Ko e koniteina ‘e taha ko e toenga ‘o e mahafu mo e me’aifi ‘a e Kau Tau ‘oku lolotonga tauhi, ‘i he Masefield Naval Base ‘i he malumalu ‘o e Potungaue Kasitomu ‘a Tonga. Koe taumu’a hono fakafoki ‘e he Kau Tau ‘a e mahafu ke tauhi fakalao ke ‘oua na’a tailiili ‘a e ‘Eiki Minisita Polisi pea ke ‘oange ha faingamalie ki he ‘Eiki Minisita, ke fakapapau’i ‘a e tukunga fakalao pea ke hoko atu ha fakatonutonu fakalao ki he mo’oni ‘o e tukuaki’i kuo fai ki he Kau Tau.

3. ‘I he fakama’ala’ala ki he ‘Eiki Minisita Polisi, ko e fakatau ha mahafu ‘oku ‘ikai ke hange ko e fakatau ‘o e ngaahi koloa anga maheni. Ko e founga anga maheni ‘eni na’e ngaue’aki ‘e he Kau Tau ki he fakatau ha
mahafu.

a. Na’e mahino ‘i he 2015 ‘e ta’u hongofulu ‘i he 2016 ‘a e fakatau mahafu fakamuimui ‘a e Kau Tau. Na’e fiema’u ha palani ngaue ke fakatau mai ha mahafu ke fetongi ‘a e konga ‘o e mahafu talifaki pea ke ‘omai ia ke fai ‘aki ‘a e ako ki he mateuteu ‘a e Kau Tau. Na’e toe fiema’u ke fetongi mo e ngaahi misini ki he fakafonu mahafu ke toe ngaue’aki pe ‘a e nge’esi mahafu motu’a ki he mahafu ako. Na’e ma’u ha kautaha he ‘aho 14 Sepitema 2015 pea fai e alea mo kinautolu ki he ngaahi misini mo e kongokonga ‘o e mahafu. Na’e alea’i ‘a e fakatau mahafu ki he kautaha ni ‘i he ‘aho 22 Sune 2016 pea toki fakapapau’i ‘i he ‘aho 18 Novema 2016. Ko e kautaha ‘eni mei ‘Aositelelia ko e fakafofonga ‘o e kautaha ‘Amelika ki he Pasifiki mo honau va’a ‘oku ‘i Nu’usila.

e. ‘I He 2016 na’e talanoa ‘a e Kau Tau ki he va’a hu koloa ‘a e Pule’anga (Procurement) ke fakatau mai ha mahafu ‘i he Procurement Plan ‘a e Kau Tau ki he 2016-2017. Na’e fokotu’u hono patiseti ‘a e fakatau mahafu ki he Patiseti 2016-2017. Na’e totongi ‘a e 80% ‘i he ‘aho 11 Sanuali 2017 pea koe 20% ‘i he ‘aho 14 Sune 2017. Hili hono totongi, na’e fakahoko mai ‘e he kautaha mahafu ‘e ma’u mai ‘a e konga ‘o e mahafu mei he kautaha ko honau fakafofonga ‘oku ‘i Nu’usila.

f. Na’e kole ‘a e ngofua hu mahafu (Import Permit) ki he Potungaue Polisi ‘i he ‘aho 2 ‘Okatopa 2017 pea na’e ma’u mai ‘a e tohi ngofua ‘i he ‘aho 6 ‘Okatopa 2017. Kae kimu’a ai ne ‘osi ma’u mai ‘a e tohi ngofua (Export Permit) mei he Pule’anga ‘Aositelelia he ‘aho 6 ‘o Fepueli 2017. Na’e pau ke toe kole ha ngofua (Export Permit) mei he Pule’anga Nu’usila pea na’e ma’u mai ‘a e ngofua koia he ‘aho 27 ‘o Sepitema 2017.

h. Na’e tau mai ‘a e VOEA NEIAFU moe ‘uluaki uta mahafu mei ‘Aositelelia he ‘aho 6 ‘Okatopa 2017. Na’e pau ke fakatatali ‘a e fakahifo, kae ‘oua kuo lava ‘o kole ki he Kapineti ‘a ‘Ene ‘Afio ke ‘oua ‘e tute ‘a e mahafu. Na’e tali mei he Kapineti ‘a ‘Ene ‘Afio ‘a e kole ke faka’ata ‘a e tute ki he uta mahafu ‘i he Tu’utu’uni Kapineti Fika (FI 3/13 V9) ‘o e ‘aho 13 ‘Okatopa 2017. Na’e faka’ataa ‘e he Kasitomu ‘a e uta mahafu pea na’e ‘ave ki he Kemi Taliai ‘o tuku ai. Na’e toki tu’uta mai ‘a e uta mahafu mei Nu’usila he ‘aho 6 Tisema 2017. Na’e tu’utu’uni ‘a e Kautau ke fakafoki ‘a e mahafu na’e ‘uluaki tau mai, ki he malumalu ‘o e Polisi pea koe uta hono ua ki he Kasitomu ‘o hange na’e ha atu ‘i ‘olunga. ‘Oku fie fakamahino heni na’e ‘ikai kau ha ngaahi me’afana pe ko ha pekenene kehekehe he hu mahafu mai ‘a e Kau Tau.

4. ‘Oku fakame’apango’ia ‘a e Kau Tau ‘i hono tukuaki’i ‘a e ongo Potungaue kae ‘ikai ke fai ha fakatonutonu fakalao. ‘Oku ‘ikai ke kau ‘a e Kau Tau ha me’a fakapolitikale ‘i he fonua. Ko e Pule’anga ‘eni na’e fili pea fakanofo ‘e he ‘Ene ‘Afio ko hono Pule’anga pea ‘oku tau falala te nau tataki kitautolu ki he lelei ‘a e Fonua. Ko e lahi ‘o e mahafu na’e fakatau, ‘oku fu’u kei si’isi’i ki he fiema’u ki hono teuteu’i ‘a e Kau Tau ke mateuteu pea mo e ngaahi akotau mo e ngaahi fonua muli ki he ta’u ‘e nima ka hoko mai. Ko e hisitolia ngaue ‘a e Kau Tau ‘i he 2006, na’e ‘ikai ke lavea ha taha he kakai ‘o e fonua mei ha me’atau pe ko ha mahafu tau. Ko e ngaahi ngaue ‘o e 2006 na’e pehe ‘e he Kautaha Kolosi Kula ‘a Mamani pe koe International Committee of the Red Cross (ICRC) ko e fakatataa lelei ki he ngaahi fonua ‘o e Pasifiki mo ‘Esia. Na’e fakaafe’i ‘e he ICRC ‘a e kau ‘ofisa mei he Kau Tau ke nau vahevahe ‘a e founga ngaue fakamalu’i na’e ngaue’aki ‘i Tonga ni lolotonga e 2006 ‘i he konifelenisi ‘a e ICRC ‘i Jarkata, ‘Intonesia he ta’u 2008.

5. Koe ngaahi tukuaki’i ko ’eni ‘oku lolotonga fakahoko, ‘oku ne tuku ki lalo ‘a e ongoongo ‘o e Kau Tau pea moe Potungaue Polisi. ‘Oku ne fakatupu ke ta’efalala ‘a e kakai ‘o e Fonua ki he Kau Tau mo e Potungaue Polisi. Neongo ‘a e falala mai ‘a e ongo fonua kaunga’api ‘o tuku mai ha ngofua ki he fakatau mahafu pea falala mai ‘a e kautaha fakavaha’a pule’anga ICRC ki he ngaahi ngaue ‘a e Kau Tau he 2006, ‘oku mau faka’amu ‘e falala mai ‘a e ‘Eiki Minisita Polisi ke fai ha fakatonutonu fakalao.

6. ‘Oku na’ina’i heni ‘a e Kau Tau, telia na’a ma’uhala ha taha pe ko ha kulupu, ko ha faingamalie ‘eni ke fakahoko ha ngaue ta’efakalao pe koe fakamoveuveu ki he ma’uma’uluta ‘a e fonua. ‘Oku tukupa mo mateuteu ma’u pe ‘a e Kau Tau, ‘o fakatatau ki he pule ‘a e Lao ke tokoni ki he Potungaue Polisi ‘a Tonga ki hono pukepuke ‘a e pule ‘a e lao moe ma’uma’uluta ‘a e nofo hotau kainga kotoa ‘i Tonga ni.

NGATA'ANGA