Toe ui 'a e hopo hono faka'ilo 'o Tu'i Uata ki he lau'ikovi'i ^Featured

Ko hono toloi mai 'eni 'o e hopo ko'eni mei he ta'u kuo 'osi pea kuo lava 'a e ta'u 'e taha mo e ngaahi mahina mei ai pea ko hono tu'utu'uni 'eni 'e he Fakamaau Polisi Salesi Mafi ke ui 'a e hopo ko'eni.

Ko e hopo foki 'eni 'i hono faka’ilo ‘e he Fakafofonga fale Alea  Vava’u 15 Samiu Kuita Vaipulu ‘a Tu’i Uata ‘o tukuaki’i ki he hono lau’i kovi’i mo hono tukuaki'i loi mo ta'e mo'oni 'o'ona.

‘Oku makatu’unga foki ‘a e faka’ilo ko’eni ‘i he fakamatala ‘a Tu’i Uata na’e fakahoko ‘i he fo’i vitiō na’e tukuange mai ‘i he feisipuka (facebook) ‘i he ‘aho 30 ‘o Tisema 2017 ‘i he peesi ‘a e tokotaha ko Moala Filimone Pahulu.

Na’e ‘ave takai ‘i he ngaahi peesi feisipuka ‘a e fakamatala ko'eni ‘a Tu’i Uata ‘o lau ‘e he kakai Tonga tokolahi ‘i he tapa kehekehe ‘o e kolope kau ai mo Tonga ni pea 'oku tui 'a e Talatalaaki 'oku maumau ai heni hono ongoongo.

‘I he fakamatala ‘a Tu’i Uata ‘i he vitiō ko’eni na’a ne pehe ai na’e totongi fakafufuu (bribe) ‘e he kau Siaina ‘a Samiu Vaipulu pea ‘oku ‘asi ‘a e tā ‘o Samiu mo e panitolo pa’anga ‘a ia koe me’a ia na’e fai ‘e he Pule’anga ki mu’a.

‘Oku mahino foki koe fakamatala ko’eni ‘a Tu’i Uata na’e fai ia ‘i he faikava ‘i he fonua muli ‘o hange ko’ene ‘asi ‘i he fo’i vitiō ko’eni pea na’e ‘ikai kene ‘amanaki ‘e tukuange mai ‘eni ‘i he mitia faka-sosiale.

‘Oku tokolahi ‘a e kakai kuo nau ‘osi ma’u ‘a e tatau ‘o e fo’i vitiō ko’eni pea na'a nau fanongo tonu ki he tukuaki'i ko'eni 'e Uata 'a Vaipulu.

‘Oku fakafofonga’i foki ‘a Vaipulu ‘i he fakatonutonu ko’eni ‘e William Clive Edwards pea na'e pehe 'e Edwards ki he ongoongo ni koe anga pe 'eni hono fakahokohoko mai 'o e hopo ni pea 'oku fiema'u ke fai mo fakahoko leva he kuo maau 'a e tafaka'i ia 'a e Talatalaaki.

Ko hono tu'o ua 'aki pe 'eni hono faka'ilo 'o Uata ki he maumau lao lolotonga 'oku ne 'i he lakanga faka-Minisita ka 'oku mahino pe 'oku 'ikai fakahoko ha tu'utu'uni kiate ia 'e he Kapineti.

Ko e vitio tatau pe foki na’e toe ‘asi ai ‘a e fakamatala ‘a Tu’i Uata ‘o pehe ‘oku totonu ke ‘oua ‘e taliui ‘a e kakai ki he Tu’i he ‘oku ‘ikai ha’ane pa’anga.