Maumau‘i Kalapu Fo‘ou Uike ‘Uluaki Langalagafo‘ou ‘a e Utah Warriors Featured
Ko e feesi-5/8, Hagen Schules (#10), 'a e Utah Warriors na'e haohaoa 'ene 'aka tautea 'e 4 mo e poini-2 mei he tata'o 'a e sekeni Blake Hohaia’s (#11). Na'e fili ai 'a Hagen Schules ki he Timi 'Uluaki XV 'o e MLR Uike #1. (Photo by Kara Durette).
Maumau‘i Kalapu Fo‘ou Uike ‘Uluaki Langalagafo‘ou ‘a e Utah Warriors
Fa‘utohi ‘a Sione Ake Mokofisi
Salt Lake City, Utah – Hili hono faka-fe‘iloaki ‘o e kau faiakó mo e kau va‘inga Utah Warriors na‘e faka‘ali‘ali ‘i he Salt Lake Convention Center, Sānuali 31, na‘e lahi ‘a e ‘amanaki lelei ki ha‘a nau fakalakalaka ‘i he ta‘u tolu eni ‘o e ‘akapulu ‘iunioni polofesinale MLR.
‘Oku hāmai ‘a e fefekaange tu‘unga pa‘angá faka-pisinisí ‘a e ngaahi kalapú– ko ‘enau faka‘aonga‘i ‘a e ngaahi sipinga faka-tu‘apule‘angá – tautefito ki hono ‘omai ‘o e kau tau fakafonuá muli ‘o fio mo e kau va‘inga ‘Ikale ‘Amelika mālōlō mo e lolotongá.
Na‘e toki ‘ohovale ‘a e Utah Warriors ‘i hono ‘ave fakafokifā ‘o Paula Lasike ‘i he 2018 ‘e he Harlequins ki Pilitāniá. Ko ia ne toki tokangaange ‘a e MLR ki hono malu‘i ‘o ‘enau kau va‘ingá.
Kuo fokoleta ‘a e ngaahi aleapau totongi-mamata (pay-per-vew) TV, lētiō, streamlive ‘i he Internet, etc.
Kuo ‘omai e ‘avalisi ‘o e kau mamata-totongi ko e toko 2,500 ‘i he ngaahi mala‘e iikí. Na‘e laka ‘i he toko 3,000 ‘a e mala‘e Life University, Atlanta, na‘e talitali ai ‘e he Rugby ATL ‘a e Utah Warriors.
Ko e Mala‘e Sam Boyd ‘i he University of Nevada Las Vegas ko e sea ‘e 65,000 ‘oku fai ki ai ‘a e fe‘auhi tu‘o-ua he ‘aho ‘o e uiké ni.
Ma‘a Nonu Mo e “Manu Fekai” ‘Afilika Tongá
‘Oku ‘ilonga ‘a e fakalakalaka vave ‘a e US-MLR ko e kau taukei ‘iloa ‘o hangē ko e All-Blacks Nu‘usila mālōlō ko Ma‘a Nonu (#12) kuo ‘omai ‘e he San Diego Legion (California).
Ko e All Blacks mālōlō ko Rene Ranger (2010-2013) na‘e fakamo‘oni aleapau ia mo e Colorado Raptors.
Kā ‘oku toe ongoongoa ange ‘a e ‘omai ‘o e matatolu tu‘ukimu‘a mei ‘Afilika Tongá ko Tendal Mtawarira “koe manu fekai” mei he fe‘auhi Ipu ‘a Māmani 2019 ‘i he ta‘u kuo ‘osí. Kuo aleapau ia mo e Washington DC, Old Glory. Pea ko e senitā ongoongoa Falanisē ko Mathieu Bastereaud na‘e kapiteni ‘i he 2017/2018, kuo ha‘u mo ia ki he Rugby United New York .
Faiako Pule, Chris Latham (Le‘okolo Mālōlō ‘a e Wallabies)
Na‘e fakafe‘iloaki foki ‘e he Utah Warriors ‘a e kau faiako fo‘oú, kau va‘inga taukei faka-tu‘apule‘anga fo‘oú, mo ‘enau ngaahi kautaha poupou fo‘oú. Pea kuo hūmai ‘a e kalapu fo‘ou ‘e tolu kuo nau kaumai ki he MLR: Rugby ATL; New England Free Jacks; Washington DC., Old Glory.
Ko e faiako pulé kuo ‘omai ‘a e taukei le‘okolo tau-fakafonua tu‘ukimu‘a ‘Aositelēliá ko Chris Latham. Ko e fika ua fakahisitōlia ia kia David Campese ‘i he laukai tata‘o ‘a e Wallabies. Pea vikiviki‘i ‘e he The Times of London mo e The Sunday Times ko e le‘okolo leleitaha ‘i hono taimi.
Na‘e ‘alu ai ‘o hoko ko e Australian Super Rugby Player of the Year ‘i he 2000, 2003, 2004, mo e 2005, pea va‘inga ‘i he Ipu ‘a Māmaní ma‘a e Wallabies (1999, 2003, and 2007). Na‘a ne mālōlō ‘i he 2012, pea kuo toki fakakakato ‘a ‘ene faiako ‘i he ngaahi kalapu ‘i Siapani.
'I he sio 'a pule faiako Chris Latham, na'a nau taki 16-8 'i he mālōlō ka e nounou 'enau mānavá, 'o tuli kai ai 'a e Rugby ATL 'o fa'oa e mālohí, 28-19.
"'I he 'eku vakaí na'e hāmai e ngaahi faka'ilonga lelei 'i he fakakātoa 'o e taú," lau ia 'a Latham. "'Oku mahino 'emau lava 'o taki 'a e va'inga ke vaveange."
"Na'a mau ngāue'i e ngaahi faingamālie 'o lava ai kemau mapule'i 'a e va'ingá. Ka e pangó na'e 'ikai kemau lava 'o pukepuke ki he kotoa 'o e miniti 'e 80..." Ko e fakaikiiki ia 'a Latham.
Tānakimai ki ai 'e Kapiteni Dwayne Polataivao 'o e Warriors, "'Oku lolotonga 'i'īi hoku keté 'i he ulungia ko ení, ka 'oku ou pōlepole foki 'i he va'inga fefeka 'a e kau taú.
Fakamālō atu foki ki he kau poupou na'a mau kau-fononga mai ki Atlanta, mo kinautolu na'a nau mata-TV mo e Internet...ka temau foki fefekamai 'i he uike kaha'ú.
Ngaahi Fe‘auhi Uike 2
Tokonaki, Feb. 15: Sam Boyd Stadium
University Nevada Las Vegas
10:30 AM – New England @ Utah Warriors
2:30 PM – Austin Gilgronis @ Rugby United NY
Sāpate, Feb. 16: Sam Boyd Stadium
University Nevada Las Vegas
10:30 AM – Houston Sabercats @ Toronto Arrows
2:00 PM – Colorado Raptors @ San Diego Legion
Sāpate, Feb. 16: Cardinal Stadium
Catholic University, Washington DC
11:00 AM – Seattle Seawolves @ Old Glory, Washington, DC
Sāpate, Feb. 16: Shrine on Airline Stadium
Metairie, Louisiana.
2:00 PM – Rugby ATL vs. NOLA Gold
