Faka’osi Konifelenisi Hono 92 SUTT ‘aki ‘a e Fehikitaki ‘a e Tangata’eiki Palesiteni ^Featured

‘Oku mahino mai pe foki koe taimi ‘eni ‘oku fakaongo kiai ‘a e tokotaha kotoa ‘i he siasi kae tautautefito ki he kau ngāue ‘a e siasi mei he kau faifekau ‘o a’u ki he tu’unga kotoa ‘oku pule’i ‘e he fehikitaki ‘a e Tangata’eiki Palesiteni.

Na’e ‘i ai pe ‘a e ngaahi tu’unga lalahi na’e fakahoko hono fetongi ‘o kau ai hono fetongi ‘e Dr. Siotame Havea ‘a e Faifekau Pule ‘o e Vahefonua ‘Aositelēlia ‘a Faifekau Matafonua Fotofili pea mo hono fetongi ‘e Faifekau Tu’ipulotu Faletau ‘a Faifekau Viliami Tu’akoi ‘i he lakanga Faifekau Sea ‘o e Vahefonua Vava’u.

 ‘Oku kei hoko atu ai pe ‘a Faifekau Tu’inauvai ‘Asaeli ‘i he lakanga Faifekau Pule Vahefonua Tongatapu neongo kuo taimi ke si'i malōlō mei he fatongia pea hoko atu mo Faifekau Dr. Mele’ana Puloka ‘i he lakanga Palesiteni Ako pea tokoni pe kiai ‘a Faifekau Dr. Tevita Hala Palefau.

Ko e me’a tatau ‘i he Potungāue Ako Faka Kalisitiane ‘a ia ‘oku kei hoko atu pe ‘a Faifekau Taufa Filiai ‘i he lakanga Talēkita pea hoko atu mo Faifekau Fale Matāpule Lomu ‘i he lakanga Talēkita ki he ‘Evangeliō. Kuo ui ‘a Faifekau Dr. Mohenoa Puloka ke Faifekau Sea ‘i he Vahefonua Ha’apai hili ia ha’ane le’ole’o mai ‘i lakanga ‘i he ta’u kuo maliu atu.

‘Oku kei ‘i he lakanga Faifekau Pule pe ‘o e Vahefonua ‘Eua ‘a Faifekau Kisepi Havea, Faifekau Sione Mapuhola ‘i he Vahefonua Niua Toputapu pea Faifekau Solomone Tiueti ‘i he Vahefonua Niuafo’ou.

Ko Faifekau Lopini Filise ‘oku kei ‘i he lakanga Faifekau Pule ‘i he Vahefonua Nu’usila pea mo Faifekau Dr. Sela T. Manu ‘i he Vahefonua ‘Amelika.

‘Oku toe mahino mai foki mei he fehikitaki ko’eni ‘a hono fakamalōlō’i fakataimi ‘o Faifekau Viliami Tu’akoi (Faifekau Sea Vahefonua Vava’u), Faifekau Matafonua Fotofili (Faifekau Pule Vahefonua ‘Aositelēlia) pea mo Faifekau Sione Mataele Pinomi (Faifekau Sekelitali Vahefonua ‘Aositelēlia) kenau fakaongoongo ki he Palesiteni kae fakahoko ‘a e ngāue kiate kinautolu.

Ko e taha foki ‘eni ha kaveinga na’e lahilahi kiai ‘a e laaulea ‘a e Konifelenisi pea na’e a’u foki ki he Fakamaau’anga Lahi ‘o makatu’unga ‘eni ‘i he mole ‘a e ‘api siasi Pulela’ā ‘i Senē lolotonga ‘a e taimi na’e fakahoko fatongia ai ‘a e kau faifekau ko’eni.

Kaikehe koe anga pe foki ia e fatongia kuo pau ke ‘i ai e ‘aho ‘e la’ala’ā pea ‘i ai mo e ‘aho ‘e ‘uho’uho ka ‘oku tau fakafeta’i ‘i he kei uki kakai ‘a e ‘Otua ke fakahoko ‘ene ngāue ‘i he siasi.