Fiema’u Ke Fokotu’u Leva Komisiona Tau’i Faihala: ‘Ikai Ha Nifo Komisoni Vā mo e Kakai ^Featured

‘Oku ‘i ai foki ‘a e hoha’a fekau’aki mo e ngaahi tukuaki’i ‘oku fakahoko ‘i he mītia fekau’aki mo e ngaahi faihala ‘a e kau taki ‘o e fonua pea kuo a’u ai ki he ngaahi launga kuo fakahoko atu ki he Komisiona ki he Vā mo e Kakai.

Ko e Komisoni Ki he Vā mo e Kakai kuo fuoloa mai hono fokutu’u ka ‘oku hā mahino mai ‘oku si’isi’i ke ho’ata mai ha ngaahi ngāue kuo nau fakahoko fekau’aki moe ngaahi launga kuo fakahoko ka ‘oku mahino mai pe foki ‘i he taimi tatau ‘oku ‘i ai ‘a e ngaahi ngatangata’anga honau mafai.

‘Oku mahino foki ‘oku fakahoko ‘a e ngāue he taimi ni ki hono fili ha Komisiona ki hono tau’i ‘o e faihala ‘e he Fakataha Tokoni ‘o fakatatau ki he Lao mo e Konisitūtone ‘o e fonua pea ‘oku ‘i ai ‘a e ‘amanaki lelei ‘a e fonua ke fai mo fokotu’u leva ‘a e lakanga ko’eni he ‘oku lahilahi ‘a e ngaahi launga ‘oku hoko ‘i he fonua fekau’aki moe ngaahi fakahoko fatongia ‘a e Pule’anga.

‘Oku pulusi atu heni ‘a e tali ‘a e Komisiona ki he Vā mo e Kakai (Commissioner of Public Relations) ‘Aisea Taumoepeau ki he hoha’a mo e launga na’e fakahoko ‘e ‘Eliesa Fififta ‘o Kolomotu’a ki he Komisoni ko’eni ‘a ia ‘oku hā mahino mei ai ‘a e ngatangata’anga ‘o e mafai ‘o e Komisoni ko’eni ‘a ia ‘oku hange ko e lea hua ‘a e kau papalangi ‘oku fiema’u ke ‘i ai hano nifo kae malava ke fakahoko lelei hono fatongia.

‘Oku ho’ata mai foki mei he tali kuo ‘omai mei he Komisoni ‘a hono tuhu’i ‘oku ‘uhinga ‘a e launga ‘a ‘Eliesa Fifita ‘i he makatu’unga faka politikale ‘a ia ‘oku hā nenefu ‘eni ‘i hono faka’uhinga pe koe hā hono maumau kapau ‘oku ‘uhinga faka politikale ha launga he ‘oku ‘uhinga ‘a e politikale ki he toka’anga moe fekau'aki ‘o e mafai mo e fa’unga pule ‘a ia ko e tupu'anga ia 'o e launga ko’eni.

'I he taimi tatau 'oku toe mahino pe mei he tali ko'eni 'a e fiema'u 'oku uesia fakafo'ituitui 'a e tokotaha launga 'i he 'uhinga 'oku fakahoko ai 'a e launga. 'Oku mahino lelei pe foki 'oku nofotaha 'a e fatongia 'o e Komisoni ko'eni ki he ngaahi me'a fakangāue (administrative matters) 'a ia 'oku fakangatangata pe moia.

Kaikehe ko e kaveinga ia koia ‘oku totonu ke toe fai ha vakai kiai ka ‘oku mahu’inga heni ‘a e mahino mai ‘a e si’i ngata’anga ‘o e mafai ‘o e Komisoni ki he Vā mo e Kakai mo ‘etau ‘amanaki lelei ki he teuteu ko’eni ke fili ha Komisiona ki hono tau’i ‘o e faihala. ‘Oku mahino foki mei he tali mei he Komisoni ‘oku lahi ange ‘a e mafai ‘o e lakanga fo’ou (Komisiona Tau’i e Faihala (Anti-Corruptions Commissioner) pea kaungatonu ‘ene ngāue ki he ngaahi launga natula tatau mo e launga ‘a ‘Eliesa Fifita.

‘Oku ‘oatu foki ‘a e tatau ‘o e tali ‘a e Komisoni Ki he Vā mo e Kakai ki he tohi ‘a ‘Eliesa ko e fakatātā ‘a e fiema’u ke mo’ui ‘a e tafa’aki ko’eni pea ko e taha ia ‘o e poutuliki ‘o e Temokalati pea na’e tukupā foki ‘a e Palēmia pehe ki he’ene Kapineti ke tau’i ‘a e faihala.'Oku hā pe foki 'i he tali ko'eni 'a e fakaikiiki fekau'aki mo e launga 'a Fifita mo e tali ki he'ene launga.