Fakahiki Fale’i Faka-Politikale Palēmia ki he Va’a Fanga Monumanu ‘i Tokomololo Featured
Palemia Hon. 'Akilisi Pohiva, Viliami Taufa (Fale'i Faka-Politkale), 'Aholotu Palu & 'Akanesi Taufa
Nuku’alofa, 29 Fepueli 2016. ‘Oku muimui’i ma’u pe foki ‘e he ongoongo ni ‘a tukutuku’au mai ‘o e ngaahi ongoongo ‘oku mau ‘oatu ki mu’a pea ne toe fai hano vakai’i ‘a e tu’unga ‘oku ‘i ai ‘a e fale’i faka-politikale ‘a e Palēmia ‘a Viliami Taufa makatu’unga ‘i he mahu’inga ‘o e fatongia ni.
‘Oku makatu’unga ‘eni ‘i he ‘ene lolongo pea ‘ikai ongona mai hano le’o lolotonga hono tālanga’i ‘a e ngaahi kaveinga faka-politikale lalahi kuo hoko ‘i he fonua.
Oku fa’a tu’u lavea ngofua foki ‘a e Tangata’eiki Palēmia he taimi lahi ki hoho ‘ohofi ‘e he kau fakaanga pea ‘oku hoko leva heni hono tukuaki’i pe koe hā ‘a e me’a ‘a e fale’i faka-politikale ‘oku fakahoko. Kaikehe na’e faka’ohovale ha fetu’utaki ko hono kumi ‘a Taufa ke fakahoko ha’ane komeni fekau’aki mo e ngaahi kaveinga faka-politikale ‘o e ‘aho ‘o ‘ilo ai kuo ‘osi fakahiki ‘a e matāpule ni ia ki he Potungāue Ngoue.
‘Oku mahino mai foki ‘oku fakahiki ‘a e Viliami Taufa ki he Va’a ki he Fanga Monumanu ‘a e Potungāue Ngoue ‘oku tu’u ‘i Tokomololo. ‘Oku ‘ikai foki ke puli ia ‘i hono toutou ‘oatu ‘e he ngaahi mītia ko e ‘elia foki ‘eni ‘oku ‘ilo lelei kiai ‘a Taufa ko e fakatotolo ki he fanga pulu hu’akau (hūfanga he fakatapu) he na’e faifatongia foki ‘i he kautaha lahi ‘i Nu’usila ka koe va’a ‘i Waikato ‘oku nau ngāue ki he hu’akau mo e ngaahi koloa faka’aho mei he hu’akau (dairy).
Ko e ‘isiū mahu’inga ia heni ‘oku hoko hono fakahiki ko’eni ‘o Taufa ko e ikuna kafakafa ki he fa’ahi fakaanga mo e ngaahi mītia he na’a nau toutou ‘ohake hono fehu’ia hono fili mai ‘o Taufa lolotonga ia ‘oku ‘ikai ha’ane taukei ke fale’i faka-politikale pea ko ‘ene taukei ‘oku ‘i he fangapulu mo e hu’akau (hūfanga he fakatapu) ka ‘oku ‘ikai ko e politikale.
‘Oku ‘ikai puli ia pe unga koe feitu’u totonu pe ‘eni ia ‘oku ‘ave kiai ‘a Taufa fakatatau ki he’ene taukei he ko hono mala’e pea ‘oku ‘ikai fehu’ia ia ka koe poini heni ko hono ‘omi ‘a e kakai hala ki he fatongia hala ‘o iku ai ke si’i tukuaki’i ‘a Taufa ia lolotonga ia ‘oku ne fakahoko fatongia mai ia mei Tokomololo mei he Va’a ki he Fanga monumanu (hūfanga he fakatapu).
Fakatatau ki he fakamatala mei he ‘Ofisi ‘o e Palēmia na’e fakahiki ‘a Viliami Taufa ki he Potungāue Ngoue ‘i he mahina ko Tīsema ‘o e 2015 pea na’e ki’i tolomomoko ‘a e fehikitaki ko’eni ‘o makatu’unga ai ‘a hono fehu’ia pe koe fē ‘a e fale’i faka-politikale ‘a e Palēmia lolotonga ia ‘a e feme’a’aki ‘a e Fale Alea ‘i he kamata’anga ‘o e ta’u ni.
‘Oku ‘i ai foki mo e fakamatala ko’ene hiki fakataimi pe kiai tokua ke ngāue ki he poloseki he ‘oku mahino mai ‘oku ‘alu pe ‘a e fale’i faka-politikale mo e me’alele ‘a e ‘Ofisi ‘o e Palēmia.
‘Oku langa'i mai foki ‘ehe sīpinga ko’eni ‘a e founga ‘oku fili mai’aki ‘e he Palēmia ‘ene kakai hangē ko e ngaahi tukuaki’i kuo toutou ‘oatu kimu’a ‘e he ngaahi mītia 'o kau ai 'a e faka-pone mo e ‘ikai ha’anau taukei mo e ngaahi fatongia kuo ui kinautolu kiai pea ko hono ikiu’anga ‘eni.
11 comments
-
Kole atu kihe kau milionea kenau oatu e 5 miliona sii fiemau ehe Pule'anga he koe kii foi tila e ne mei tau kuo 'ilo'i ia ... Ha ha ha!
-
'Io Uili ko e me'a ia na'e li'aki ai 'e Taufa 'a e tatau hu'akau 'i Nu'usila he na'e kamata ke holo 'ene ma'u'anga pa'anga kae feinga mai kia Akilisi ke kau he kau milionea. He ne ki'i kamata ke ki'i alea 'a Akilisi mo Aholoto he ongoongo ki he Forbes he ko e pepa foki ki he kau milionea pe.
Malo -
Kou tokanga ki he lakanga fo'ou 'o Viliami pe na'e fou he PSC pe 'ikai. He na'e 'ikai tu'uaki 'ehe Va'a Monumanu 'a e Potungaue Ngoue hanau lakanga pehe. Kapau 'oku vahe faka-fale'i (consultant) pea kohai leva he 'Ofisi Palemia mo e Potungaue Ngoue 'oku to'o mei ai hono vahengai? Vakai'i atu foki 'ena Minisita Pa'anga he kuo anga 'aki 'ehe PM hono mono faka-fale'i holo 'ene fanga pone he ngaahi Potungaue 'a e Pule'anga. Koe me'a 'eni 'oku ui ko e 'ai'ainoa'ia mo e pule kovi 'ohua.
-
'Aia oku milionea mo Akilisi ia he sofrware mo e perdium Talamatangi e
-
Koe toki tonu 'ena 'a e lakanga fale'i 'emau tama Vaini. Ka 'ikai leva tali 'ehe kau va'e 2 'ete fale'i, pea fakahiki atu kene fale'i e kau va'e 4. Pea ka kalokalo mai e kau va'e 4, pea ke tuku fale'i aa koe Viliami kake foki mai ki Vaini.
-
Na'aku meimei pehe 'e au ko e ta 'eni 'o e kau milionea 'eni 'o e fonua. 'Oku ou hanga hifo 'oku kau heni 'a 'Akilisi , Taufa mo 'Aholotu. Ko e ngaahi langa 'a 'Aholotu 'i Havelu 'oku mahino mai ai ko e milionea mo'oni. Ko loto hono ngaahi fale ko e mapele he kalasi 'oku ui ko e kapakau'i 'angelo.
Malo -
Na kuo taimi ke muimui atu ai moe sekelitali lahi kihe 'ofisi e palemia 'ia Viliami Taufa! Kou tui ka lava 'eni kuo ngali tonu e fokotu'utu'u! Ta koe tu'unga totonu ke na fale'i kihe fangamanu ve'e 4 kae mole hona taleniti mo hona poto he loto 'aa hala! Fakafeta'i Tonga!
-
'Ikai keke nofo i Nuusila ngaue he fanga monumanu ai teke lavea pea toho hao insure kake hau ki heni oku namu tamaki. Tuputupu lefonua ke to mai ha fuu uha savolo.
-
Ko e fifili ko e 'omai ko e FALE'I FKPOLITIKALE PEA IKU KI HE FALE'I MANU.
Pe na'a koe konga pe eni ia e ngaahi 'asenita 'ai'ainoa'ia e PM.
Kohai leva kuo ne fetongi a Viliami Taufa he FALE'I POLITIKALE MA'AE PM.
'Ikai ko e hiki mai ko eni a Viliami Taufa kuo fklaka ia he vahe 'a e CEO he potungaue ngoue.
Ko e fifili pe -
Ko ho no 'aonga ia e lahi e taleniti ke lava ke male'ei holo pe 'a Viliami Taufa ia he 'oku lava 'a 'uta mo tahi. Faingamalie 'eni ke fakalakalaka'i hake ai 'a e tu'unga 'o e tafa'aki ki he monumanu he koe matotao foki 'a tangata ni. Talamonu atu Viliami he fatongia fo'ou kuo hilifaki atu.