Fakafoki ‘e Hōlani Ngaahi Me‘angāue Sivi COVID-19 Fakatau Mei Siainá ^Featured

Amsterdam, Holland (March 30,2020) – Kuo fakafoki ‘e he Pule‘anga Hōlaní ‘a e ngaahi me‘agāue sivi Covid-19 na‘á nau fakataumai mei Sianá. Na‘á nau fakafoki ‘a e ngaahi malu‘i-fofongá ‘e 600,000, ‘aneafi. Na‘e fakahā ‘e he Minisitā Mo‘ui Leleí, Jaap van Dissel, ‘i he pongipongí ni, fakataha mo e Palēmiá ‘o Hōlaní, Honorable Mark Rutte.

“Kuo fakatokanga ki he kau ngāue mo‘ui leleí ke ta‘ofi hono faka‘aonga‘i ‘o e ngaahi malu‘i-fofonga mei Siainá,” fakamatala ‘a van Dissel. “Lolotonga ‘a ‘etau masiva ‘i he ngaahi me‘angāué ni, ko e me‘angāue ta‘efe‘ungá pe ‘oku tau ma‘ú.”

Kuo toki ‘iloange ‘a e ta‘efalala‘anga ‘o e ngaahi me‘angāué ní na‘e maumau vave; ni‘ihi ‘o e ngaahi malu‘i-fofongá na‘e ‘ikai hao fe‘unga ki he ngutú ‘o e kau ngāue mo‘ui leleí; pea lahi na‘e ‘ikai faka-fiemālie ‘a honau ngaahi filita siví.

Kaumai Pule‘anga Sipeiní, Toaké, Siosiá, Lipapulika Siekí

Pea kuo fai e me‘a tatau ‘e he pule‘anga ‘e tolu kehé: Pule‘anga Sipeiní, Toaké, Siōsiá, mo e Lipapulika Siekí. Na‘e fakatau ‘e Sipeini ‘a e ngaahi naunau faito‘o fe‘unga mo e $467 miliona mei Siainá. Kau ai ‘a e ngaahi mīsini fakama‘a ‘eá (loki-mohe) ‘e 950; ngaahi me‘a sivi COVID-19 ‘e 5.5 miliona; ngaahi kofunima ‘e 11 miliona; mo e malu‘i-fofongá ‘e 500 miliona.

Na‘e fakafoki ‘a e ngaahi me‘angāue sivi COVID-19 ‘e 9,000 mei Sipeini ko e ‘uhí na‘e fiema‘u ke 80% ‘a e totonú ‘o e ngaahi siví, kā na‘e 30% pē. Ngaahi fakamatala ia ‘a e Minisitā Mo‘uí Salvador Illa. Pea tali lelei ‘e Siainá ‘a e ngaahi lāungá ni, ‘o nau tala ai ko e kautaha Siainá ko e Bioeasy na‘e ngaahi mei ai ‘a e ngaahi me‘angāué ni, ka e toki ‘iloange na‘e ‘ikai ma‘u laiseni ki he ngaohi ‘o e ngaahi me‘angāué ni.

Na‘e fakahā ai ‘e he Minisitā Mo‘uí Hōlaní kuo toko 4,000 ‘a e kau pihia COVID-19. Ko e toko 507 ‘a e kau puke fo‘oú ‘i he ngaahi falemahakí. Pea kuo mahiki hake ‘a e kau pekiá mei he toko 93 ki he 864. Ko e sivi ‘o e COVID-19 ‘i Hōlaní ‘oku fai pē ki he kakai ‘oku kamakamata kenau tale, mofi, niumōnia, pea nounou ‘a ‘enau mānavá.

Ngaahi Lāunga‘i ‘o Siainá

Kuo fakalalahi aipē ‘a e lāunga‘i ‘o Siainá kau ki he mafolamai ‘a e COVID-19. Na‘e fakataumai ‘e he Pule‘anga Siainá ‘a e ngaahi me‘angāue siví mei he Bioeasy, kā na'e totonu ke fakapapau‘i ‘e he Pule‘anga Siainá kimu‘a pea nau toki fakatau atu ki Sipeiní, lau ia ‘a e mataotao ngaahi ‘afea faka-tu‘apule‘angá, Gordon Chang ‘i hono faka‘eke‘eke ‘i he Fox News TV.

“Kuo hu‘ivai ‘e Siaina ‘a e vaikoná pea kuo nau fakatauatu ai mo hono faito‘ó,” lau ‘a Chang. Pea 'oku totonu ke holoki 'a e fakafalala 'a 'Ameliká ke ngaohi 'a e koloa kotoa 'i Siainá. 'I he hoko 'a e honge faka-tu'upakē pehē ni, 'oku fakatu'utāmaki ia ki he tau'atāina 'a e fonuá, fakamatala ia 'a Chang.

Ko e tala e loí mo e lolomi ‘o e totonú ‘e he Paati Kominiusi Siainá ‘oku ‘ikai kenau mā, pe tenau faka‘ehi‘ehi mei hono taki fakailifia‘i ‘a honau kakaí. Ko e lahi ‘o e ngaahi lāungá mei mulí ‘oku fakahangatonu pe ki he Sea Paati Kominiusí, Palesiteni Xi.

Kau ai ‘a hono ‘eke‘i ‘a honau fatongia mo‘uá ki he lahi ‘o e maté ‘i māmani lahí. ‘O ka na‘e ‘ikai kenau fakailifia‘i ‘a e kau toketā mo‘ui leleí ‘i he kamata‘angá, mo hono lohiaki‘i ‘a e WHO mo e kau toketā ‘Ameliká, na‘á nau mei lava ‘o ta‘ota‘ofi ‘a e vailasí COVID-19 mei he ‘ene mafola ki tu‘apule‘angá.

(Hokoatu Konga VII 'amuiange: "Ngaahi Fehālaaki 'a e WHO." Ko e liliu lea ‘a Sione Ake Mokofisi mei he fa‘u ‘a e faiongoongo ko Bomini Chakraborty, Fox News,‘i he lea Pilitāniá. 'Oku faiako Business Management 'i he Brigham Young University-Idaho, pea fa'utohi ta'u lahi 'i he lea Tongá mo e lea Pilitāniá).