Tapuni 'osi 'a Tonga mei ha toe folau mei muli Featured
23 Ma'asi, 2020. Kuo tu'utu'uni 'e he Pule'anga 'i he pongipongi 'o e 'aho ni ke tapuni 'a e ngaahi kau'afonua 'o Tonga pea 'ikai toe ngofua ha folau mai mei Tu'apule'anga.
Ko e konga pe 'eni 'a e ngaahi fokotu'utu'u 'a e Pule'anga ke malu'i 'a e fonua mei he mahaki faka'auha mo pipihi fakamamani lahi koe COVID-19 mei ha'ane hu mai ki he fonua.
'I he'ene pehe leva kuo ta'ofi ke toe tu'uta ha folau vakapuna ki Tonga ni 'o kamata he 'aho ni pea 'e toki fanongonongo ha taimi 'e toki faka'ataa ai 'a mui ange.
'Oku uesia foki heni 'a e ngaahi fepuna'aki fakavaha'a-Pule'anga 'a ia 'oku fakahoko 'e he ngahai Kautaha Vakapuna 'oku nau sevesi 'a Tonga ni hange ko e Kautaha Fiji Airways, Air New Zealand, Virgin Australia mo e Talofa Airways.
'I he taimi tatau 'oku poupou lahi 'a e kakai 'o e fonua ki he nga'unu ko'eni 'a e Pule'anga pea neongo 'oku te'eki ke fakapapau'i 'oku 'i Tonga ni 'a e mahaki pe 'ikai ka 'oku mahu'inga ange 'a e sinaki 'i ha'atau toki fakatomala kuo tomui.
