E‘amai ‘Uto‘i Niumotu‘u Kau Faiongoongo ‘Ameliká; Tafu e Afi Tu‘unga‘á ‘o e COVID-19 Featured
Ko Palesiteni Donald Trump mo 'ene Kapinetí 'oku nau fepātoosi mo e kau faiongoongo mei he ngaahi kautaha mītia lalahi 'o 'Ameliká. Na'e mahino lelei 'a e feinga 'a e mītiá ke fakailifia'i 'a e kakaí ko e faka-tu'unga'a 'o e COVID-19.
E‘amai ‘Uto‘i Niumotu‘u Kau Faiongoongo ‘Ameliká; Tafu e Afi Tu‘unga‘á ‘o e COVID-19
Fa‘utohi ‘a Sione Ake Mokofisi – Konga V
Washington, D.C., U.S.A. (Mā‘asi 20, 2020) – Kuo toki e‘a ho‘atā-mālie mai ‘a e mā‘ulalo ‘a e tu‘unga faka-‘atamai ‘o e kau faiongoongo ‘Ameliká ‘ihe ‘enau konifelenisi mo Palesiteni Donald Trump mo ‘ene Kapinetí ‘ihe pongipongi ‘aneafí. Mahinomai na‘a nau ōmai ke kikihi‘i ‘enau taumu‘á ko e fakalalahi ‘o ‘enau faka-tu‘unga‘á ‘o e mahaki COVID-19.
“Ko e hā ho‘o pōpōaki ki he kakaí ‘o ‘Ameliká ni ‘oku nau nofo tailiili ‘ihe ngaahi ‘ahó ni?” fehu‘iatu ia ‘a e tokotahá. Kuo ‘osi fakapapau‘i ‘e he tokotahá ni ‘oku nofo ilifia ‘a e kakaí kotoa kuo nau manavahē ‘ihe COVID-19. Ua ki aí, ‘okú tukuaki‘i ‘e he mītiá ko e fakalalahi ‘o e palopalemá ‘o e mahakí ko e kovi ‘a Trump mo ‘ene Kapinetí.
Pea ‘ihe hokoatu ‘a e fakamatala ‘a e kau mēmipa ‘o e Kapinetí, ko e tokolahi ‘o e ngaahi fehu‘í mei he mītiá na‘e fu‘u fakamā ‘aupito. Na‘e toutou feingamai ‘a e kau toketā ‘o feliuliuaki ‘enau fakamatala ke fakaikiikiange ‘a e ngaahi me‘a mahino ngofuá. Pea a‘u ‘o fu‘u fakamā ‘aupito ‘a e tu‘unga faka-‘atamai ‘o kinautolu tokolahi mei he ngaahi kautaha lalahi ‘o e mītiá ‘Ameliká.
U‘u Pē ‘a e Pī Ko Hono Hoká
Fehu‘i: Ko e kakai ‘e tokofiha kuo fakapapau‘i ‘e he faiongoongó ni ‘oku nau nofo tailiili pea mo ilifiá? ‘Ikai ko e lahi ‘o e faka-tu‘unga‘a ‘o e COVID-19 ko e ngāue ‘a e mītiá? Kuo nau kailangaki‘i ‘a e ngangana toko laumano ‘i Siaina ko ‘enau pihia ‘ihe mahakí, mo e toko lauafe kuo nau maté.
Ka e kehé, na‘e ‘ikai ke afe ‘a Trump mei hono tali fefeka‘i pea tafulu‘i kinautolu. Ki he faiongoongo ‘e taha: “Ko e fehu‘i ta‘etaau mo‘oni ena ‘oku ke ‘ekemaí,” taliatu ‘e Palesitení. “‘Oku ‘ikai teke fai ha me‘a ke faka-loto fiemālie ki he kakaí. Ko koé ko e faiongoongo kovitahá. ‘Oku faka‘amumai ‘a e kakaí ke ‘oange ha pōpōaki faka-lotolahi, pea ke ma‘u ai ha‘a nau ‘amanaki lelei.”
Lolotonga iá, ‘oku kei viviliatu pē ‘a e faiongoongó ni (Peter Alexander, NBC News) tokua ‘okú ne (palesitení) feinga pe ke taki hala‘i ‘a e kakaí. Pea toe feingaatu ‘a Trump ke fakamatala ‘oku ‘i ai ‘a e ‘amanaki lelei ki he fo‘i-‘akau faito‘o ‘oku ngalingali ‘e lava ‘o faka‘aonga‘i ki hono fakamo‘ui pea to‘o-tafia ai mei he kau fokoutua ‘ihe COVID-19.
Tokolahi e Kau Faka-tu‘unga‘á
“‘Oku ‘ikai ketau ‘ilo pe ‘e ola lelei pe ‘ikai, ka ‘oku ou lotolahi ke tau ‘ahi‘ahi‘i,” tali ‘a Trump.
Kuo fakalalahi ‘a e fakafekiki ‘a e faiongoongó ‘o ne pehē, ko e maumau taimi, pea ‘oku ‘ikai ha faito‘o pe fakamatala faka-fiemālie ki he kakaí. Hili ko iá, kuo fakamatala ‘e he Palesitení ‘oku kei lolotonga sivi‘i ‘e he FDA (Federal Drug Administration) ‘a e kalasi fo‘i-‘akaú kimu‘a pē ‘oku fe‘unga ke kamata hono faka‘aonga‘i ki he COVID-19?
Na‘e mahino ‘ihe fakamatala ‘a Trump mo ‘ene kau toketā ‘oku totonu ke sivi pē ‘oku malu ke ngāue‘aki ‘a e fo‘i-‘akaú. “‘Oku ‘ikai ketau ‘ilo pe ‘e ngāue pe ‘ikai,” feingaatu ia ‘a Trump ke faka‘uhinga lelei ‘enau fokotu‘utu‘ú.
Pea na‘e ‘ikai ko e tokotaha pē ko ‘eni ko ‘ene feinga tafu afi ki he mafola ‘o ‘enau faka-tu‘unga‘a ‘o e COVID-19. Na‘e fehu‘imai ‘a e toko ua pe ko e pōpōaki lelei ia ki he kakaí ke ne tafulu‘i ‘a e kau faiongoongo ‘okú nau fai fatongiá? Kuo nau fakafekikimai leva ‘ihe me‘a ta‘e‘uhinga ‘oku ‘ikai fenāpaasi mo e ‘ahi‘ahi‘i ‘o ha faito‘o ke to‘o-tafia ai ‘a e COVID-19.
