Faito‘o Fakamo‘ui COVID-19; Fuoloa Faka‘aonga‘i ki he Malēliá Featured
Kuo fakalalahi mai 'a e mafola 'o e COVID-19 'o pihia aipē mo e kau ngāue mo'ui leleí. 'Oku tāiliili 'a e kau taki 'o e Pule'angá na'a tokolahi 'o e kau ngāue mo'ui lelei mo ha'a nau fokoutua mo kinautolu.
Faito‘o Fakamo‘ui COVID-19; Fuoloa Faka‘aonga‘i ki he Malēliá
Fa‘u ‘a Sione Ake Mokofisi – Konga IV
Washington, D.C., U.S.A. (March 19, 2020) – ‘Oku ‘i ai ‘a e faito‘o kuo fuoloa hono faka‘aonga‘i (ta‘u ‘e 50) ‘i māmaní ki he fakamo‘ui ‘o to‘o-matafi ai ‘a e mahaki malēliá. Pea kuo faka-ngofua ‘e Palesiteni Donald Trump ke faka‘aonga‘i vavetahá ki he COVID-19 ‘i ‘Ameliká. Ko e tu‘utu‘uni ia ‘a Palesiteni Donald Trump ‘ihe pongipongí ni.
Ko e ongoongo fakafiefiá ni na‘e ‘ohake kia Palesiteni Trump ‘e he loea-faito‘o mo‘ui lelei ‘oku fale‘i ki he ‘apiako mo‘ui lelei ‘o e ‘Iunivēsiti ‘o Stanford, Palo Alto, California, ko Gregory Rigano, esq. Na‘á ne fakapapau‘i ‘a e ola lelei ‘o e fakatotolo mo e ‘ahi‘ahi faito‘o ‘a e toketā mo‘ui lelei ko Didier Raoult, M.D., Ph.D., ‘i Falanisē.
Faito‘o Malēliá: Palēkuineli (Plaquenil)
Na‘e pulusi ‘e Dr. Didier Raoult, Ph.D., ‘a e ola ‘o ‘enau sivi‘i ‘o e faito‘o Palēkuinelí (hydroxychloroquine: haitolokisī-kololokuini) ki he COVID-19 ,‘i he ‘Iunivēsiti Aix-Marseille, Falanisē, ‘i he uiké ni. Pea na‘e fakamo‘ui ‘o to‘o-matafi 100% ‘a e kau fokoutua COVID-19 na‘e kaungā sivi‘i ‘i he fakatotoló ni.
Na‘e kaumai foki mo e fakamatala ola tatau mei Kōlea Tonga mo Siaina ‘i he ‘enau ‘ahi‘ahi‘i ‘o e Palēkuineli ki he ‘enau kau fokoutua ‘i he COVID-19. Ko e faito‘o fo‘i-‘akau Palēkuinelí na‘e ‘osi fakangofua ke faka‘aonga‘i ‘i ‘Ameliká, mo māmani kotoá ‘ihe 1955.
‘Oku faka‘aonga‘i ‘ihe ngaahi ‘ahó ni ki he faito‘o ‘o e ngaahi mahaki kili (lupus erythematosus) mo e ngaahi mahaki langa-hui (rheumatoid arthritis). Pea ko e fo‘i-‘akau Palēkuinelí ‘oku ma‘ama‘a hono fakataú, kā ‘oku fiema‘u ‘a e tohi fakamo‘oni (prescriptions) mei he toketā mo‘ui leleí.
Palesiteni Trump: Vavetahá
Na‘e tali fiefia ‘e Palesiteni Trump ‘a e ongoongo mei a Dr. Raoult mei Falanisē. Peá ne fakangofua ‘a e Federal Drug Administration (FDA) ke fakavave‘i ‘a e fakapapau‘i ‘o e ‘aonga ‘a e Palēkuinelí ki he faito‘o‘aki ‘o e kau fokoutua ‘ihe COVID-19.
Lolotonga iá, ‘oku fakamaau ‘a e lao mei he Fale Alea Senato ‘o ‘Ameliká ‘a e ngaahi tokoni faka-pa‘anga $1,200 ki he kakai lalahí, pea $500 ‘a e fānaú. ‘Oku makehe eni mei he tokoni ki he ngaahi ngāue‘angá; ngaahi pisinisí; ngaahi kautaha vakapuná; ngaahi kautaha vaka-meilí, etc.
Na‘e hoko ‘a e ngaahi tu‘utu‘uni ‘a e palesitení ‘ihe konifelenisi mo e kau faiongoongó ‘ihe pongipongī ni ‘ihe ‘api nofo‘anga faka-palesitení, ko e White House. Pea fakahā ai ‘e he palesitení ‘a ‘ene lotolelei ke fakamo‘oni tohinima ki he ngaahi lao fo‘oú ni.
Sione Akemeihakau Mokofisi
(Hokoatu Konga V ‘a Sione A. Mokofisi ‘o kau ki he COVID-19 ‘amuiange. ‘Oku faiako Business Administration ‘i BYU-Idaho ‘i he kolisi BYU-Pathway Worldwide.)
