Kamata 'i Siulai totongi kolonitini kau folau kotoa pē mei muli ^Featured

Ko e palani fakaangaanga ko ení ne ‘osi tali ia ‘e he Kōmiti Fakafonua ki he Ngaahi Me’a Fakatu’upaké pea mo e Kōmiti ki hono Tokangaekina ‘o e Covid-19 ke fakahoko ha ngāue ki ai pea toki fakahū ange ke vakai’i. Ka tali ai pē ‘e he Kōmiti ‘e toki fakahū atu ki he Kapinetí ke fai hano aofangatuku.

Fakatatau ki he fakamatala ‘e Pule Lahi ‘a e Potungāue MEIDECC Paula Pouvalu Ma’u, “Na’e ‘osi tālanga’i pē ‘e he kōmití koe’uhí ko e fu’u mamafa ‘a e totongi kolonitiní. Ko hono kolonitini ha kau pāsese mei he vakapuna ‘e taha ‘i he Hotele Tanoa ‘oku meimei ofi ‘i he Pa’anga $600,000 ‘a e fakamole ki ai ‘a ia ‘oku fakafuofua ko e $4,000 ‘a e kolonitini ‘aho ‘e 21 ki he tokotaha.”

Vakapuna ki Sune

‘Oku ‘amanaki ke tu’uta ‘i he uike ‘uluaki ‘o Suné ‘a e vakapuná ‘e ua mei ‘Okalani, Nu’usila pea mo Brisbane, ‘Aositelelia. Ko e vakapuna mei Nu’usilá ‘e tu’uta ia ‘i Tonga ni ‘i Sune 2 pea ko e vakapuna mei Brisbane ‘e toki folau mai ia ki Tonga ni ‘i Sune 3.

Ko e vakapuna ko ia mei Brisbane ko e fuofua vakapuna ia ‘e ha’u ‘i he Polokalama ‘a ‘Aositelelia ko e Pacific Flight Program, ‘o ‘ikai ke  toe totongi ‘e he Ngaahi Kautaha Toli Fua’i ‘akaú.

Polokalama Huhu Malu’i Covid-19

‘I he’ene a’u mai ki he ‘aho ni, kuo ‘ova he toko 20,100 ‘a e kakai kuo nau ‘osi kau atu ki he Polokalama Huhu Malu’i Covid-19. Fakatatau ki he Talekita Mo’ui Le’ole’ó Toketa Reynold ‘Ofanoa kuo ‘osi a’u ‘a e polokalama ni ki he ngaahi kolo kotoa ‘o Tongatapu ni. Ko e uike ni ‘e toe takai pē ‘a e ngaahi timi ngāue mei he potungāué ke fakakakato ha ni’ihi na’e te’eki ai ke nau huhu malu’i.

Ko e uike kaha’ú ‘oku ‘i ai ‘a e palani ke nau fakatefito ‘i he ngaahi Senita ki he Mo’ui Lelei fakavahé pea ke fakafolau atu foki mo e huhu malu’í ki ‘Eua. ‘Oku ‘amanaki foki ke tu’uta ‘i Nuku’alofa ni ‘i he uike ni ‘a e uta hono ua ‘o e huhu malu’í ‘a ia ko e fo’i huhu malu’i fakakatoa ia ‘e 19,000.

- MEIDECC