Puke ‘e he kau Polisi faito’o konatapu fe’unga mo e pa’anga ‘Amelika ‘e $133,000. ^Featured

Ko hono puke ko’eni ‘e he kau polisi ‘a e faito’o ko’eni ‘oku fekau’aki tonu ia mo e uta na’e fou mei ‘Amelika pea iku kenau puke ai ha tangata ta’u 39 ‘o tauhi fakalao mo faka’eke’eke fekau’aki moe hia ni.

Na’e toe puke foki moha tangata ‘e taha ‘oku fekau’aki tonu mo e keisi ko’eni ka na’e toe ma’u ia mo e maliuana kuo ‘osi fa’o milemila ‘o teuteu atu ke fakatau.

‘I ha fakamatala mei he Pule ‘o e ‘Apitanga Polisi Nuku’alofa Tevita Vailea koe faito’o ko’eni ‘oki ‘i he kalasi fakatu’utamaki pea ‘oku malava kene uesia ‘a e mo’ui pehe foki ki he famili.

Na’e toe pehe foki ‘e Vailea ‘oku hoko ‘a e kumi pa’anga ‘a e kakai siokita ko’eni kene ‘omi ‘a e ola kovi ki he sosaieti mo e fonua fakalukufua.

Ko e kaveinga foki fekau’aki mo e faito’o konatapu 'oku lahi hono talanga'i he ngaahi 'aho ni pea na’e tukuaki’i mamafa foki ‘e he Palēmia ‘oku ‘ilo '‘a e Minisitā Polisi ki he kakai 'oku nau fetuku holo ka ‘oku ‘ikai hano mafai kiai pea ‘oku ‘ikai fakahoko ‘e he Potungāue Polisi ha ngāue kiai.