Fakatotolo’i kau Polisi fakapoongi ongo matu’a Siaina faka'osinga uike Featured
Koe 'ata 'o e ongo pekia fakataha mo 'ena me'alele 'oku lolotonga pulia. To'o mei he peesi facebook 'a Siosifa Alma Ata-Malolo
27 Fepueli, 2018. ‘Oku lolotonga hokohoko atu ‘a e fakatotolo 'a e kau polisi ki hono fakapoongi fakalilifu ‘oha ongo matu’a Siaina ‘a ia na’e ma’u hona sino ‘i ha ‘api ‘uta ‘i Lakepa 'i he faka'osinga 'o e uike.
‘I he fakamatala kuo tufaki ‘i he mitia fakasosiale ko e ongo matu'a Siaina ni 'oku 'i ai 'ena ngoue vesitapolo fakapisinisi pea ko 'ena vesitapolo 'oku fakatau ma'u mei he Maketi Talamahu.
Ko e ngoue vesitapolo 'a e ongo matu'a ni 'oku tu'u 'i Popua pea fakatatau ki he fakamatala 'oku fa'a pau'usi’i ‘e he to'utupu 'o e feitu'u ni ‘a e si’i ongo matu'a ni pea fakamanamana’i ke 'oange ha'anau tapaka pe sikaleti mo e ngaahi me'a kehe pe.
Ko hono fakapoongi ‘o e ongo matu’a ni fakatatau ki he fakamatala ‘oku ma’u neongo ‘oku te’eki kakato ‘a e ngaue ‘a e ma’u mafai na'e ngaue'aki 'a e me'a masila 'o hoka ki hona sino.
Ko e ongo matu’a ni ‘oku na ‘i he vaha'a ta'u nai 'o e 50 - 70.
Fakatatau ki he fakamatala 'oku ma'u 'oku 'i ai tokua hona hona foha pea ‘oku ‘i ai ‘ene falekoloa ‘oku tu’u 'i Halaleva.
Na'e kaiha'asi foki mo'ena me'alele Toyota Sparku 2000 'a ia 'oku lolotonga fekumi kiai 'a e kau Polisi.
‘Oku kau foki ‘eni ‘i he fakapo fakalilifu pea ‘oku lahilahi ‘a e hoko ‘a e mate makatu'unga 'i he fakapo moe tamate tangata ‘i he fonua ‘i he ngaahi ‘aho ni ‘a ia ‘oku ‘i ai ‘a e hoha’a lahi kiai ‘a e ma’u mafai.
'E malava foki ke uesia 'e he me'a ni 'a e va fengaue'aki 'o Tonga ni mo e Pule'anga Siaina.
