Tukuange ‘ehe kau Sula mo Fakatonuhia’i Nopele Tu’iha’ateiho tikite 6 na’e faka’ilo kiai ^Featured

1. Hu ta'engofua mo ha me'atau ki ha loto'a
2. Ta'ofi fakamalohi
3. Fakatupu moveuveu
4. Tamate'i ha puaka
5. Fana'aki ha mahafu 'i lotokolo,
6. Ma'u ha mahafu 'i lotokolo

Ko e hopo foki ko’eni na’e fakahoko ia he Fakamaau’anga Lahi pea na’e fili ‘e he tafa’aki Taukapo ma’a e Tu’iha’ateiho ke fakahoko ‘a e fakatonutonu ko’eni ‘i ha hopo sula.

Ko e hopo ko’eni na’e lele ia ‘i he ‘aho ‘e 8 ‘o kamata mei he ‘aho Monite 16 ‘o Sanuali pea toki aofangatuku he ‘aho ni 25 ‘o Sanuali ‘a e tu’utu’uni ‘a e kau sula.

Na’e fakamahino foki ‘e he Tu’i Fakamaau Lahi ‘i he hopo ko’eni ko e fatongia ‘o e Talatalaaki ‘a ia koe Kalauni ia ke fakamo’oni’i na’e fakahoko ‘e he Faka’iloa Lord Tu’iha’ateiho ‘a e ngaahi hia kuo tukuaki’i ia kiai (onus of proof) pea ke ‘oua ‘e toe ‘i ai ha veiveiua fakapotopoto (Beyond reasonable doubt) na’a ne fakahoko ‘eni.

Na’e faka’ilo foki ‘a e Faka’iloa Nopele Tu’i Ha’ateiho ‘i ha launga ‘a ‘Uluakimano Lokotui koe le’o ‘i he New Millenium Motors ‘i Ha’ateiho ‘o pehe ‘i he hengihengi 16‘o ‘Epeleli 2016 na’a ne halaloto’api ‘ikai ha ngofua pea na’a ne hu mo e me’atau ki he kelekele ‘o e New Millenium Motors ‘o fakatupu ai ha moveuveu pea na’a ne tauhi pilisone ai ‘a ‘Uluakimano Lokotui ‘o ‘ikai fakalao.

Na’e toe faka’ilo foki ki hano fana’i ha puaka ‘a Pulevalea Fisilau ‘i Ha’ateiho ‘i he ‘aho 20 ‘o Me 2016 ‘o ‘ikai ha ngofua pea maumau ai mo e lao ki he fana 'i he loto kolo. Na’e toe faka’ilo foki ‘a e Nopele ki hano tauhi ha fo’i mahafu .300 winchester magnum ‘ikai ha laiseni ‘i ha kumi koloa (search warrant) na’e fakahoko ‘e he kau polisi ‘i he ‘aho 4 ‘o Me 2016 ai pe.

Na’e ui foki ‘e he Kalauni ha kau fakamo’oni ‘e toko 10 ‘o kau ai ‘a e kau ‘ofisa polisi ‘e toko 3, pule fakavahe ‘o e vahenga ni moe ‘ofisa kolo ‘o Ha’eteiho mo e toko 4 kehe kae ui ‘e he tafa’aki ‘a e Taukapo ‘a e toko 3 ‘a ia ko Lord Tu’iha’ateiho, hono hoa Nicolette Veikune mo Utesoni Namoa ‘a ia koe Pule ia ‘o e Kautaha Millenium Motors.

‘I he aofangatuku ‘a e kau sula na’e mahino mei ai ‘a e ‘ikai lava ‘e he Talatalaaki ke fakamo’oni’i na’e hoko ‘a e ngaahi hia ko’eni ‘o pau ai ke tukuange ‘e he kau sula mo fakatonuhia’i ‘a Lord Tu’iha’ateiho 'i he ngaahi tikite kotoa na'e faka'ilo ia kiai.

Na’e tamate’i foki ‘e he Talatalaaki ‘a e tikite ki he fakatupumoveuveu kimu’a pea aofangatuku ‘a e tu’utu’uni ‘a e kau sula. Ko William Clive Edwards Sr. na’a ne fakafofonga’i ‘a Lord Tu’iha’ateiho pea ko Semisi Lutui na’a ne fkafofonga’i ‘a e Kalauni.