Tangi Feohi’anga Mo’ui Fo’ou ‘Ia Kalaisi ki he Fakamaau’anga Tangi Featured
Falelotu Feohi'anga Mo'ui Fo'ou 'i Ha'ateiho na'e tu'utu'uni 'e he Tu'i Fakamaau Lahi ke fakafoki ki he Siasi Tokaikolo 'Ia Kalaisi
8 Tisema, 2016. Kuo fakahū atu ‘i he 'aho ni ki he Fakamaau’anga Tangi ha tangi ‘a e Feohi’anga Mo’ui Fo’ou ‘Ia Kalaisi ‘o fekau’aki mo e tu’utu’uni ‘a e Tu’i Fakamaau Lahi ‘i he 'aho 9 'o e mahina ko Nōvema.
Na’e tu’utu’uni foki ‘e he Tu’i Fakamaau Lahi Owen Paulsen ‘o tali ‘a e ‘eke ‘a Siasi Tokaikolo ‘Ia Kalaisi ke fakafoki ‘a e koloa na’e tauhi ‘e he Feohi’anga Mo’ui Fo’ou ‘Ia Kalaisi hili ‘enau mavahe mei he Siasi Tokaikolo.
Na’e mavahe foki ‘a e Feohi’anga Mo’ui Fo’ou ‘Ia Kalaisi ‘o taki ‘e Sione Havili Maile mei he Siasi Tokaikolo ‘Ia Kalaisi ‘i he ta’u 2013 pea na’a nau puke ai pe ‘e he konga na’e mavahe mo Sione Havili Maile ‘a e koloa ‘i Ha’ateiho ‘o kau kiai ‘a e Falelotu, ‘Apiako mo e ngaahi Falenofo’anga Faifekau.
‘I ha fakamatala ‘a e Fakafofonga Lao ‘a e Siasi Tokaikolo ‘Ia Kalaisi William Clive Edwards na’a ne fakahā ai ‘oku mo’oni pea tau’ataina pe foki ‘a e tangi ‘o fakatatau ki he tu’utu’uni ‘a e lao ka kuo pau ke fakahoko ‘a e tu’utu’uni ia ‘a e Fakamaau’anga Lahi pea ‘oku fiema’u ke mavahe ‘a e Feohi’anga Mo’ui Fo’ou ia mei he koloa ‘o fakahoko ai pe ‘enau tangi.
‘Oku mahino pe foki ‘e toki fakahoko ‘a e sesoni ‘a e Fakamaau’anga Tangi ‘i he konga ki mu’a ‘o e ta’u 2017 ‘a ia koe ta’u kaha’u ia. 'Oku fakafofonga'i ai pe 'e Laki Niua 'a e Feohi'anga Mo'ui Fo'ou 'Ia Kalaisi ka e William Clive Edwards ma'a e SIasi Tokaikolo 'Ia Kalaisi.
