Ikuna Siasi Tokaikolo hopo mo e Feohi’anga Mo’ui Fo’ou ‘Ia Kalaisi Featured
Falelotu Siasi Tokaikolo 'Ia Kalaisi 'i Ha'ateiho
Nuku’alofa, 9 Novema 2016. Kuo tu’utu’uni ‘e he Tu’i Fakamaau Lahi Owen Paulsen ‘i ha’ane tu’utu’uni tohi peesi ‘e 56 ‘i he ‘aho ni ke fakafoki katoa ‘a e koloa ‘a e Siasi Tokaikolo ‘Ia Kalaisi ‘a ia ‘oku lolotonga puke mo tauhi ‘e he Feohi’anga Mo’ui Fo’ou ‘Ia Kalaisi.
Ko e hopo foki ‘eni ‘a e ongo tafa’aki ‘i he koloa ‘a e Siasi Tokaikolo ‘Ia Kalaisi ‘a ia na’e mavahe mo kinautolu na’e mavahe ‘o fokotu’u ‘a e Feohi’anga Mo’ui Fo’ou ‘Ia Kalaisi ‘o taki ai ‘a Sione Havili Maile. Ko e Talatalaaki ‘i he hopo ko’eni ko e Siasi Tokaikolo ‘Ia Kalaisi pea ko e kau Faka’iloa ko Sione Havili Malie, Sione Foliaki ‘Amanaki, Feohi’anga Mo’ui Fo’ou ‘Ia Kalaisi pea mo e Minisitā Fonua.
Na’e kamata foki ‘a e hopo ko’eni he mahina ko ‘Aokosi ‘o e ta’u ni 'o lele mai ai pe pea na’e toloi mai ‘a hono tala ‘o e tu’utu’uni ‘o toki fakahoko ‘i he aho ni. Ko e ‘isiū mahuinga foki ‘i he fakatonutonu ko’eni ko hono ‘eke ‘e he Siasi Tokaikolo ke fakafoki ange ‘a e koloa ‘a e Siasi ‘a ia ‘oku tu’u ‘i Ha’ateiho pea na’e tauhi mo ma’u ‘e he kau mavahe mei he Siasi Tokaikolo talu mei he mahina ko Siulai ta'u 2013.
Ko e koloa ko’eni ‘oku kau kiai ‘a e Falelotu, ‘Apiako, ‘Api Nofo’anga Faifekau pea mo e Holo. 'Oku taukave foki 'a e tafa'aki 'a e Taukapo koe koloa ko'eni na'e kole pe ia 'e Sione Maile ma'a Ha'ateiho pea na'e foaki 'a e kelekele kiate ia 'o kau ai mo hono fakahoko 'o e langa.
Na'e fakamahino 'i he tu'utu'uni 'a e Tu'i Fakamaau Lahi koe kelekele mo e koloa na'e fakahoko kotoa 'i he malumalu 'o e Siasi Tokaikolo 'Ia Kalaisi pea na'e langa faka-siasi foki.
Na’e fai foki ‘a e kole fakamolemole ‘a Sione Havili Maile mo e ni’ihi ‘o e Feohi’anga Mo’ui Fo’ou ‘Ia Kalaisi ‘i he konga ki mui ‘o e 2015 mo kole ke foaki ange ma’a kinautolu ‘a e koloa na’a nau mavahe moia.
Na’e ‘ikai tali ‘eni ‘e Dr. Liufau Vailea Saulala mo e Siasi Tokaikolo kae ‘oua kuo tu’utu’uni kiai ‘a e Konifelenisi ‘a e Siasi ‘o fakatatau mo 'ene Konisitūtone. Na’e ‘ikai tali ‘e he Konifelenisi ‘a e Siasi ‘a e kole he na’e tu’u fehu’ia ‘a e tu’unga ‘o Sione Havili Maile pea na’e ‘i ai ‘a e ni’ihi na’e ‘ikai loto ki he ha’u ‘a Sione Maile ‘o kole fakamolemole.
Ko e mavahe ko’eni 'i he 2013 na’e taki ai ‘a e Sekelitali malōlō ‘a e Siasi Tokaikolo Sione Havili Maile pea kau kiai mo hono kau muimui 'o kau kiai moe ni'ihi 'o e kau faifekau. Na’a nau fekau’i foki ke mavahe ‘a kinautolu na'a nau kei fiepiki ki he Siasi Tokaikolo mei he koloa mo e ‘api ko’eni ‘oku fai ai ‘a e fakatonutonu ‘i Ha’ateiho fakatatau ki he ngaahi fakamo'oni 'i he hopo ni.
Ko e me’a malie ‘i he hopo ni he ko e katoa ‘o e ngaahi taukapo na’e ‘omai mei he tafa’aki ‘a e Faka’iloa (Feohi’anga Mo’ui Fo’ou ‘Ia Kalaisi) na’e fakahā ‘e he Tu’i Fakamaau Lahi ‘oku ‘ikai kene tali ha taukapo ‘e taha ‘a ia ‘oku hā he palakalafi 111 peesi 55 ‘o e tu’utu’uni ‘a ia ‘oku fakalea ‘o pehe ‘i he lea faka-Pilitānia –
“I have rejected all the defences and will return the Ha’ateiho poperty to Tokaikolo”
‘I he palakalafi 31 ‘o e tu’utu’uni ‘a e Tu’i Fakamaau Lahi ai pe ‘a ia ‘oku hā he peesi 35 ‘oku 'asi ai ‘a e fakamatala ko’eni -
“Liufau Saulala’s evidence was that it was not his intention to gift the Ha’ateiho poperty to Sione Havili Maile or anyone else. I accept his evidence…
I found Liufau Saulala to be a credible witness. His evidence is consistence with the words that he used and entirely plausible in the circumstances under which they were spoken. He was unshaken in his evidence under cross-examination”
‘Oku fakavikiviki'i heni ‘e he Tu’i Fakamaau Lahi ‘a e fakamatala ‘a Dr. Liufau Vailea Saulala ‘o pehe koe fakamatala mo’oni mo hokohoko lelei pea ‘ikai ue’ia ‘i he taimi na’e fehu’i fakafihi ai ia ‘e he tafa’aki ‘a e Taukapo.
‘I he fakaikiiki leva ‘a e tu’utu’uni ‘a e Tu’i Fakamaau Lahi na’e anga pehe ni leva –
(a). ‘Oku talaki mo fakapapau'i ko e Siasi Tokaikolo ‘oku ‘anautolu 'a e totonu fakalao ki he koloa 'oku fai ai 'a e fakatonutonu ‘i Ha’ateiho pea ke fakafoki leva ki he Siasi Tokaikolo ‘a e koloa.
(e). Ke mavahe leva ‘a e kau memipa ‘o e Feohi’anga Mo’ui Fo’ou ‘Ia Kalaisi mei he koloa ‘a e Siasi Tokaikolo ‘i Ha’ateiho ‘i loto ‘i he ‘aho ‘e 30 ‘o kamata lau mei he ‘aho ni 9 Novema, 2016.
(f). Ke lēsisita leva ‘e he Minisitā Fonua ‘a e lisi ‘o e koloa ‘i Ha’ateiho ‘i he malumalu ‘o e Siasi Tokaikolo ‘Ia Kalaisi hange koia na'e fakamo’oni kiai ‘a Sione Havili Maile mo e Minisitā pea paasi ‘e he Tu’utu’uni Kapineti Fika 928.
(h). Ko e fakamole ‘a e Siasi Tokaikolo ’e fua kotoa ia ‘e he kau Faka’iloa ‘o e Feohi’anga Mo’ui Fo’ou ‘Ia Kalaisi
Na’e fakafofonga’i ‘a e Talatalaaki (Siasi Tokaikolo 'Ia Kalaisi) ‘e William Clive Edwards Sr. pea ko Laki Niu ma’ae tafa’aki ‘a e Taukapo (Feohi'anga Mo'ui Fo'ou 'Ia Kalaisi).
8 comments
-
Tuku atu aa 'a Kolomotu'a ia he koe ola tatau ai pe...tonu ke fakafoki mokomoko pe moe fakamole pa'anga pea fai ai pe ha kole.
-
Lava atu 'a Ha'ateiho kae toe mai 'a Kolomotu'a. Ko e ma'u'anga pe ia e mo'oni...
-
Malo kuo tau a'u kihe fkmaauanga pea mahino ae Tala Tuutuuni.
Nae fai ae kole fkmolemole kihe Siasi n Konifelenisi. Pea koe me'a Mahu'inga taha he lotu lelei kuo fkhoko pea ongona ae Fklelei ka oku ikai hs loto e hakea.
Kuo ha ae Lotu Lelei ia? Koe fale moe kelekele nae hoko ai ae hopo ni. Koe fu'u Kili'i me'a auha pe he fononga anga koeni.
Kuo ha ae Ofa fkkaunga Api ia ?
Ta koe Pole Lahi eni kihe Kau Lotu ?
Na'a mo'oni hiva ae lfks.....koe Ofa lau pe oku malanga'i he aho Tapu. .... -
Finau 'oku 'ikai koha toki hopo 'eni he va 'oha siasi. Na'e lahi ange 'a e hopo ia 'a STT pea mavaeua ai ki he Konisitutone pea koe me'a lelei e fakatonutonu ke ma'u 'a e mo'oni. Tuku e fakangalingali ia 'ikai ma'u ha mo'oni ia ai.
-
Romans 8: 28
"And we know that in all things God works for the good of those who love him, who have been called according to his purpose".
'Oku 'ikai 'aonga e tuhu holo. Ko e ki'i kelekele pe, mo e ki'i fale. Ka 'oka hala hoto loto mo e 'Otua, te ke ngata pe he sio kelekeleke mo e sio falee, ka te miss e taumu'a 'oku mahu'inga angee.
Chin up, look up & beyond! Toe 'ai ha kelekele 'e taha mo langa ha toe feitu'u 'e taha 'oku lahi angee. Tuku atu aa ia ma'a e kainga lotu ko ee. Koloa e lama hoto loto! -
Foki Sisu mei Langi o toe Ala pe
He oku vaivai ae fai a ho'o Siasi.
Ofa atu, he ko ho'o mou Ivi pe na'e langaki ae Siasi i Lalo i Lalo langina ni. -
Ko 'eku toki sio eni 'a'aku ha hopo 'oku involve lahi ai ha kau lotu i he fonua ni ... Sisu tokoni mai!
-
Kuo lava e fakatonutonu ko 'eni pea koe me'a totonu pe ia ke fakahoko fakatatau ki he lao. 'Oku 'ikai 'aonga e faka'alinga lelei he taimi pehe ni he koe 'uhinga ia hono fokotu'u 'o e Fakamaau'anga 'i ha fonua sivilaise pea koe lotu mo'oni ia koe kumi ki he Fakamaau Totonu 'o hange ko e akonaki 'a Folofola. Koe lahi pe 'a e laaulea koe 'ikai fai mo 'ave ki he feitu'u totonu pea tau'ataina leva 'a e ngaahi loto.