Fakatau Hotele Dateline ‘e he Kautaha Tano’a Group mei Fisi Featured
7 Ma’asi 2015
Na’e kamata he pongipongi ‘o e ‘aho ni Tokonaki ko hono 7 ‘o Ma’asi ‘a hono fakatau ma’ama’ama atu ‘e he Potungaue Pa’anga pehe ki he Ngaahi Palani Fakafonua ‘a e ngaahi koloa ‘i he Hotele Dateline ‘o kau ai ‘a e ngaahi mohenga, sea, tupenu kafu, ‘aisi, maama, naunau peito mo e ngaahi koloa kehekehe pe.
‘Oku makatu’unga ‘eni ‘i he fiema’u ke ‘ave katoa ‘a e ngaahi koloa ko’eni kimu’a pea hu mai ‘a e Kautaha Tano’a ‘o fakafo’ou mo hoko atu hono fakalele ‘a e hotele ni.
Fakatatau ki he fakamatala ‘a e CEO ‘o e Potunga Pa’anga mo e Palani Fakafonua Tatafu Moeaki, na’e lava lelei ‘a e alea mo hono fakamo’oni’i ‘a hono tuku atu ko’eni ‘o e Hotele Dateline ki he Kautaha Tano’a ‘i he ‘aho Tu’apululu ko hono 5 ‘o Ma’asi ‘a ia ‘oku tuku ai ‘a e uike ‘e taha ke fakakato kotoa ai ‘a e ngaue ‘a e Potunga kimu’a pea hu mai ‘a e kautaha fo’ou tene pule’i mo faklele ‘a e hotele ‘o kau ai mo hono langa fakafo’ou .
Na’e toe pehe ‘e Moeaki koe aleapau ko’eni ki he ta’u ‘e 99 ‘a ia ‘e tuku ai ‘a e lisi moe mafai ki he hotele ni ki he kautaha Tano’a.Na’e fakahoko foki ‘a e alelea moe kautaha tatau he ngaahi ta’u kuo maliu atu pea ‘ikai fakahoko ha felotoi ka ko’eni kuo maau malie pea kuo fai ‘a e feletoi ke foaki ‘a e hotele ki he kautaha ni. Ko e kautaha Tano’a ‘oku ‘ikai sola ha taha kiai he Pasfiki he ‘oku ‘i ai ‘enau ngaahi hotele ‘i Fisi, Ha’amoa, Nu’usila pehe ki he ngaahi motu kehe ‘i he pasifiki pea ‘oku nau taukei lahi ‘i he mala’e ‘o e fakalele pisinisi hotele.
Na’e fakaha foki ‘e Moeaki koe taimi loloa ‘e tuku ki he kautaha ni kenau fakahoko ‘a e ngaue ko’eni pea toki malava ke fakaava ‘a e hotele ni ‘o kau ai ki hono fakapapau’i ‘oku mate ‘a e fanga ki’i ‘inisekite ‘oku nau faka’auha ‘a e papa ‘a ia koe palopalema ia na’e fehangahangai mo e hotele ni. ‘Oku ‘ikai foki ke fakapapau’i pe ‘e malava ke fakaava ha konga lolotonga ‘a e katoanga Hilifaki Kalauni.
Na’e taa’i malie ‘a e kakai tokolahi ‘i hono ma’u ma’ama’a ‘a e ngaahi koloa mei he hotele ni pea ‘oku ‘i ai ‘a e ‘amanaki ‘e vave ‘a e foki ‘a e hotele talaa ni ki he taimi na’e ‘iloa’aki ai ‘a Tonga he kuo hili. 'Oku kau foki 'eni he ongoongo lelei ki he sekitoa takimamata pea na'e 'i ai foki 'a e faka'amu ke fei mo hoko 'a e ngaue ko'eni kae toe tokolahi ange 'a e kau folau'eve'eva.
'Oku ha atu foki he ngaahi 'ata 'i lalo 'a tu'unga 'oku 'i ai 'a e hotele 'i he teuteu ko'eni ke fakatau atu.
