Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Toe faka'ilo 'e Robyn Tu’ivakano ‘a Samuela ‘Akilisi Pohiva mo e Letio 87.5 ki he lau'ikovi'i Featured

Lady Robyn Tu'ivakano pea mo Lord Tu'ivakano 'a ia na'e fai hono lau'ikovi'i Lady Robyn Tu'ivakano pea mo Lord Tu'ivakano 'a ia na'e fai hono lau'ikovi'i

26 Tisema, 2017. Kuo fakapapau'i mai 'e he loea 'a Lady Robyn Tu’ivakano William Clive Edwards kuo toe faka’ilo ‘e Lady Tu’ivakano koe hoa 'o e Sea Malōlō ‘o e Fale Alea ‘o Tonga Lord Tu'ivakano ‘a Samuela ‘Akilisi Pohiva pehe ki he Letio 87.5 ‘a Katalina Tohi ki he fakalotokovi mo e lau’ikovi’i.

Ko e faka’ilo lau’ikovi’i foki ‘eni fekau’aki mo e ngaahi lea ‘a ‘Akilisi Pohiva lolotonga ‘a e kemipeini ‘a e Paati PTOA ki he fili Fale Alea ‘o e ‘aho 16 ‘o Nōvema ‘a ia na’e tukuaki’i ai tokua ‘e Pohiva mo e PTOA ‘a e Sea ‘o e Fale Alea Lord Tu’ivakano mo hono hoa ‘oku na kau atu ki hono fe’ave’aki ‘a e pa’anga ‘uli ki muli (money laundering).

Na'e 'osi faka'ilo foki 'e Lord Tu'ivakano 'a e ongo Faka'iloa tatau 'i he uike kuo maliu atu ka ko'eni kuo toe kau atu mo Lady Tu'ivakano 'i hono faka'ilo 'a e ongo Faka'iloa.

Ko e lea foki ‘eni na’e fakahoko ‘i he po’uli ‘o e ‘aho Tusite 17 ‘o ‘Okatopa ‘i he Holo Hoositea ‘i Fua’amotu lolotonga ‘a e kemipeini ‘a e Paati PTOA ma’a Penisimani Fifita pea na’e fakamafola fakahangatonu ‘i he letio 87.5 ‘a Katalina Tohi ‘a ia koe memipa pe moia ‘o e PTOA.

Na'e 'ikai foki ke ngata pe 'a e lau'ikovi'i ko'eni 'ia Lord Tu'ivakano kae na'e toe fakakau atu kiai mo hono hoa Lady Robyn Tu'ivakano 'o tukuaki'i tokua 'oku nau kau ki he lisi ‘o e toko 14 na’e ma’u mei he Pangikē Pule ‘oku nau kau atu ki he ‘ave pa’anga lalahi ki muli pea ko e pa'anga 'uli.

Ko e lisi koia 'oku pehe koe ma'u mei he Pangike Pule  kuo 'osi paaki mai 'e he Nusipepa “Talaki” Voliume 14 Fika 701 ‘o e ‘aho Tusite 7 ‘o Novema 2017 pehe ki he Ongoongo 'i he ngaluope 'a e Kaniva  'o he 'aho.

'Oku fehu'ia mamafa foki 'e Edwards loea 'a Lady Tu'ivakano 'a ia 'oku ne toe fakafofonga'i 'a Lord Tu'ivakano 'a e tu'unga fakalao hono tukuange 'o e lisi ko'eni he 'oku 'ikai ngofua 'i he lao 'eni pea 'oku lolotonga fakahoko 'a e ngaue kiai.

‘Oku mahino pe foki ia kuo pau ke lekooti ‘e he Pangikē Pule ia ‘a e kau ‘ave pa’anga lalahi ki muli ka ‘oku ‘ikai ‘uhinga ia ‘oku hoko hano ‘ave ‘a e pa’anga ‘uli pe koe money laundering hange koia koe tukuaki’i ‘a Pohiva mo e PTOA pea 'oku te'eki ke faka'ilo pe ta'ofi 'e he Pangikē Pule 'a e fe'ave'aki pa'anga ko'eni he 'oku 'i ai hono lao mo hono tu'utu'uni.

'I he fakamatala 'a Edwards 'oku lahi 'a e ngaahi fakatonutonu fakalao fekau'aki mo e lau'ikovi'i ko'eni 'a ia na'e fakataumu'a faka-kemipeini ki he fili Fale Alea kuo tau situ'a kiai ke tohoaki'i 'a e loto 'o e kakai pea kuo maumau ai 'a e ongoongo 'o e kau ma'u tu'unga mo e kakai tokolahi 'a ia 'oku 'uhinga ai 'a e fakatonutonu ko'eni.

9 comments

  • Vavau Lahi
    Vavau Lahi Thursday, 18 January 2018 12:35 Comment Link

    Ko e fo'i loi 'e'e... foki 'e taha na'e toutou lea 'a 'Akilisi 'o pehe ko e ngaue ki he paasipooti kuo mei kakato. Ngaahi 'aho si'i pe mei heni kuo mahino. Ka toe mahino mai 'a e fo'i loi ko eni 'a fe'ia. Kuo tui e si'i kakai ta'emahino ki he fu'u lo ko eni pea kuo 'alu ia 'o tokoto falemahaki, hei'ilo pe 'e toe sai pe 'ikai. Ka ko fe me'a na'a ne lau.

    Report
  • Emasi utulangivaka
    Emasi utulangivaka Thursday, 18 January 2018 10:37 Comment Link

    Osi ange tuumalie a clive edward ka koe fehui e taha koe paanga lahi oku fkhu e Lord Tu’ivakanō mei fe

    Report
  • Aisea Matiu
    Aisea Matiu Wednesday, 27 December 2017 19:54 Comment Link

    'Oku 'ikai nai 'e Genial Ngungutau'a Tonga ke ke feto'oaki faka'atamai mo fakangaue hono mo'oni 'a e kehekehe 'o e "psychological tactic" mo e "legal tactic'' ko e ongo me'a kehekehe hange ko e kehekehe 'a e meleni mo e paingani?"

    'Oku 'ikai nai ko e "psychological tactic" e 'oku fai 'e 'Akilisi Pohiva mo Katalina Tohi hono ngaue'aki 'a e Letio 87.5 'a e PTOA he'enau malanga mo e kemipeini falealea mo e PTOA ke fakakuihi 'a e 'atamai mo fakakonahi 'a e loto 'o e kakai he funga 'o e lotokovi mo e taufehi'a?

    'Oku 'ikai nai ko e "legal tactic" e 'oku fai 'e Nopele Tu'ivakano mo Leiti Robyn Kaho hono fakatonutonu fakalao 'a e fakakuihi mo e fakakonahi 'a 'Akilisi mo Katalina 'oku taku ke ma'u 'a e me'a 'oku mo'oni mo e lelei mo e me'a 'oku loi mo kovi?

    'Oku ngalingali na'e kau 'a Genial he kau kona mo e kau kui tokolahi 'a 'Akilisi mo Katalina mo e PTOA he'ene feto'oaki faka'atamai mo fakangaue 'a e ongo me'a matu'aki kehekehe ko 'eni 'e ua ko e "psychological tactic' mo e "legal tactic!"

    Report
  • Aisea Matiu
    Aisea Matiu Wednesday, 27 December 2017 12:23 Comment Link

    'Oku tefito 'a e laukovi mei he lotokovi pea tupu 'a e lotokovi mei he meheka pea tupu 'a e meheka mei he taufehi'a pea tefito kotoa 'a e laukovi, lotokovi, meheka mo e taufehi'a he loi mo e faasitu'u pea tupu mei he loi mo e faasitu'u 'a e ta'efaka'apa'apa, siokita, siomafai mo e ta'efieauna pea kotoa 'o kinautolu ko e mahaki faka'atamai mo e puke fakaloto 'oku tupu mei he vale mo e masiva'ilo ka e 'ikai 'ilo, poto mo e mahino.

    'Oku lolotonga puke mo mahaki'ia 'a e tokolahi 'o Tonga he siemu fakatu'utamaki ko 'eni kuo fakamafola mo fakapipihi 'e 'Akilisi (o 'ene nusipepa ko e "Kele'a") 'o kau ai mo Katalina (mo 'ene letio ko e 87.5) hono fakakuihi 'a e 'atamai mo fakakonahi 'a e loto 'o e kakai 'o tefito he loi mo e kovi 'o hange ko 'ena lau'ikovi'i ko 'eni 'a Nopele Tu'ivakano mo Leiti Robyn Kaho.

    'Oku mo'oni lahi 'a e 'atikolo faka'etita malie 'a e 'Etita he Nepituno ko e konga pe 'eni 'o e saikolo 'a e taufehi'a he tuku'au fakahisitolia 'o e liliu fakapolitikale hono fakakuihi 'a e 'atamai mo fakakonahi 'a e loto 'o e kakai ke taufehi'a, lototangia, 'itengia mo fakalili'a ki he kau ma'u mafai, tu'i mo e hou'eiki, kau pisinisi mo e kakai ngaue, kau ako mo e kau poto pea a'u mai 'eni ki he kau lotu mo e lotu (na'a nau hela mo ongosia he ngaue ka nau tatakoto pe kinautolu) 'a ia 'oku fai kotoa kinautolu he lotokovi, meheka, taufehi'a, ta'etoponi, ta'efaka'apa'apa, ta'eufi mo e ha fua.

    Report
  • Nakulukilangi
    Nakulukilangi Tuesday, 26 December 2017 14:13 Comment Link

    Kuo lau kilu 'a e mo'ua 'a 'Akilisi 'i he Fakamaau'anga mo'ene Nusipepa koe Kele'a pea na'e toki totongi atu 'a e mo'ua kilu 'o Mateni i he Fakamaau'anga he lau'ikovi'i ai pe. 'Oku tau fifili ki he tui kuikui 'a si'i kakai. Nau mo'ua pe ka kei fai pe lolotu moe tui kuikui. 'Oku fu'u faka'ofa fau pea 'oku tau faka'amu ke 'aa aa e kakai Tonga.

    Report
  • Genial Ngungutau’a Tonga
    Genial Ngungutau’a Tonga Tuesday, 26 December 2017 13:46 Comment Link

    Koe taha pe ena fo’i Psychological tactic a Lord Tu’ivakano.

    Report
  • Sione Folauhola
    Sione Folauhola Tuesday, 26 December 2017 13:10 Comment Link

    'OKu mo'oni e lau 'a Manu Tuli 'e 'i ai pe 'aho 'e taha. Kapau 'oku lohiaki'i mo takihala'i e kakai 'e 'iai pe hono ngata'anga.

    Report
  • Kaufusi
    Kaufusi Tuesday, 26 December 2017 13:09 Comment Link

    Kumi mai e kotoa o e toko 14 kenau fakahoko mo ha fakailo foou. Ikai oo 'o ai ha kemipeini langa fonua kae oo 'o ngutulau. Saaai aupito.

    Report
  • Vikita Tausii
    Vikita Tausii Tuesday, 26 December 2017 12:25 Comment Link

    Fakahela 'ena ia he 'e totongi pe ia 'ehe Pule'anga e mo'ua...malie ee...

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top