Sipoti Komoniueli: Ola kuo a’usia ‘e he fanau sipoti ‘o e Timi ‘a Tonga. ^Featured

Fuhu (Boxing)

Kuo lava atu eni ‘a e fe’auhi ‘a e fanau fuhu ‘e toko 4, ‘a ia ko John Moleni (Men’s 69kg),Salote Huni (Women’s 75kg), Samiuela Kei (Men’s +91kg) pea mo Magan Maka (Women’s 69kg).

Ko Magan na’e fuhu ‘aneafi pea ne ‘ulungia ai ‘ia Rosie Eccles ‘o Uelesi ‘i he fo’i poini ‘i he kuatafainolo.

‘Oku ‘amanaki atu leva ki he fuhu faka’osi ‘a ia ko Tu’ihalangingie Vea (Men’s 60kg) ‘i he ho’ataa ni taimi ‘Aositelelia (13.47hr), (Monite 9 ‘Epeleli) pea mo Jean John Colin mei he ‘otu motu Mauritius.

Teka Pulu (Lawn Bowls)

‘Oku ‘amanaki ke kamata ‘a e fe’auhi tauhoa ‘a e kakai fefine (Women’s Pairs) ‘i he ‘aho ni, pea ‘e fetaulaki ai ‘a Tonga, ‘a ia ko Malia Kioa mo Caroline Dubois pea mo Norfolk Island, ‘a ia ‘e va’inga mai ai ‘a Shae Wilson mo Carman Anderson.

Kakau (Swimming)

‘E kau atu ‘a Charissa Panuve ki he fe’auhi kakau mita ‘e 50 Backstroke ‘a e kakai fefine fakafuofua taimi 10.49 pongipongi (pe ko e 1.49 efiafi ia ‘i Tonga) ‘i he lova hono ua (Heat 2).

‘Atelita (Athletics)

‘E kamata ai pe he ‘aho ni mo e fe’auhi ‘Atelita pea ‘e kau atu ‘a Talatala Po’oi ki he lova hono ua (Heat 2) ‘o e hetolo mita 110 ‘a e kakai tangata.

Ko Atamaama Tu’utafaiva ‘e toki f’eauhi ia he tolo me’a mamafa ‘a e kakai fefine he ‘aho Tu’apulelulu ai pe ‘o e uike ni.

Hiki Me’a mamafa (Weightlifting)

‘Oku fe’auhi ai pe mo Sateki Langi ‘i he ‘aho ni ‘i he fe’auhi sivi faka’osi (final) ‘a e Hiki me’amamafa ‘a e Kakai Tangata he kilo ‘e 105 (Men’s 105kg).

Fana (Shooting)

‘E kamata ‘a e fe’auhi ‘a Henry Liutai ‘i he ‘aho Tua’pulelulu ki he ‘uluaki takai ‘a e fe’auhi fana ‘a e kakai tangata he taketi (Men’s Trap).

Ongoongo Nounou

Na’e kau atu foki ‘a e Sekelitali Seniale, Takitoa Taumoepeau ki he polokalama foaki metali ‘o e fe’auhi Hiki me’amamafa ma’ae kakai tangata he kilo ‘e 94 (Men’s 94kg).

Na’e ikuna heni ‘e he fakafofonga mei Papua Niukini (Steven Kari) ‘a e metali Koula mei hotau potu tahi ‘o e ‘Osenia.

Na’e foaki ‘a e metali ‘e he Minisita Sipoti ‘a e vahenga Kuinisilani pea foaki leva ‘e Takitoa ‘a e me’a’ofa ki he kau ikuna.

‘Oku mo’ui lelei pe ‘a e fanau sipoti pea pehe ki he kau ‘ofisa pea ‘oku hokohoko atu ai pe ‘a e teuteu ‘a e ni’ihi ‘oku kei hanga mai ‘enau ngaahi fe’auhi hange koi a kuo ‘oatu ‘i ‘olunga.

‘Oku kei kole atu ai pe ke mo u manatua mai si’i fanau sipoti ‘i ho’omou ngaahi lotu mo e hufia.

Tepile ‘o e Metali

‘I he’ene a’u mai ki he ‘aho ni, ‘oku taki pe ‘a ‘Aositelelia mo e metali fakakatoa ‘e 84, ‘a ia ko e koula ‘e 31, siliva ‘e 25 mo e polonise ‘e 28. Pea mei hotau ngaahi fonua kaunga’api, ko Papua Niukini (metali ‘e 3, Koula ‘e 1 mo e Siliva ‘e 2), Samoa (Siliva ‘e 1), Fisi (Polonise ‘e 1), Solomone (Polonise ‘e 1) mo Norfolk (Polonise ‘e 1).

Ko e ngaahi ola mo e metali kuo ‘ikuna ‘e hotau ngaahi fonua kaunga’api ko e ma’u kotoa pe mei he Hiki me’amamafa (Weightlifting).