Kōveti-19: ‘Ilo, Fonua, & Tala ^Featured

Kōveti-19: ‘Ilo, Fonua, & Tala

‘Oku ma‘u mei he mahaki pipihi, faka‘auha, moe tāmate (pē penitēmiki [pandemic]) fakamamanilahi koe Kōveti-19 ‘ae ngaahi ‘ilo (moe poto) fo‘ou ‘oku fa‘oaki he fonua (pē kakai moe ‘ātakai) mo fetu‘utaki he tala (pē lea) koe ongo vaka fakafonua pē fakasōsiale, ‘o hangē koe lea ‘Ingilisi koe Covid-19 koe ma‘u mei he ngaahi lea ‘Ingilisi koe ‘corona,’ ‘virus,’ moe ‘two-thousand and nineteen’ (pē 2019), ‘o fakanounou koe ‘Covid-19’ mei he ‘coronavirus disease 2019,’ ‘aia na‘e fua ‘ilo he 2019 ta‘u.

‘Oku toe ui fakaloloa pē ‘ae ‘Kōveti-19’ (Covid-19) koe ‘kolonavailasi’ (coronavirus) ‘o toe ‘uhinga ‘ae ‘kolona’ (corona) koe ‘kalauni’ (crown), ‘o hangē hono fuo ‘oe ‘vailasi’ (virus) he‘ene ‘asi hono ‘ata-ki-loto he me‘afaka‘ataofi pē maikolosikope ha kolona pē kalauni.

Na‘e hoko ‘ae me‘a tatau he mahaki penitēmiki (pandemic) fakamamanilahi koe Spanish Influenza na‘e tō he 1918, ‘o fakanounou pē hono hingoa ‘Ingilisi koe ‘flu,’ ‘aia kuo liliulea Tonga ‘o ui koe ‘fulū.’

‘Oku ngāue‘aki lahi he tō koia ‘ae Kōveti-19 he lotolotonga ni koe faingata‘a lahi ‘oku fepaki mo fekuki mo mamani he feinga mo‘ui he fakalilifu, fakailifia, mo fakamanavahē ‘ae pipihi, faka‘auha, moe tāmate ‘ae mahaki ‘ae lea ‘Ingilisi koe ‘resilience,’ ‘aia ‘oku ‘uhinga lalahi ‘e ua koe (1) koe mafao, mafusi, mahamu pē mateke ‘aha me‘a ‘oku fano pea toe foki pē ki hono fua, motu‘a pē tomu‘a tu‘unga pē tūkunga he funga ‘oe fefusiaki-fetekeaki ‘ae ivi, ‘o hangē koe to‘onga ‘ae maea, sipilingi, pē leta moe (2) koe malava pē mafeia ke toe foki mei he tu‘ungatāmaki pē tukungatāmaki kihe tu‘ungamālie pē tukungamālie, ‘o hangē ko hono ngāue‘aki ‘ae lokatāpuni pē lokatauni mo nofo fakamavahevahe mo fakataautaha fakataha moe pūloa moe haisini moe ‘ilo (moe poto) ‘oku ngaohi‘aki ‘ae faito‘o huhuta‘ofi pē vekisini, ‘aia koe ola ‘ae fekumi moe fakatotolo faimatekina mo ta‘ematukutuku ‘ae kau toketā moe kau saienitisi he mala‘e ‘oe faito‘o moe saienisi.

‘Oku ofi ‘ae ‘uhinga ‘oe ‘resilience’ he ongo lea Tonga mālie koe ‘fakahēhē mahaki’ moe ‘fakaakeake faingata‘a,’ ‘o fakatoutonu kihe Kōveti-19, ‘aia ‘oku ne fakatupu ‘ae hēhētu‘u ‘ae ‘atamai moe loto he faingata‘a vivili ‘oe mahaki pipihi, faka‘auha, moe tāmate ‘oku toloto ai ‘ae sino.

‘Oku vaetu‘ua ‘ehe Kōveti-19 ‘a mamani kotoa mei he tu‘unga faingamālie (state of normality) kihe tūkunga faingatāmaki (state of emergency), ‘o mavahe mei he nofo fakatahataha (physical-social connection-inclusion) kihe nofo fakataautaha (physical-social isolation-exclusion).

‘Oku tupu heni ‘ae faka‘amu moe fiema‘u vave ke kumi ha ‘nōmolo fo‘ou’ (new normal) ‘oku humaki he ‘fetauhi‘aki, fetokoni‘aki, moe fevahevahe‘aki’ (taking-giving, caring & collective interest) he funga ‘oe ‘fakatau‘atāina’ (liberation) mei he nōmolo motu‘a (old normal) ‘oku hunuki he ‘fe‘au‘auhi, fakaehaua, moe siokita’ (competing, exploiting & self-interest) he funga ‘oe ‘fakapōpula’ (domination).

Tau toki hoko atu.

Leveleva ē malanga kae tau,

‘Ofa atu fau & manatu ma‘u,

Fetongikava Dr Viliami Uasikē Lātū &

Hūfanga-He-Ako-Moe-Lotu Palōfesa Dr ‘Ōkusitino Māhina