Fakapekia Tikite ‘e 6 Hopo 'a Lord Tu’ivakano ‘ikai ha fakamo’oni fe’unga ^Featured

Na’e fokotu’u ‘e Talekita Va’a Talatalaaki (Director of Public Prosecution) ‘a e Pule’anga Semisi Lutui ki he Fakamaau’anga ‘i he pongipongi ‘o e ‘aho ni ‘a e loto ‘a e ‘Ateni Seniale fakatatau kihe mafai kuo foaki kiate ia 'e he Konisitutone ke fakapekia ‘a e ngaahi faka’ilo ko’eni.

Na’e makatu’unga foki ‘a e fokotu’u ko’eni mei he fokotu’u mei he Tu’i Fakamaau Lahi na’a ne tataki ‘a e hopo sula ko’eni ‘i he efiafi ‘aneafi Tu'apulelulu 5 'o Ma'asi ‘oku ‘ikai ha fakamo’oni fe’unga ke fakahoko ‘aki hono tukuaki’i ‘o Lord Tu’ivakano pea koe faka’ilo ‘e 6 ko’eni ‘oku ‘ikai ke fakapotopoto pea ‘oku totonu ke tamate’i.

Na’e toe fakamahino ‘e he Tu’i Fakamaau Lahi fakatatau ki he fakamatala ‘a e loea taki ‘i he timi taukapo ‘a e Faka’iloa William Clive Edwards ‘e ‘ikai fakapotopoto ke tukuange ki he Hou’eiki Sula kenau fakahoko ha’anau tu’utu’uni makatu’unga ‘i he ‘ikai ha fakamo’oni fe’unga.

Na'e uike 'e 3 foki 'a e lele 'ae  tafa'aki 'a e Talatalaaki pea 'oku mahino mai mei he tu'unga 'oku a'u kiai 'oku 'ikai ha fakamo'oni tene talamai na'e fakahoko 'e Lord Tu'ivakano hano fe'ave'aki 'a e pa'anga 'uli na'e ma'u mei ha hia pea na'a ne fakahoko ha totongi fakafufu ke fakaloto'i ia ke foaki ha ngaahi tohi ngofua folau (paasipooti).

'I hono fakalea 'e taha na'e 'ikai malava 'e he Talatalaaki ke fakahoko hono fatongia ko hono fakamo'oni'i 'ikai ha toe veiveiua fakapotopoto (prove beyond reasonable doubt) na'e fakahoko 'e Lord Tu'ivakano 'a e ngaahi hia 'oku tukuaki'i ia kiai 'i he Tikite Faka'ilo 'e 6 ko'eni.

'I he taimi tatau foki 'oku 'ikai ke faka'ilo 'a Lord Tu'ivakano ia fekau'aki mo ha'ane ngaue hala fekau'aki moha ngaahi paasipooti.

Na’e faka’ilo foki ‘a Lord Tu’ivakano ki he tikite ‘e 10 ‘a ia koe;

Tikite ‘e 1 ki hono fe’ave’aki fakafufuu ‘o e pa’anga (Money laundering);
Tikite ‘e 1 ki he Fakamatala Loi (Making false declaration);
Tikite ‘e 1 ki he fuakava loi (Perjury);
Tikite ‘e 5 ki he Totongi fakafufuu (Bribery); mo e
Tikite ‘e 2 ki he ma’u mo tauhi e mahafu mo e me’atau (Possessions of arms & ammunition).

Ko e tikite ‘e 6 ko’eni ‘oku fakapekia koe tikite ‘e 5 fekau’aki mo hono tukuaki’i ki he totongi fakafufu ke fakaloto’i ia kene foaki ‘i he funga ‘o e filifilimanako ‘a e paasipooti ‘e 12 ki he kau Siaina. 

Ko e tikite leva ‘e 1 ko hono faka’ilo ia pea tukuaki’i na’a ne fe’ave’aki fakafufuu ‘o e pa’anga (Money laundering) na’e ma’u mei hano fakahoko ha hia.

Ko e fakaikiiki leva ‘eni ‘o e ngaahi Tikite na'e fakapekia koe 'ikai ke malava ke fakamo'oni'i:

Tikite 1

‘Eiki Tu’ivakano ‘o Nukunuku, ‘i he pe ofi ki he aho 18 ‘o Novema 2013, ‘i Nuku’alofa, lolotonga ho’o le’ole’o ‘i he lakanga ko e Minisita ‘o e Potungaue ki Muli, na’a ke ma’u ‘a e TOP$199,408.94, meia Sien Lee mo Ying Huang Lee, ke fakaloto’i koe ke ke filifilimanako ‘i hono fakakaukau’i ‘a e ngaahi kole tohi fakangofua ke folau ‘a Shanoi KAM, Sinkei LOU, Orlandoni WONG, Li Hong ZHENG, Ning Chuan ZHONG, Guo Hua WANG, Xin Lin WANG, Zheng Wang CAI, Li YANG, Rui Yun WANG, Xue Chun LI mo Li Hua Zhang, na’e fakahu ki he Va’a ki he Kakai Hu Mai ‘o e Potungaue Ki Muli.

Tikite 2

‘Eiki Tu’ivakano ‘o Nukunuku, ‘i he pe ofi ki he aho 29 ‘o Novema 2013, ‘i Nuku’alofa, na’a ke faka’aonga’i ‘a e $199,405.94, a ia na’e ‘i ai ‘a e ngaahi makatu’unga fakapotopoto ke ke mahalo’i na’e ma’u fakahangatonu pe ta’e fakahangatonu ia mei hono fakahoko ha hia mamafa, ‘aki hono ‘ave ‘a e $199,405.94 koia, ‘i he taumu’a ke fakapuliki ‘a hono tupu’anga ta’efakalao, ‘aki ‘i ho’o ma’u ‘a e $199,405.94 meia Sien Lee mo Ying Huang Lee, pea na’a ke fakatupu ke fakahu atu ia ki ho’o akauni no fale ‘i he pangike BSP Tonga, akauni fika 2000425153.

Tikite 3

‘Eiki Tu’ivakano ‘o Nukunuku, ‘i he pe ofi ki he aho 23 ‘o Siulai 2014, ‘i Nuku’alofa, lolotonga ho’o le’ole’o ‘i he lakanga ko e Minisita ‘o e Potungaue ki Muli, na’a ke ma’u ‘a e TOP$9,178.78, meia Ying Huang Lee ‘o fakafou mai ‘i ho uaifi ko Joyce Roybn Tu’ivakano, ke fakaloto’i koe ke ke filifilimanako ‘i hono fakakaukau’i ‘a e ngaahi kole tohi fakangofua ke folau ‘a Shanoi KAM, Sinkei LOU, Orlandoni WONG, Li Hong ZHENG, Ning Chuan ZHONG, Guo Hua WANG, Xin Lin WANG, Zheng Wang CAI, Li YANG, Rui Yun WANG, Xue Chun LI mo Li HUa Zhang, na’e fakahu ki he Va’a ki he Kakai Hu Mai ‘o e Potungaue Ki Muli.

Tikite 4

‘Eiki Tu’ivakano ‘o Nukunuku, ‘i he pe ofi ki he aho 20 ‘o Novema 2014, ‘i Nuku’alofa, lolotonga ho’o le’ole’o ‘i he lakanga ko e Minisita ‘o e Potungaue ki Muli, na’a ke ma’u ‘a e TOP$3000, meia Sien Lee ‘o fakafou mai ‘i ho mokopuna ko Jordan Kaho, ke fakaloto’i koe ke ke filifilimanako ‘i hono fakakaukau’i ‘a e ngaahi kole tohi fakangofua ke folau ‘a Shanoi KAM, Sinkei LOU, Orlandoni WONG, Li Hong ZHENG, Ning Chuan ZHONG, Guo Hua WANG, Xin Lin WANG, Zheng Wang CAI, Li YANG, Rui Yun WANG, Xue Chun LI mo Li HUa Zhang, na’e fakahu ki he Va’a ki he Kakai Hu Mai ‘o e Potungaue Ki Muli.

Tikite 5

‘Eiki Tu’ivakano ‘o Nukunuku, ‘i he pe ofi ki he aho 28 ‘o Novema 2014, ‘i Nuku’alofa, lolotonga ho’o le’ole’o ‘i he lakanga ko e Minisita ‘o e Potungaue ki Muli, na’a ke ma’u ‘a e TOP$5000, meia Sien Lee ‘o fakafou mai ‘i ho mokopuna ko Jordan Kaho, ke fakaloto’i koe ke ke filifilimanako ‘i hono fakakaukau’i ‘a e ngaahi kole tohi fakangofua ke folau ‘a Shanoi KAM, Sinkei LOU, Orlandoni WONG, Li Hong ZHENG, Ning Chuan ZHONG, Guo Hua WANG, Xin Lin WANG, Zheng Wang CAI, Li YANG, Rui Yun WANG, Xue Chun LI mo Li HUa Zhang, na’e fakahu ki he Va’a ki he Kakai Hu Mai ‘o e Potungaue Ki Muli.

Tikite 6

‘Eiki Tu’ivakano ‘o Nukunuku, ‘i he pe ofi ki he aho 31‘o Tisema 2014, ‘i Nuku’alofa, lolotonga ho’o le’ole’o ‘i he lakanga ko e Minisita ‘o e Potungaue ki Muli, na’a ke ma’u ‘a e TOP$10000, meia Sien Lee ‘o fakafou mai ‘i ho uaifi ko Joyce Roybn Tu’ivakano, ke fakaloto’i koe ke ke filifilimanako ‘i hono fakakaukau’i ‘a e ngaahi kole tohi fakangofua ke folau ‘a Shanoi KAM, Sinkei LOU, Orlandoni WONG, Li Hong ZHENG, Ning Chuan ZHONG, Guo Hua WANG, Xin Lin WANG, Zheng Wang CAI, Li YANG, Rui Yun WANG, Xue Chun LI mo Li HUa Zhang, na’e fakahu ki he Va’a ki he Kakai Hu Mai ‘o e Potungaue Ki Muli.

Kuo tali halaia foki ‘a Lord Tu’ivakano ki he Tikite Fika 9 ko hono ma’u ia moe me’atau pea ‘oku toe pe ‘a e Tikite ‘e 3 ‘a ia ko e Tikite ‘e 1 ki he Fakamatala Loi (Making false declaration), Tikite ‘e 1 ki he fuakava loi (Perjury) Tikite ‘e 1 ki he ma’u mo tauhi e mahafu (Possession of ammunition).

Na'e fakahoko foki 'e he Tu'i Fakamaau Lahi Michael Hargreaves Whitten QC ki he Hou'eki Sula mo e Fakamaau'anga 'i he pongipongi 'o e 'aho ni 'e toe si'isi'i ange 'a e mafasia 'a e kau sula 'i honau fatongia pea faingofua ange ai 'enau ngaue mo ha'anau tu'utu'uni ki he Tikite 'e 3 'oku kei toe.

Na'e ui ai pe 'i he pongipongi 'o e 'aho ni 'a e fakamo'oni faka'osi 'a Taukapo ko Siaosi Kiu Tu'ivakano pea tapuni ai pe 'a tafa'aki 'a e Taukapo.

‘Oku ‘amanaki ke fakahoko ‘a e malanga tuku ‘a e ongo fa’ahi ‘i he ‘aho Monite 9 ‘o Ma’asi ‘a ia koe Monite ia ‘o e uike kaha’u pea ‘e toki fakahoko leva ‘a e tu’utu’uni aofgangatuku ‘a e Hou’eiki Sula ki he Tikite 'e 3 'oku kei toe mai.

‘Oku kau foki ‘eni he hopo lahi taha mo loloa taha ‘i he fonua ni ‘a ia 'oku fakafuofua ‘e a’u ki he uike ‘e 5 hono loloa 'a ia koe uike kaha'u ia 'e fakahoko kiai 'a malanga tuku moe tu'utu'uni 'a e Hou'eiki Sula.

‘Oku fakafofonga’i foki ‘a e Talatalaaki ‘e he Talekita ki he Va’a Talatalaaki ‘a e Pule’anga Semisi Lutui pea tokoni kiai ‘a Tevita ‘Aho.

‘I he tafa’aki ‘a e Taukapo ma'ae Faka’iloa ‘oku fakafofonga mai ‘e William Clive Edwards Sr. pea tokoni kiai 'a Dr. Viliami Uasike Latu.