Fakahoko fuofua fakataha Fale Alea ki he 2023 Tusite 31 Sanuali
30 Sanuali, 2023. Kuo tu’utu’uni ‘e he ‘Eiki Sea ‘o e Fale Alea, Lord Fakafanua, ke fakahoko ‘a e fuofua fakataha ‘a e Fale Alea ki he ta’u 2023 ‘i he ‘aho Tusite 31 Sanuali 2023.
Ko e hokohoko atu eni ‘a e ngāue ‘a e Fale, hili hono toloi fanongonongo mei he fakataha fakamuimui ‘i Tisema 2022.
Ko e ‘asenita ngāue ki he fakataha ni ‘oku kau ai hono fakafuakava’i ‘o e Memipa fo’ou ‘a ia ko e Fakafofonga Fale Alea ‘o e Vahenga Tongatapu 8, Hon. Johnny Grattan Vaea Taione.
Ko e hili ‘eni ‘a hono fakafoki mei he Komisoni Fili ki he ‘Eiki Sea ‘o e Fale Alea he pongipongi ni ‘a e tohi fekau ‘o e fili (writ of election) ‘o fakapapau’i mai ‘a e ola ko ia ‘o e fili si’i ‘a e Vahenga Fili Tongatapu 8 na’e fakahoko ‘i he ‘aho 19 ‘o Sanuali 2023.
‘Oku ‘i ai pe mo e ngaahi ‘asenita kehe ki he fakataha ‘o kau ai ‘a e Lao Fakaangaanga mo e Ngaahi Tu’utu’uni (Regulations) kuo fakahu mai mei he Pule’anga ‘i he mahina ni, fakamatala fakata’u ‘a e ngaahi potungaue ‘a e pule’anga, pea mo e ngaahi lipooti kehe pe kuo maau ke fakahu ki he Fale Alea.
