Tali halaia ‘ofisa pangike ki he kaiha’asi $28,000 mei he Va’a TDB ‘Ohonua. Featured
Pangike Fakalakalaka 'a 'Eua
1 'Epepeli, 2020. Na’e ha ‘i he Fakamaau’anga Lahi ‘i he ‘aho 26 Tu’apulelulu Ma’asi 2020 ‘a Aleki Filikitonga ke fakapapau’i ‘a e ngaahi ngaue ke fakahoko kimu’a pea toki fakahoko hono hilifaki tautea.
Fakatatau mo e fakamatala ‘i he Fakamaau’anga, na’e ‘osi tali halaia ‘a e Faka’iloa kimu’a ki he hia ‘oku tukuaki’i ia ki ai, ko e ngaue hala’aki pe ko’ene kaiha’asi ‘a e pa’anga fe’unga mo e $28,000.00 mei he Va’a ‘o e Pangikee Fakalakalaka ‘a Tonga ‘i ‘Ohonua ‘Eua.
Ko e Faka’iloa na’ane ngaue pe he pangikee ‘i he taimi na’ane fakahoko ai ‘a e hia pea ‘oku pehee na’ane fakahoko ia ‘i he ta’u kuo ‘osi.
Na’e kole ai ‘ene Fakafofonga Lao Mo’ale ki he Fakamaau’anga ke tuku mu’a ke ‘uluaki ‘oange ha lipooti pea mei he ‘ofisa malu’i angalelei ke tokoni ki he kole fakasi’isi’i tautea ‘o e Faka’iloa.
Pea na’e tu’utu’uni ai pe ‘a Fakamaau Lahi Laki Niu, ko e ‘aho 22 ‘Epeleli ke fakahuu ange ai ‘a e lipooti mei he va’a malu’i angalelei pea fakahuu atu ‘e he Talatalaaki ‘ene fakamalanga ‘i he ‘aho 13 ‘o Mee pea toki fakahoko ‘a e tali ‘a e Fakafofonga Lao ‘a e Faka’iloa ke fakahuu atu ‘i he ‘aho 28 Mee.
Ko e hilifaki hono tautea ‘e toki fakahoko ia he ‘aho 10 Sune 2020.
‘Oku ‘ikai ko ha me’a fo’ou ‘a e lahi ‘a e ngaahi hia pehe ni ‘i he kau ngaue pangikee pea ‘oku lolotonga ngaue popula ai ha ni’ihi pea ‘amanaki ke haa mo ha ni’ihi ‘i he kaha’u he Fakamaau’anga ‘i he ngaahi tukuaki’i tatau.
