Lava kātoanga’i fakamanatu ta’u 155 Kolisi Ko Tupou Featured
21 Fepueli, 2021. Na’e lava lelei he ‘aho Tokonaki 20 ‘o Fepueli ‘a hono kātoanga’i ‘a e ta’u 155 ‘o e Kolisi ko Tupou.
Na’e malanga’i fakamanatu ‘a e ‘aho ‘e he Tangata’eiki Sekelitali Lahi ‘a e Siasi Uēsiliana Tau’atāina ‘o Tonga Faifekau Dr. Tevita Koloa’ia Havea.
Na’e hoko atu ai ki hono tanupou ‘a e fale fakatotolo fakasaienisi (Science Laboratory) ‘a e Kolisi ‘a ia ‘oku ‘amanaki ke fakahoko hono langa ke kakato ki he ta’u 2021.
Na’e hoko mai ai ki he ouau ‘ilo ‘o e ‘aho pea na’e me’a ai ‘a e Ta'ahine Kuini Nanasipau’u Tuku’aho ‘a ia koia na’e fakaafe fakalangilangi ‘i he katoanga.
Na'e fakahoko 'a e lea talitali 'o e katoanga e he Tangata'eiki Pule Ako Faifekau 'Alifeleti 'Atiola pea hoko atu ai ki he me'a mei he Kolisi Tutuku na'e fakahoko 'e Lord Tangi.
Na'e malava ke tanaki ai ‘e he Kolisi Tutuku ‘a e Pa’anga ‘e $40,000 tupu ‘i he ngaahi fakafiefia ‘o e ‘aho pea na'e lava ki he katoanga 'a e ngaahi kolisi tutuku kehekehe mei he ngaahi ako'anga 'i Tonga ni ke poupou ki he kātoanga ni..
Ko Kolisi ko Tupou ‘a e ‘apiako motu’a taha ia ‘i Tonga ni pea koe talu hono fokotu’u ‘e he tangata misinale ‘Aositēlelia mo Pilitānia ko Toketā James Egan Moulton ‘a ia ‘oku ‘iloa ko Toketā Molitoni ‘i he ta’u 1866.
