Fakatokanga Saikolone ki he 'Otu Tonga Featured
7 'Epeleli, 2020. Kuo kamata ngāue mai ‘a e Senitā Fakatokanga Matangi ‘a e fonua ‘i Fua’amotu ‘i he pongipongi ‘o e ’aho ni ‘o tuku mai ‘a e fakatokanga matangi fekau’aki mo e ‘amanaki foua ‘e he Saikolone Faka-Talopiki ko Harold ‘a e potu tahi ‘o e ‘Otu Tonga.
‘Oku makatu’unga ‘eni mei hono muimui’i ‘a e halanga ‘o e saikolone ni ‘a ia na’e a’u ki he Ketakoli 5 (Gategory 5) ‘i he’ene a’u mai ki he ‘otu motu ‘o Vanuatu ‘i he po’uli hifo ‘anepō ‘o a’u ki he hengihengi ‘o e ‘aho ni.
‘Oku ‘i ai ‘a e fakafuofua ‘e fakaofi mai ki he ‘otu motu ‘o Tonga ni ‘i he taimi 7 hengihengi Tu’apulelulu 9 ‘o ‘Epeleli ‘a ia koe Tu’apulelulu ia ‘o e uike ni ka ‘oku fou faka Tonga ‘o mama’o ‘o ‘ikai ke fou hangatonu mai ‘i Tonga ni.
Fakatatau ki he fakamatala mei he Talēkita ‘o e Va’a Vakai Matangi ‘a Tonga ‘Ofa Fa’anunu ‘oku fakafuofua ke ‘i he malohi ko e Ketakoli 3 (Gategory 3) ‘i he’ene fakaofi mai ‘i he potutahi ‘o Tonga nika ko hono halanga totonu 'oku mahino 'e mama'o pe mei Tonga ni ka 'e malava ke mafuli hono halanga ha taimi pe.
‘I he ‘au mai ki he pongipongi ‘o e ‘aho ni ‘oku kilomita ‘e 1,685km ki he Hihifo ki he Tokelau Hihifo ‘o Nuku’alofa pea kilomita ‘e 1,715km ki he Hihifo ki he Tokelau Hihifo ‘o 'Ohonua, 'Eua.
‘Oku tukumai ai pe ‘a e fakatokanga ki he kakai ‘o e fonua kenau mateuteu pea ‘e hokohoko mai ai pe hono tuku mai ‘o e fakamata’ea ki he kakai ‘o e fonua.
