Fakatokanga matangi malohi ki he 'Otu Tonga Featured
31 Tisema, 2018. Kuo tuku mai 'e he Va'a Vakai Matangi 'a e Pule'anga ha fakatokanga matangi malohi ki he 'Otu Tonga 'i he ho'ata 'o e 'aho ni.
Fakatatau ki he fakamatala na'e tuku mai he taimi 1:00 PM 'o e aho ni koe matangi ko'eni 'oku taumu'a mai ki Fisi mo Tonga pe 'oku malava ke fatu 'o hoko koha saikolone fakatalopiki 'i loto he houa 'e 12 ki he 24.
Fakatatau ki he fakamatala mei he Va'a Vakai Matangi (Tonga Meteorology) 'oku nau ui pe 'a e matangi ko'eni ko 03F 'a ia 'oku fe'unga mo e kilomita 'e 1290 ki he Hihifo 'o e Tokelau Hihifo 'o Niuafo'ou, kilomita 'e 1640 ki he Tokelau Hihifo 'o Nuku'alofa 'i he 11 pongipongi 'o e 'aho ni 'a ia 'oku nga'unu 'i he noti pe koe maile tahi 'e 18 ki he 23 'i he houa pea 'oku 'amanaki ke a'u mai ki Tonga ni 'i he 'aho 'a pongipongi 'a ia koe 'uluaki 'aho ia 'o e ta'u 2019.
'I he vaha'a 'o e 'aho ni mo 'apongipongi 'e a'u 'a e malohi 'o e matangi 'i Niuafo’ou mo Niuatoputapu ki he kilomita 'e 60-70 ki he houa pea to takutaku 'o a'u ki he kilomita 'e 90 ki he houa.
Ko Vava’u mo Hapa’ai 'e angi 'a e matangi mei he Hahake ki he Tokelau Hahake pea 'e 'au pe ki he malohi koe kilomita 'e 35 ki he 45 ki he houa 'i he pongipongi 'a pongipongi fakataha mo e 'uha lahi 'o malava ke hoko ai ha tafea.
Ko Tongatapu mo ‘Eua 'e angi 'a e matangi mei he Hahake ki he Tokelau Hahake pea 'e a'u pe ki he malohi koe kilomita 'e 35 ki he 45 ki he houa 'i he pongipongi fakataha mo e 'uho'uha.
'I he 'aho Tusite 1 'o Sanuali 2019 ki he katoa 'o Tonga 'e hoko ha matangi malohi mei he Tokelau ki he Tokelau Hahake 'o malava ke a'u ki he kilomita 'e 60-70 ki he houa pea to takutaku 'o a'u ki he kilomita 'e 90 ki he houa fakataha mo e 'uho'uha 'o a'u ki he 'uha lahi fakataha mo e manamana.
Ko e tahi 'e hou pea koe matangi mei he Tokelau ki he Tokelau Hahake 'o a'u ki he noti 'e 35 ki he 40 'o hiki ai ki he noti 'e 45 ki he 50 'i ha ngaahi taimi fakataha mo e 'uha mo e manamana pea 'e fakapopo'uli 'o faingata'a ke 'ata lelei 'a e vakaiholo.
'Oku tukumai foki mo e fakatokanga ki he kakai 'o e fonua ke nau mateuteu ki ha matangi malohi 'e malava pe ke hoko koha saikolone fakatalopiki.
