Tukuaki’i ‘e Romania ‘a e Tokoni Sea ‘Iunioni ‘Akapulu ‘a Tonga Fe’ao Vunipola Featured
Tokoni Sea 'Unioni 'Akapulu 'a Tonga Fe'ao Vunipola pea 'oku ha he 'ata si'isi'i 'i 'olunga 'a Sione Faka'osilea lolotonga 'ene va'inga ma'a e timi faka-Fonua 'a Romania
16 Me, 2018. Kuo tautea’i ‘e he ‘Iunioni ‘Akapulu ‘a Mamani ‘a Romania ‘o to’o ‘enau totonu ke kau atu ki he Fea’uhi ki he Ipu ‘a Mamani ‘i he mala’e ‘akapulu ‘iunioni ‘a ia ‘oku ‘amanaki ke fakahoko ki Siapani ‘i he 2019.
Ko hono tautea’i ‘eni ‘o Romania fakataha mo Spain mo Beligium ki he’enau fakava’inga’i ‘a e ni’ihi na’a nau ‘osi va’inga fakavaha’a Pule’anga ‘o fakafofonga’i ‘a e ngaahi fonua kehe ‘a ia ‘oku tapu mamahi ‘eni ‘i he lao ‘a e ‘Iunioni ‘Akapulu ‘a Mamani.
Ko Romania na’e mahino tenau kau atu mei he tafa’aki faka-Hahake ‘o e ngaahi fonua ‘Iulope ka ko’eni ia kuo fetongi ia ‘e Lūsia 'a ia ko e 'unu hake ia 'a Lusia mei he fika 3 hili hono fakata'e'aonga'i 'a Romania na'e fika 1 mo Spain na'e fika 2 makatu’unga ‘i he maumaulao ko’eni.
Kaikehe ‘oku ‘amanaki ke tangi ‘a e ‘Iunioni ‘Akapulu ‘a Romania fekau’aki mo e tu’utu’uni ko’eni ‘a e ‘Iunioni ‘Akapulu ’a Mamani pea ko e konga ‘o ‘enau taukapo ko ‘enau tukuaki’i ‘a e Tokoni Sea ‘o e ‘Unioni ‘Akapulu ‘a Tonga Fe’ao Vunipola.
Fakatatau ki he fakamatala ‘a e kautaha ongoongo ko e The Guardian, na’e fetu’utaki faka-‘ofisiale mai ‘a e ‘Iunioni ‘Akapulu ‘a Romania ‘o kole ki he ‘Iunioni ‘Akapulu ‘a Tonga ke fakapapau’i ange ‘a e tu’unga ‘o e tangata va’inga Tonga ko Sione Faka’osilea ka ‘oku ne lolotonga va’inga faka-kalapu ‘i Romania.
Na’e tohi ‘imeili ai ‘a Fe’ao Vunipola ‘i hono fatongia koe Sea Le’ole’o ‘o e ‘Iunioni ‘Akapulu ‘a Tonga ‘o fakamahino ki he ‘Iunioni ‘Akapulu ‘a Romania ‘oku ‘ikai ha palopalema kapau tenau fakava’inga’i ‘a Sione Faka’osilea 'i he tesi fakavaha'a-Pule'anga.
‘Oku pehe ‘e he komiti ‘a e ‘Iunioni ‘Akapulu ‘a mamani ‘oku nau tokanga’i ‘a e ngaahi launga pehe ni ‘oku ‘ikai ke mahino mai na’e fai ha fakakaukau kākā ‘i he fetohi’aki ko’eni ka ko hono ola ‘oku kaunga kovi ia ki he ‘Iunoni ‘Akapulu ‘a Romania.
Ko Sione Faka’osilea na’a ne ‘osi fakafofonga’i ‘e ia ‘a Tonga ‘i he mala’e ‘akapilu liiki pea na’a ne ‘osi va’inga foki ‘i he timi ‘a e Tonga A kimu’a pea toki hiki atu ki Romania ‘i he ta’u 2014..
